OARALAP | MOUR MWURIN MEHLA—MET KAK WIAWI?
Dahme Kin Wiawi Mwurin Mehla?
“I kin medewe me ni emen eh mehla, e kak kohla wasa siluh: nanleng, ehl de pwurkadorio. I ese me I sohte uhdahn mwahu pwehn kohla nanleng de uhdahn suwed pwehn kohla nan ehl. I sohte nohn wehwehki dahme uhdahn mi nan pwurkadorio. I sohte kin kilang soahng pwukat nan Paipel. Aramas me kin nda met.”—Lionel.
“I sukuhlki me aramas koaros kin kohla nanleng ni arail mehla, ahpw I sohte uhdahn kamehlele. I kin medewe me mehla iei kaimwisekpen soahng koaros—me sohte ahn me melahr akan koapworopwor ong ahnsou kohkohdo.”—Fernando.
Mie pak me ke medewe: ‘Dahme kin uhdahn wiawi ni emen eh mehla? Mie wasa kis me irail me melahr kan me kitail poakohng kin wie lokolok? Kitail pahn pwurehng tuhwong irail? Ia duwen atail kak kamehlele met?’ Menlau tehk dahme Paipel uhdahn padahngki. Keieu, kitail pahn tehkpene dahme Paipel mahsanihki duwen irair en mehla. Mwuhr kitail pahn koasoiapene duwen koapworopworo me Mahsen en Koht, Paipel, kihda.
Ia irair en me melahr akan?
PAIPEL SAPENGKI: “Me momour kan ese me re pahn mehla, ahpw me melahr akan sohte ese mehkot. Solahr keting ehu pahn kohieng irail; re manokonoklahr douluhl. Nantihong doadoahk laud ni soahng koaros me ke pahn wia met, pwe e sohte pahn mie wiewia, de lamalam, de loalokong, de erpit, nan wasahn me melahr akan [“Sousou,” NW]—oh iei wasa me ke pahn kohla ie.”a—Eklesiasdes 9:5, 10.
Sousou, iei wasa me aramas kin kohla ni arail mehla; e kin karasaraskihong wasa ehu de irair ehu me sohte pahn mie madamadau de wiewia. Ia ahn ohl lelepeko Sohp eh madamadau ong Sousou? Nan rahnteieu, eh kepwe kan koaros sohla mie oh nah seri ko koaros mehla. Oh mwuhr, mpwos kamedek kei pwarada ni paliwereo pwon. E patohwan peki rehn Koht: “I ahpw men komwi en ketin nekidiehla nan sapwen me melahr akan [“nan ehl,” Catholic Douay Version]; komw ketin karirihiehla.” (Sohp 1:13-19; 2:7; 14:13) Eri e sansal me dahme Sohp wehwehki duwen Sousou sohte dokedoke kisiniei nan ehl, wasa me eh lokolok pahn laudla. Ahpw, e kilangwohng wasao nin duwen wasahn pitsang eh kahpwal ko.
Pil mie ehu ahl en sukuhlki irair en me melahr akan. Kitail kak tehk nan Paipel duwen kileldi en aramas welimen me iasada sang mehla.—Menlau kilang koakon me oaralape koasoia “Kaiasada Waluh me Paipel Kasalehda.”
Sohte emen rehn me welimen ko koasoia me re mi wasa kansenamwahu ehu de wasahn kalokolok ehu. Ma re kohla nan soangen wasa pwukat ahnsou me re mehlao, re sou pahn padahkihong meteikan? Met sou pahn pil iang kileldi nan Paipel pwe koaros en kak kilang? Sohte mehkot me duwehte met kileldi nan Paipel. Sohte mehkot me aramas welimen ko en koasoiahki ire wet. Dahme kahrehda? Pwehki irail sohte kehn mehkot, mwomwen me re meir kelikla. Ni mehlel, ekei pak Paipel kin karasaraskihong mehla meir. Karasepe, e mahsanih me nein Sairus serepeino oh Lasarus wie memeir.—Luk 8:52, 53; Sohn 11:11-13.
Eri, mie koapworopwor ong me melahr kan? Irail kak pirida sang soangen meir wet?
a Lepin mahsen “Sousou” iei me New World Translation of the Holy Scriptures doadoahngki ong lepin mahsen en Ipru “Sheol” oh lepin mahsen en Krihk “Hades.” Ekei kawehwehn Paipel doadoahngki lepin lokaia wet “ehl,” ahpw padahk me dene mie wasahn kalokolok ehu ong me melahr akan me kisiniei kin wie lullul sohte poahsoanda sang nan Paipel.