OARALAP | KASANSAL KAN EN NANLENG ME KAMARAINIH KITAIL
Peidek Kan Duwen Irail Me Mi Nanleng
Mie pak me ke kin medewe duwen nanleng oh irail me kin kousoan wasao? Ma ei, eri kaidehn kowe kelehpw. Sounpar kid kid kei aramas akan kin medewe duwen ire wet. Ekei kin kamehlele me arail peneinei en mahs ako me kin kousoan nanleng oh re anahne kawauwih. Meteikan kin medewehla wasa kansenamwahu oh meleilei ehu me adaneki nanleng, me direki tohnleng kan oh aramas mwahu kan me melahr. Ahpw meteikan kin medewehiong me nanleng iei wasahn kousoan ong koht rar rar kei.
Aramas tohto kin akupwungki me kitail sohte kak ese duwen nanleng pwehki sohte emen me kilangehr wasao me kohdihdo pwehn padahkihong kitail duwen wasao. Ahpw madamadau wet sapwung. Sises Krais ketiketier nanleng mwohn eh ketidihdo sampah. E mahsanih ni sansal ong kaunen pelien lamalam ako ni mwehin tepin Kristian ko: “I kohdihdo sang nanleng pwe I en kapwaiada kupwur en ih me ketin kadariehdo, a kaidehn pwe I en wia nsenei.” Pein Sises ketier wasa me e ketin padahkihong sapwellime wahnpoaron ako ni eh mahsanih: “Pere tohto mie nan tehnpesen Semei.”—Sohn 6:38; 14:2.
Semen Sises iei Koht, me mwarenki Siohwa, oh “tehnpesen” Siohwa mi nanleng. (Melkahka 83:18) Eri Siohwa Koht oh Sises Krais me kak keieu ketin kawehwehda mwahu duwen nanleng kan. Ira ketin kasalehdahr soahng tohto me pid duwen nanleng kan sang ni mehn kasansal kaselel kan me ira kin ketikihong me lelepek akan.
Ire kan en mwurin met kin koasoia duwen ekei wasa kan nan Paipel me kin kawehwehda dahme ohl akan kin kilang nan ekei kasansal kan. Ni omw tehk kasansal pwukat, tamataman me nanleng kaidehn mehkot me kitail kak kilang de doahke. Eri, Koht sohte ketin pilada en kawehwehiong kitail mepwukat ni ahl ehu me tohnleng kelehpw pahn kak wehwehki, ahpw e ketin koasoanehdi kasansal pwukat en kasalehda soahng kan me mi nanleng ni ahl ehu me kitail pahn kak wehwehki. Mehn kasansal pwukat pahn seweseiuk en wehwehki irail akan me kin mi nan “pere tohto” kan nanleng.