Ia Duwe, Koht Kin Ketiket Wasa Koaros?
Paipel sapengki
Koht kak ketin mwahngih mehkoaros oh pil kak wia soahng kan wasa me e ketin pilada. (Lepin Padahk 15:3; Ipru 4:13) Paipel sohte padahngki me Koht kin ketiket wasa koaros, nan soahng koaros. Ahpw, e kasalehda me e ketin ieias oh kin ketiket wasa ehu.
Mwomwen Koht: Ngehn ehu Koht. (Sohn 4:24) Aramas sohte kak kilang ih. (Sohn 1:18) Kaudiahl kan duwen Koht me kileldi nan Paipel kin kalapw kasalehda eh ketiket wasa ehu. E sohte kin kasalehda me e ketiket wasa koaros.—Aiseia 6:1, 2; Kaudiahl 4:2, 3, 8.
Ia wasa Koht kin ketiket ie? Paipel mahsanih me Koht kin ketiket ‘nan mwoale nanleng.’ (1 Nanmwarki 8:30) Met wehwehki me Koht sohte kin ketiket sampah ahpw e kin ketiket nanleng. Paipel mahsanih duwen ahnsou ehu me tohnleng kan “pwarodo mwohn silangin KAUN-O” [Siohwa, NW],a met kasalehda me Koht kin ketiket wasa ehu.—Sohp 1:6.
Ma Koht sohte kin ketiket wasa koaros, ia duwe, e uhdahn ketin nsenohki emenemen kitail?
Ei. Koht uhdahn ketin nsenohki laud emenemen kitail. Mendahki e kin ketiket nan mwoale nanleng, Koht kin ketin mwahngih irail kan nin sampah me kin uhdahn men kaperenda kupwure, oh e ketin tiengla mwomwe pwehn sewese irail. (1 Nanmwarki 8:39; 2 Kronikel 16:9) Tehk ia duwen Siohwa eh ketin kasalehda me e kin ketin nsenohki sapwellime tohnkaudok mehlel kan:
Ni omw kin kapakap: Siohwa kak ketin karonge omw kapakap ni ahnsowohte me ke wie kapakap.—2 Kronikel 18:31.
Ni omw kin ahneki pwunod: “KAUN-O kin ketiket mpen irail me nan kapehd tikitiklahr; oh kin ketin doarehla irail kan me kin sohla ar koapworopwor.”—Melkahka 34:18.
Ni omw kin anahne kaweid: Siohwa ‘pahn padahki iuk’ sang sapwellime Mahsen, Paipel.—Melkahka 32:8.
Madamadau sapwung me dene Koht kin ketiket wasa koaros
Madamadau sapwungo: Koht kin ketiket wasa koaros nin sampah oh pahnlahng.
Ire mehlel: Koht sohte kin ketiket wasa sohte lipilipil nin sampah de pil pahnlahng. (1 Nanmwarki 8:27) Mehlel me usu kan oh kepikipik teikan kin “kasalehda sapwellimen Koht lingan.” (Melkahka 19:1) Ahpw, Koht sohte kin ketiket nan sapwellime kepikipik kan. Karasepe, sounmahlen men sohte kin mihmi nan eh mahlen, ahpw eh mahleno kak padahkihong kitail mehkot duwen ih. Pil duwehte met, soahng kan me kitail kin kilang nin sampah kin padahkihong kitail duwen “irair soh sansal kan” en Sounkapikadao, duwehte sapwellime kehl, erpit, oh limpoak.—Rom 1:20.
Madamadau sapwungo: Koht kin ketiket wasa koaros pwehn mwahngih soahng koaros oh pwehn kasalehda sapwellime kehl lapalap.
Ire mehlel: Sapwellimen Koht manaman de ngehn sarawi iei me e kin ketin doadoahngki pwehn kapwaiada kupwure. Ni eh kin ketin doadoahngki sapwellime manaman, Koht kak ketin mahsanih oh pil wia soahng koaros, sohte lipilipil ia wasa oh ahnsou dah, mehnda ma e sohte ket wasao.—Melkahka 139:7.
Madamadau sapwungo: Melkahka 139:8 padahngki me Koht kin ketiket wasa koaros ni eh mahsanih: “Ma I pahn patohdahla nanleng, komwi pahn ketiket wasao; ma I pahn patohdihla nan wasahn me melahr akan, komw pil kin ketiket wasao.”
Ire mehlel: Iren Paipelo sohte mahmahsanih duwen wasa me Koht ketiket ie. Ahpw e doadoahngki lokaia kaselel kan pwehn padahngki me sohte wasa ehu me nohn doh ong Koht pwehn ketin sewese kitail.
a Siohwa iei mwaren Koht me sansalda nan Paipel.