Kowe Emen Soun Kadehde Pwulopwul en Siohwa?
1. Soangen peidek dah kan me pwulopwul kan anahne medemedewe?
1 Ma emen idek rehmw peidek wet, ke pahn nda ei? Pwekida? Pwehki ahmw pahpa oh nohno wia Sounkadehdehn Siohwa kan oh re kin onop rehmw? Mwein re kin kahre iuk ong mihting kan oh ke kin iang ira kalohk. De mwein tohto kompoakepahmw kan oh iengomw kan wia Sounkadehdehn Siohwa kan. Ia duwen pein kowe? Kowe emen Sounkadehdehn Siohwa?—Ais. 43:10-12.
2. Dahme me pwulopwul kan kak wia pwehn kamwahwihala arail mwomwen onop Paipel?
2 Onop: Pwehn wia emen Sounkadehdehn Siohwa, kitail anahne ale loalokong me pid duwen Siohwa, kupwure kan oh dahme e ketin kupwurki kitail en wia. Ke kin kihong ahnsou ong pein wia onop Paipel? Ke kin kaukaule wia met, duwehte ahmw kin kihong ahnsou ong mwenge? (Sohn 17:3) Ni ahnsou me ke wadek Paipel oh pwuhk teikan en sawaspen Paipel, ke kin kilang ire kan me koasoiong iuk duwen Siohwa, sapwellime madamadau oh kupwure kan pwe ken kak kasalehda mepwukat ong meteikan oh uhd wia sounkadehde men ong Siohwa? Met mehkot mwahu en wadek pwuhk en mahs kan oh me kapw kan en sawaspen Paipel.
3. Soangen peidek dah kan me kin pwarada ni ahmw wadek Ipru 10:23-25?
3 Ke kin dadaurete wadawad en iren Paipel kan me kin koasoandi ong ehuehu wihk? Ke kin kaunopada ong mihting kan? Ke kin kilelehdi pasapeng kan ong peidek kan ong Onop en Kahn Iroir oh Onop en Paipel en Mwomwohdiso? Ke kin iang pasapeng nan mihting kan? Sang ni pein ahmw koasoi? Ma ke kin wia met, se kapingahkin uhk. (Ipru 10:23-25) E sansal me ke kin nantihong en kasalehda me kowe emen sounkadehde mehlel men ong Siohwa ni ahmw pwulopwul.
4. Ia ekei soahng kan me kitail kak wia pwehn kekeirda nan atail doadoahk en kalohk?
4 Doadoahk en Kalohk: Pwehn wia sounkadehdehn Siohwa kan, kitail anahne koasoia duwen ih. Ke kin kaukaule iang doadoahk en kalohk? Me pwulopwul tohto kin kihda mehn kahlemeng mwahu duwen met. Ni ahnsou me ke kihla makasihn kan sang ihmw lel ihmw, ke kin kihda soangen ire kan me tohnihmwo pahn perenki rong? Ke kin idek eh madamadau duwen ireo oh rong kanahieng pwehn wehwehki eh madamadau ong ireo? Ni ahnsou me ke kihla pwuhk, ke kin kasalehda ire me ke lemeleme tohnihmwo pahn perenki rong? Mwein ih wasa pwukat me ke anahne kamwahwihala. Ma ei, nantihong en wia uwen ahmw kak oh kapakap ong Siohwa pwe e pahn ketin sewese iuk oh kapaia iuk duwehte e ketin wiahiong sounkalohk pwulopwul teikan me kasalehda me irail wia sounkadehdehn Siohwa me pweida kan.—Kol. 1:9, 10.
5. Soangen kamweit dah me kitail ale sang Ipru 6:10-12?
5 Inoukihong Siohwa Ahmw Mour: Pwehn kaperenda Siohwa, kitail anahne inoukihong Siohwa atail mour oh duwen me Sises kehkehlingki, kitail kasalehda atail inou ki papidais. (Mad. 28:19, 20) Ke pahn uhdahn kamehlele ni ahmw esehla oh wia kupwuren Siohwa, e pahn ketin sewese iuk en wia emen sounkadehde pwulopwul me ngoang oh lelepek ong kapingpe.—Ipru 6:10-12.