Ahneki Werek Mwahu
1. Ia wehwehn kalaudehla atail werek?
1 Ke kin pehm nanpwungmwahu ehu rehn irail koaros me inoukidahr arail mour ong Siohwa? (Mark 3:31-35) Mie ahnsou mwahu tohto en werekiong irail kan me kin papah Siohwa mwurin de mwohn mihting kan. Kitail anahne doadoahngki soangen ahnsou pwukat pwehn kalaudehla atail werekiong me kapw akan oh pil esehla me tohto ni uwen me kitail kak. Ehukihong irail dahme wiawi nan kalohk oh pil koasoi kan me pahn kakehlairailda pahn kangoange meteikan.—1 Des. 5:11, 15.
2. (a) Dahme kahrehda ekei kin luke arail peneinei me kaidehn Sounkadehde pwehn werekiong irail? (b) Peidek dah me kitail en medemedewe duwe?
2 Werek Mwahu: Emen sohte kak iang Koht kekeid oh ni ahnsowohte pil werekiong koasoandi suwed me kin pwungki soahng koaros me Koht kalahdeki. Paipel kaweidki: “Werekiong aramas suwed kan e kin kauwehla tiahk mwahu.” (1 Kor. 15:33) Ekei nan mwomwohdiso kin luke kompoakparail de arail peneinei me kaidehn Sounkadehde me sohte kin perenki padahk mehlel pwehn werekiong irail. Re kin medewe me met pahn sewese irail en iangala padahk mehlel. Ahpw ia duwen, met iei elen loalokong oh e pahrekiong kaweid kan en Paipel?
3. (a) Ia duwen atail kak doadoahngki kaweid en 2 Kor. 6:14, 15 ong atail werek? (b) Dahme kak imwikihla atail kin werekiong kompoakepatail oh peneinei kan me kaidehn Sounkadehde kei?
3 Kaweid kohwong kitail en kanahieng atail kin ehuiong aramas akan oh me seupwoson kan. Dahme kahrehda kitail en dehr ehuiong aramas kan me kin momourki elen sampah oh saikinte wiahla tohnkaudok en Siohwa? (2 Kor. 6:14, 15) Ekei me sohte nsenohki arail nanpwungmwahu rehn Siohwa mwein kin rapahki meteikan me kin kolokolete madamadau oh elen sampah oh re sohte kin werekiong Kristian koahiek kan me kak sewese irail en kehlailda nan arail pwoson. Irail sohte men pohnese me werekiong aramas en sampah wet, me sohte mourki kaweid mwahu kan kak kaluwetala arail pwoson oh kauwe irailla.—2 Des. 3:14, 15.
4. Soangen werek dah me kitail en rapahki?
4 Koaros me kin men mourki padahk mehlel anahne rapahki werek kan me kin poadidiong Siohwa oh me pahn sewese irail en kekeid nan padahk mehlel oh kekeirda nan arail papah Koht. Kompoakepatail kan oh irail me kitail werekiong kak kamwakid laud kitail. Ihme kahrehda, ia uwen eh wia elen loalokong en rapahki kompoakepatail me kin kolokol arail nanpwungmwahu rehn Siohwa!