Ia Uwen Kesempwal Atail Miniminiong Riatail Kristian kan?
1 “Aramas men sohte kak kekeirada mwahu ma e kin kelekelepw oh sohte patehng meteikan.” Emen soun nting en lokaia lingan nan kaeisek isuhn senturi ntingihdi met oh e kin pahrekiong dahme Pwuhk Sarawi kin kasalehda duwen anahn ehu me aramas koaros kin anahne—en patehng aramas teikan. (Lepin Padahk 18:1) Ni ahnsou me kitail kin miniminiong riatail Kristian kan, met kin kaitarala anahn wet. Ni ahl dah kan?
2 Ahnsoun Kalohk: Ehu kamwahu kin kohsang ahnsou me riatail brother oh sister kan kin kakehle oh kangoange kitail nan kalohk. Sises kadarala sapwellime tohnpadahk kan “wad riemen” pwehn sawaspene nan kalohk. (Mark 6:7; Luk 10:1) Pwehn alasang mehn kahlemeng mwahu wet, ni atail kin iang meteikan nan kalohk, kitail kin wehwehki duwen mehlelpen dahme ntingihdi nan Eklesiasdes 4:9, 10. Ni atail kin doadoahkpene nan kalohk, oh ahnsou me kitail kin kilang pwoson, peik oh limpoak en riatail brother oh sister kan, met kin kakehlailih atail eimah oh ngoang.
3 Ahnsou me Pein Kitail Kin Anahne Sawas: Atail pirien kan en pali ngehn kin pil kangoange kitail oh kaweidih kitail ni atail kin lelohng kasongosong kan oh kahpwal kan. Riatail brother oh sister kan mwein kin kasalehong kitail duwen iren Paipel kan me kin kak sewese kitail wehwehki dahme kitail pahn wia ong soahng kan me kitail kin nsenohki de pwunodki. Mwein re pil pahn kapakapkin kitail, duwehte kitail kin kapakapkin irail. (2 Kor. 1:11) Oh pil, arail mehn kahlemeng mwahu kin kangoange kitail en wia dahme pwung oh kin kakehlailih atail pwoson.
4 Ahnsoun Mihding kan: Kitail kak paiekihda kapai kan en miniminiong riatail Kristian kan ni ahnsou me kitail kin kaukaule iang towehda mihding kan. (Ipru 10:24, 25) Prokram en mihding kan kin audaudki diren mwengehn ngehn, oh pil atail iang towehda mihding kan kin sewese kitail en karanih riatail me pwoson kan. Ahnsou me kitail kin iang towehda mihding kan, kitail kin rong riatail brother oh sister kan kasalehda duwen arail pwoson, ni arail kin wia padahk oh iang pasapeng. (Rom 1:12) Nanpwung mwahu nanpwungen kitail oh riatail kan kin kehlailda ni atail kin koasoipene mwohn oh mwurin mihding kan. Soangen ahnsou kan kin kihong kitail ahnsou mwahu en kasalehda duwen dahme kin wiawi nan atail mour me kin kakehlailih atail pwoson. Ni atail kin kalap miniminiong irail me kin poakohng Siohwa, sapwellime Mahsen, sapwellime doadoahk en kalohk oh pil sapwellime aramas akan, met pahn sewese kitail en kamwahwihala atail irair en mour ni ahl me keieu mwahu.—Pil. 2:1, 2.
5 Kitail anahne riatail Kristian brother oh sister kan. Ma sohte irail, e pahn apwal en keid nan ahl me tehtik. Arail limpoak and kangoang kin kak sewese kitail en nannanti oh wia uwen me kitail kak pwehn mour nan sapwellimen Siohwa sampah kapw, ahnsou me pwung pahn pweida ahnsou koaros.—Madiu 7:14.