Koasoandi en Peneinei—Mihding en Mwomwohdiso kan
1 Ma ke wia emen Kristian pahpa de nohno, ke mwahuki noumw seri kan en kekeirada oh poakohng Siohwa oh papah Ih oh pil ale mour soutuk nan sampah kapw me Koht inoukihda. Iaduwen ke kak sewese irail en mwohneki arail kaudok ong Siohwa en keieu nan arail mour? Ahmw wia mehn kahlemeng mwahu pahn keieu kesempwal. (Lepin Padahk 20:7) Emen sister me tamanda mehn kahlemeng mwahu en ah nohno koasoia: “Se sohte kin peidek ma se pahn iang towehda mihding de soh.” Met mihmihte nan ah madamadau lel met.
2 Ahmw peneinei kin wehwehki kahrepen atail iang towehda mihding kan koaros? Kaweid kan me kitail kin alehdi sang mihding pwukat kin kakehlailih kitail en wia kupwuren Koht, oh werek ong riatail brother oh sister kan kin wia mehn kangoang me keieu kesempwal. (Aiseia 54:13; Rom 1:11, 12) Ahpw, kahrepe keieu kesempwal en iang towehda mihding kan koaros iei en kapinga Siohwa “sang nan mwomwohdiso.” (Melkahka 26:12) Mihding en Kristian kan kin kihong kitail ahnsou mwahu kan en kasalehda atail limpoak ong Siohwa oh kaudok ong Ih.
3 “Tehk Kanahieng”: Ma kitail kin wehwehki oh kalahnganki kahrepe kan me Siohwa koasoanehdi mihding kan koaros ong kitail, met pahn kamwekid kitail en “tehk mwahu” pwe kitail de sohte pahn iang mihding kan pwehki kahrepe soh katepe kan. (Episos 5:15, 16; Ipru 10:24, 25) Ni ahnsou me ke wiahda ahmw koasoandi en peneinei, ke kak kileledi mahs mihding kan koaros. Tehk kanahieng pwe soahng teikan en dehr kauwehla ahmw iang towehda mihding kan koaros. Tehk kanahieng me ahmw kin iang towehda mihding kan kin wia mehkot me keieu kesempwal nan mour en ahmw peneinei pwon.
4 Kitail soh kin mwekidki laud ahnsou me kitail kin wadek duwen kahpwal tohto me riatail brother oh sister kan kin anahne powehdi pwe irail en kak iang towehda mihding oh kapokon kan? Mendahki ma kahpwal kan me ke kin lelohng sohte laud duwehte brother oh sister pwukat, e sansal me mie pein ahmw kahpwal de kapwunod akan me ke pil kin lelohng. Sehdan kin kalaudehla ah kin uhwong sapwellimen Koht aramas akan oh e kin nantihong en kauwehla arail kaudok ong Siohwa. Ahpw, ken ese me noumw seri kan kin pohnese duwen nanti me ahmw peneinei kin kasalehda pwehn iang towehda mihding kan koaros. Ni mehlel, ni ahmw pahn wia met, ke pahn kihong irail kisakis ngehnin ehu me re sohte kak manokehla.