Tohnmeteiki Pein Kitail Ni Peren
1 Sounmelkahka Depit kohpada me sapwellimen Siohwa aramas “pahn tohnmeteiki pein irail ni peren”; me wehwehki, “aramas me men tohnmeteiki pein irail mwadang ni peren.” (Melkahka 110:3, footnote) Met pweida ong riatail brother oh sister kan ni pali ngehn sampah pwon. Sang pahr en kalohk sounpahr pahieu samwalahro lel met, sapwellimen Siohwa aramas tohnmeteiki kalohk dauli awa lik pwehn kalohkseli rongamwahu en Wehio. Oh ni ahl tohto, likin atail kalohk oh katohnpadahngki aramas akan, kitail kak tohnmeteiki pein kitail pwehn sewese mehteikan.
2 Ahl Akan Me Kitail Kak Kasalehda Atail Men Tohnmeteiki Pein Kitail: Mwein ekei nan mwomwohdiso anahne sawas pwehn iang towehda mihding akan. Dahme ke soh ndaiong irail me re kak iang uhk? Ekei pil soumwahu, mahla, de mihmi nan imwen wini. Ke kak mwemweitla rehrail de sawas ni ahl teikan? Mwein mie emen de peneinei ehu me anahne mehn kangoang. Ke medemedewe en luhke irail en iang ahmw peneinei onop ekei pak? Mwein emen pioneer de sounkalohk men anahne emen en iang ih nan kalohk. Dahme ke soh idek reh ma e mwahuki ken iang ih nan kalohk? Met ekei ahl kan me kitail kak en tohnmeteiki pein kitail pwehn wia mwahu ong irail kan me kisehn atail pwoson.—Kalesia 6:10.
3 Brother kan kak kasalehda arail men tohnmeteiki pein irail nan sapwellimen Siohwa pwihn sansal nin duwen irail en wia uwen me irail kak pwehn koahiekla nin duwen doadoahk en elder kan oh ministerial servant kan. (1 Tim. 3:2-10, 12, 13; Taitus 1:5-9) Pwehki kitail tohtohla, mie anahn laud ong brother koahiek kan me men apwalih mwomwohdiso ni peren nin duwen doadoahk en kalohk, padahk oh epwelpen mwomwohdiso.—1 Tim. 3:1.
4 Mwein ekei kitail kin tohnmeteiki pein kitail nin duwen atail kin iang doadoahk en auxiliary pioneer ekei pak. Ahpw mwein, ma kitail pwurehng koasoanehdi atail ahnsou oh kawukila ekei wasa nan atail koasoandi kan, kitail mwein kak auxiliary pioneer sounpwong koaros (regular auxiliary pioneer) de iang doadoahk en regular pioneer. De mwein atail irair en mour pahn mweidong kitail en kosoula nan ehu wasa me anahn laud mie ong doadoahk en kalohk. De mwein kitail kak wia neitail application pwehn iang doadoahk nan Bethel oh ni ahl wet sewese irail pwe doadoahk en kalohk en kekeirada nan sampah pwon. Oh pil ehu, doadoahk en kauwada Kingdom Hall kapw kan, wasahn kapokon kapw kan oh ohpis en rahn kapw kan wia kekeirada sampah pwon oh kitail kin kalahngki irail me kin tohnmeteiki pein irail pwehn iang doadoahk pwukat. Kitail kin kalanganki irail me kin tohnmeteiki ni ahl pwukat, oh irail kak kasik me Siohwa pahn kapaiirailda.—Luk 6:38.
5 Kitail mihmi nan ahnsou peren ehu. Siohwa kin doadoahngki sapwellime ngehn sarawi pwehn wia doadoahk kaselel ehu nan sampah ni E kin doadoahngki sapwellime aramas peren kan! Ahnsou koaros ma Siohwa, ni sapwellime pwihn sansal, kin luhke kitail en kalaudehla atail doadoahk en kalohki Wehio, kitail anahne idek rehn pein kitail, ‘I kin wia uwen me I kak pwehn tohnmeteiki pein ngehi ni peren?’ Mwurin mwo, kitail kak kasawihada pein mongiongatail oh atail irair en mour oh pekihda sapwellimen Siohwa sawas ni kapakap pwehn wia keseu mwahu. Atail lelepek ong Siohwa pahn sewese kitail en wia uwen me kitail kak pwehn papah Siohwa, oh ih duwen kitail kak kaperenda sapwellime mongiong!—Sepanaia 3:17.