Ihs Me Pahn Rong Atail Padahk Kan?
1 Nan atail ahnsou, e kin wukisang mahs, pwe aramas kin rong soahng tohto, pali laud en soahng kan kin mwahl oh likamw. Pwehki met, pali moron aramas kin pwangahki rong oh e uhd wia mehkot apwal ong kitail en kahreong tohnihmw kan en men rong dahme kitail pahn koasoi duwen Wehin Koht. Tohnihmw kan sohte kin kalanganki me arail rong Mahsen en Koht pahn wia mehkot mwahu ong arail mour.—Luk 11:28.
2 Kitail kin perenki rong me pali laud en sahpw kan, aramas kid kei me kin rong duwen Wehin Koht oh irail kin uhd tepiada onop Pwuhk Sarawi. Ahpw, nan ekei wasa kan, aramas sohte men rong. Pali laud en aramas me re kin koasoiong sohte men rong oh Sounkadehde kan en wasa kan kin medemedewe ihs me pahn rong arail padahk kan duwen Wehin Koht.
3 Kitail anahne nantiong en dehr pwangada. Pohl kawehwehda: “ ‘Koaros me kin likweriong mwaren [Siohwa] pahn mourla.’ Oh ia duwen arail pahn kak likweriong, . . . ma re sohte rong mahsenpe? Oh ia duwen arail kak rong, ma mahsenpe sohte pahn wiawiong irail? . . . Nin duwen Pwuhk Sarawi eh mahsanih: ‘Meid lingan oh kaselel atail udiahl meninkeder kan ni ar kin wa kohdo rongamwahu!’ ” (Rom 10:13-15) Ma kitail nantiong kamwarak war en Wehio, Koht me pahn kin ketin kakairada tuhkeo nan mongiong kan en irail me kin rapahki dahme mehlelo.—1 Korint 3:6.
4 Keyo en Wia Return Visit kan Kaukaule: Nan wasa kan me aramas malaulau kin perenki rong, kitail anahne en medemedewe en sewese irail me kin perenki rong, mendahki ma kitail kihla pwuhk de makasihn kan rehrail de soh. Kitail en dehr mwadang medemedewe me kitail sohte kak wia mehkot. Kitail nantiong kamwarak war en Wehio wasa koaros pwe kitail sehse mehnia me pahn pweida. (Eklesiasdes 11:6) Ma kitail kaunopada dahme kitail pahn kasukuhlih aramas oh kitail pwurala rehn aramas oko pwehn padahkiong irail mehkot sang nan Pwuhk Sarawi, mehnda ma ke koasoiong irail ahnsou kiste, ih duwen kitail kak lel mongiongarail. Kitail kak kihdi kisin doaropwe (tract) de makasihn rehrail. Ahpw, mwuhr, ke kak wia kamwomwada ehu oh kasalehiong irail iaduwen kitail kin onop Paipel rehn aramas akan. Mwein kitail pahn pwuriamweiki ia uwen Siohwa pahn kapaiada atail nantiong en pwurala rehn aramas oh tepida Bible study rehrail.—Melkahka 126:5, 6.
5 Emen sister kihdi doaropwe ehu (tract) rehn emen lih me perenki rong. Sistero pwurala rehn liho ahpw e sohte diarada ih nan ihmw lao sounpwong riau mwuri, ahpw liho sohte kak koasoakoasoi pwe e kedirepw. Sistero kihdi kisin doaropweohte me e kihong ih rahn teio. Mendahki sistero kin nantiong en pwurala, e sohte diarada ih nan ihmw lao sounpwong siluh mwuri, ahpw ahnsou me e diarada ih, e soumwahu. Ahnsou me sistero pwurala wihk ehu mwuri, liho kasalehda ni sansal me e inenen perenki rong duwen Wehin Koht. Irair en ah mour wukilahr oh ihme e uhd wehwehki ah anahn en pali ngehn. Sistero tepida onop Paipel rehn liho, oh liho perenki onop Paipel sang ansouo kohla.
6 Duwehte soahng koaros me kitail kin men kilang kekeirada—wahn rohs kan, de wahntuhke kan, de aramas en perenki rong duwen Wehio, kitail anahne apwali mwahu. Atail ahnsou, atail nanti, nsenohki irail kin anahn. Nan pahr samwalahro, aramas daulih silisapw (over 300,000) me war en Wehio tepida kekeirada rehrail uhd pepdaisla! Ma kitail nantiong en kalohk, kitail uhdahn pahn diarada irail me kin perenki rong.—Pil kilang Kalesia 6:9.