Powehdi Kahpwal Kan Nan Doadoahk En Kalohk Ihmw Lel Ihmw
“Atail Koht ketin kakehlaikitada pwe se en padahkihong kumwail Rongamwahwo me pwarodo sang reh, mehnda ma se diarada apwal laud.”—1 DES. 2:2.
1. Soangen kahpwal dah kei me Seremaia kin lelohng, oh iaduwen e kin powehdi mepwukat?
SEREMAIA iei emen me kin ahneki soangen pepehm me kitail kin pil ahneki. Ni ahnsou me Siohwa ketin padahkihong ih en wia pwukoahn emen “soukohp ong wehi kan,” e sapeng patohwan: “Maing KAUN, Wasa Lapalahpie, ia duwe, pwe I sohte kin ese pato; I me nohn pwulopwul.” Ahpw mendahki met, pwehki e likih Siohwa, e pwungki ale pwukoa wet. (Ser. 1:4-10) Erein sounpar 40 samwa, Seremaia kin lelohng kahpwal sang aramas me sohte kin nsenohki rong ih, kasarowe ih, kapailok ih, oh pil kin keme ih. (Ser. 20:1, 2) Mie pak, e kin pehm me e men uhdihsang wia eh pwukoa. Ahpw, e kin nannanti kalokalohki rohng ehu me pali laud en aramas sohte men rong. Pwehki sapwellimen Koht kehl, Seremaia kak kaimwisekla pwukoa ehu me pein ih sohte kak wiahda ki pein eh kehl.—Wadek Seremaia 20:7-9.
2, 3. Ni ahl dahieu me sapwellimen Koht ladu kan rahnwet kin lelohng kahpwal kan me pil duwehte dahme Seremaia kin lelohng?
2 Pali laud en sapwellimen Koht ladu kan rahnwet kak wehwehki duwen pepehm en Seremaia. Nin tepio, ni atail kin medewehla atail en kohla kalohk ihmw lel ihmw, ele pali laud en kitail kin nda, ‘Uhdahn I sohte kak wia doadoahk wet.’ Ahpw, ni ahnsou me kitail wehwehkihla me iei kupwuren Siohwa kitail en kalohki rongamwahu wet, kitail kin powehdi atail pepehm en masak oh tepida kedirepwkihla doadoahk en kalohk. Pali laud en kitail kin lelohng irair kan nan mour me mehnda ma pil ahnsou mwotomwotte, e kin kahrehda apwal ong kitail en kin doulahte kalokalohk. Mehlel, e kin apwal en iang tepida kalohk sang ihmw lel ihmw oh doudoulahte wia met lao lel imwi.—Mad. 24:13.
3 Ahpw iaduwen ma ke kin wie onohnop Paipel rehn Sounkadehdehn Siohwa kan oh pil kin towehda mihding en mwomwohdiso kan ki erein ahnsou kei ahpw ke ekis pweiek en tepida kalohk sang ihmw lel ihmw? De iaduwen ma kowe emen Sounkadehde papidaislahr men ahpw kin apwaliki iang doadoahk en kalohk ihmw lel ihmw, mehnda ma ke ahneki roson mwahu oh pil kehlail en wia met? Ke anahne kamehlele me meteikan sang soahng soangen irair en mour kin powehdi soangen kahpwal kan nan doadoahk en kalohk. Ki sapwellimen Siohwa sawas, ke pil kak wia met.
En Kakehleikitailda
4. Dahme kin sewese wahnpoaron Pohl en kak kalohki rongamwahu wet ni eimah?
4 Mwein ke kin pohnese me doadoahk en kalohk wet nan sampah pwon kin pweida, kaidehn pwehki kehl en aramas, ahpw pwehki sapwellimen Koht manaman. (Sek. 4:6) Met pil mehlel ong doadoahk en kalohk en emenemen Kristian. (2 Kor. 4:7) Medewehla duwen wahnpoaron Pohl. Ni eh tamanda ahnsou me tohn uhwong kan kin kaloke ih oh ienge misineri kan, e ntingihdi: “Kumwail pil ese duwen at ale kalokolok oh mwamwahllahr nan Pilipai . . . atail Koht ketin kakehlaikitada pwe se en padahkihong kumwail Rongamwahwo me pwarodo sang reh, mehnda ma se diarada apwal laud.” (1 Des. 2:2; Wiewia 16:22-24) Mwein e apwal ong kitail en leme me sounkalohk eimah menet Pohl kin pil mie soangen ahnsou kan me e kin inenen apwaliki en kalohk. Ahpw, pil duwehte kitail, Pohl anahne en kin likih Siohwa pwehn kak kalohki rongamwahu wet ni eimah. (Wadek Episos 6:18-20.) Iaduwen kitail kak alasang men kahlemeng en Pohl?
5. Ia ehu ahl me kak kakehleikitailda pwehn kalohk ni eimah?
5 Ehu ahl me kak kakehleikitailda pwehn kalohk ni eimah iei en kapakap. Emen pioneer sister koasoia: “I kin kapakap pwe I en kak koasoi ni soh masak, kapakap pwe I en kak sair mohngiong en aramas akan, oh pil kapakap pwe I en kak diar peren nan doadoahk en kalohk. Doadoahk wet kaidehn atail ahpw sapwellimen Siohwa doadoahk, eri kitail sohte kak wia mehkot ma sohte sawas sang reh.” (1 Des. 5:17) Kitail koaros anahne en kin kaukaule kapakap oh peki sapwellimen Koht sawas en manaman sarawi pwe kitail en kak kalohk ni eimah.—Luk 11:9-13.
6, 7. (a) Kaudiahl dahieu me Esekiel alehdi, oh ia wehwehn kaudiahl wet? (b) Mehn kasukuhl dahieu me kaudiahl en Esekiel kihda ong sapwellimen Koht ladu kan rahnwet?
6 Pwuhken Esekiel kin kasalehda pil ehu ahl me kak sewese kitail en kin kalohk ni eimah. Nan kaudiahl ehu, Siohwa ketikihong Esekiel pelin doaropwe me nting ni pali koaros ki “mahsen en nsensuwed kei, oh pil mahsen en mwahiei oh kapahtou” oh ketin padahkihong ih en kangala, mahsanih: “Kowe, nein aramas, kangala pelien doaropwe wet me I kihwei; kadirehkihla kapehdomwen.” Ia wehwehn kaudiahl wet? E kin wehwehki me Esekiel anahne en audaudkihda ni unsek mahsen me e pahn kalohkiseli. Mahsen pwukat en mwomwen wiahla duwehte kisehn paliwere, me pahn kak kamwakid eh pepehm loal kan. Soukohpo pil doula koasoia: “Ngehi eri tungoalehla, oh kehnda duwen eh mem duwehte sukehn loangalap.” Ong Esekiel, en kalohki sapwellimen Koht mahsen kan ong wehi pokon kin inenen kaperen ong ih—duwehte emen eh pahn kin tungoale sukehn loangalap. E pehm me e ahneki pwais kaselel ehu en wia wiliepen Siohwa men oh kapwaiada pwukoa wet me Koht ketikihong ih, mehnda ma met wehwehki me e pahn wahseli rohng kehlail ehu me pali tohto en aramas akan sohte men rong.—Wadek Esekiel 2:8–3:4, 7-9.
7 Kaudiahl wet kin wia mehn kasukuhl kesempwal ehu ong sapwellimen Koht ladu kan rahnwet. Kitail pil weuwa rohng kehlail ehu ong aramas akan me sohte kin kalahnganki atail kin nannanti. Pwe kitail en doulahte kilangwohng doadoahk en kalohk wet me Kristian kan kin wia nin duwen pwais kaselel ehu sang rehn Koht, kitail anahne en pousehlahte wadek oh onop mahsen en Koht. Koasoandi en onop me sohte kin kalapw wiawi sohte pahn itar ong kitail en audaudkihda ni unsek sapwellimen Koht Mahsen. Ke kak kamwahwihala irair en ahmw onop de kin kaukaule wia pein omw wadawad en Paipel oh pil onop en Paipel? Ke kak kalaudehla ahnsou en ahmw doudouloale dahme ke kin wadek?—Mel. 1:2, 3.
Tepiada Koasoia nan Paipel
8. Soangen wiepe dahieu me sewesehier ekei sounkalohk en Wehio kan en tepiada koasoia nan Paipel nan kalohk en ihmw lel ihmw?
8 Ong pali laud en sounkalohk kan, dahme kin keieu apwal ong irail nan doadoahk en kalohk ihmw lel ihmw iei en tepiada koasoiong tohnihmwo. Mehlel, nan ekei wasahn kalohk e kin apwal en tepida koasoakoasoi ong meteikan. Ekei sounkalohk kan kin mengeiki koasoiong aramas akan ni arail wenihmw kan ma irail kin pilada ni keneinei ekei lepin koasoi kan me irail kaunopadahr en doadoahngki mwohn irail pahn kihla tract rehn tohnihmwo, duwehte me kileledi nan koakon me mih pah. Oaralap en tract de pil soahng soangen kilel kaselel kan en tract pwukat kakete kamwakidada tohnihmwo en men kilang, eri met kak mweidohng kitail en kawehwehda kahrepen atail kohla ni imwarail kan oh pil idek ehu peidek. Pil ehu soangen wiepe iei en kasalehiong tohnihmwo tract siluh de pahieu me sohte duwepenehte oh luke ih en pilada mehnia me e pahn perenki wadek. Ei mehlel, kaidehn atail mehn akadei iei en ihte kihla tract kan de doadoahngki tract kan ni wenihmw koaros ahpw atail mehn akadei iei en tepida koasoia nan Paipel me kak kahluwalahng onop en Paipel kan.
9. Dahme kahrehda e kesempwal en kin kaunopada mwahu?
9 Sohte lipilipil mehnia elen koasoi me ke doadoahngki, en kaunopada mwahu pahn sewese iuk en kin soanamwahu ni omw en koasoi oh pil kin perenki doadoahk en kalohk ihmw lel ihmw. Emen pioneer kasalehda: “Ei peren kin inenen laud ma I kin kaunopada mwahu. Met kahrehda I kin men koasoiong aramas akan oh doadoahngki dahme I kaunopadahr.” Pil emen pioneer koasoia, “Ma I kin esehla audepen pwuhk kan me I pahn kihla, met kin kahrehda I en perenki doadoahngki pwuhk pwukat.” Mehnda ma mie kamwahu en kin kousapahlih dahme ke pahn nda nan ahmw madamadau, me tohto kin diarada me e kin wia sawas laud ehu en kamwomwada dahme irail pahn nda ni ngihl laud. En wia met kin sewese irail en kihong Siohwa uwen me re kak koaros.—Kol. 3:23; 2 Tim. 2:15.
10. Dahme kak wiawi pwehn kahrehiong mihding en tuhpenehn kalohk kan en katapan oh pil wia kamwahu ong koaros?
10 Ma mihding en tuhpenehn kalohk kan kin kaunopada mwahu, met kin sewese laud peren oh pweida mwahu en doadoahk en kalohk ihmw lel ihmw. Ma iren rahno kin pidada doadoahk en kalohk, ele e anahne en wadawad oh pil ni mwotomwot koasoiapene ekis. Ahpw, brother me pahn apwalih mihding en tuhpenehn kalohk wet anahne en kihong ahnsou me konehng pwehn koasoia de kamwomwada ni mwotomwot ehu iren padahk me kak kadoadoahk ong kalohk en rahno. Met pahn kaunopada irail akan me iang mih mwo en kak koahiek nan arail doadoahk en kalohk rahno. Elder kan oh pil meteikan me kin apwalih tuhpene en kalohk kak kapwaiada met oh pil kaimwisekla tuhpene en kalohk ni ahnsou me koasoandier ma irail pahn kaunopada mwahu mwohn rahno.—Rom 12:8.
Dahme Kitail Kak Wia Sang Atail en Rong Mwahu
11, 12. Iaduwen en kin rong ni elen kadek kak sewese kitail en kamwakid aramas akan duwen rongamwahwo? Kihda karasepe kan.
11 Kaidehn sangete atail en kaunopada mwahu ahpw pil atail en uhdahn kasalehda nsenohki meteikan pahn sewese kitail en tepiada koasoia iren Paipel kan oh sair mohngiong en aramas akan nan atail doadoahk en kalohk. Ehu ahl me kitail en kasalehda soangen nsenoh wet iei ni atail en kin rong mwahu. Sounapwalih en mwemweit men kasalehda: “En kanengamah oh kasalehda irair en men rong mwahu kin wia sawas laud ehu en kahrehiong aramas akan en men rong duwen rongamwahu wet oh pil wia kasalepe kaselel ehu duwen atail kin uhdahn nsenohkin irail.” En kin rong ni elen kadek kak wia kih ehu me pahn ritingada mohngiong en tohnihmwo, duwehte ekspiriens wet pahn kasalehda.
12 Nan kisinlikou ehu me ntingdi ong aramas emen ahpw wehi pokon kak wadek nan nuhs en Le Progrès, en Saint-Étienne, lihen France men koasoiahda duwen mwemweit en aramas riemen me kohla letelet ni eh wenihmwo mwurinte eh pahtoukihla mehlel mehlahn nah serepein me sounpwongte siluh. E ntingihdi: “I mwadangete kasawihada me ira Sounkadehdehn Siohwa kan. I kaunopadahr pwe I en ndahng ira ni kadek en kohkohla, ahpw I tehkada ehu brochure me ira weuwa. E kin pid duwen dahme kahrehda Koht mweidohng lokolok en mie. Ngehi eri luke ira en pidelong ahpw I medemedewehte me I pahn kasohwe ara pahn padahk ong ie. . . . Sounkadehde riemenet mihmi daulih awa ehu. Ira kin uhdahn rongorong ie ni elen kadek, oh ni ahnsou me ira pahn kohkohla, I uhdahn nsenamwahula oh eri pwungkihda ira en pwuredo.” (Rom 12:15) Ekis mwuri, lih menet tepida onop Paipel. E wia mehn kasukuhl ehu ong kitail duwen en lih menet kin tamatamante duwen tepin arail tuhpene, kaidehn duwen dahme Sounkadehde pwukat koasoia, ahpw duwen ara kin uhdahn rongorong ih.
13. Iaduwen kitail kak en wekid mwomwen atail padahk kan duwen rongamwahwo pwehn pahrekiong anahn en aramas akan me kitail kin tuhwong?
13 Ni atail kin rongorong ni elen kadek, kitail kin ni mehlel mweidohng aramas akan en ndaiong kitail dahme kahrehda irail anahnehki Wehio. Met kihda ahl mwahu ehu ong kitail en ehukihong irail duwen rongamwahwo. Mwein ke kin tehkada me irail akan me kin koahiek en kalohk kin kalapw wia aramas kei me kin koahiek en rongorong. (Lep. Pad. 20:5) Irail kin kasalehda nsenoh mehlel ong aramas akan me irail tuhwong nan kalohk. Irail kin ntingihdi kaidehn ihte eden tohnihmw akan de wasa me irail kousoan ie ahpw pil dahme aramas ko kin perenki oh pil duwen arail anahn akan. Ni ahnsou me emen kin kasalehda iren kapwunod ehu, irail kin wia roporop oh kin mwadang en pwurala oh ehukihong irail dahme irail diarada. Duwehte wahnpoaron Pohl, irail kin kawekiong mwomwen arail padahk duwen Wehio en pahrekiong anahn en emenemen aramas me irail kin tuhwong. (Wadek 1 Korint 9:19-23.) Soangen kasalepen nsenoh mehlel wet kin kahrehda aramas akan en men rong duwen rongamwahwo oh kin kasalehda mwahu duwen “atail Koht me kupwurkalahngan oh kadek.”—Luk 1:78.
En Kolokol Irair en Madamadau me Kitail Pahn Pweida
14. Iaduwen kitail kak kasalehda sapwellimen Siohwa irair akan nan atail doadoahk en kalohk?
14 Siohwa ketin kasalehdahr me e kin ketin kesempwalki emenemen kitail ni eh ketikihong kitail saledek en wiahda pilipil kan. Mendahki e wia Koht Lapalap emen, e sohte ketin idingkihong emenemen en kin papah ih ahpw pwehki limpoak, e ketin kupwur kadek ong aramas akan, kapaiada irail akan me kin mwekidki ni kalahngan sapwellime kisakis sapan kan. (Rom 2:4) Nin duwen sapwellime sounpapah kan, ahnsou koaros me kitail pahn kalohk kitail en kin onopada pwehn kadehde duwen rongamwahwo ni ahl ehu me pahn warohng atail Koht me ketin kalahngan. (2 Kor. 5:20, 21; 6:3-6) Pwehn wia met, kitail anahne en kolokol irair en madamadau me kitail pahn uhdahn pweida nan atail doadoahk en kalohk ong aramas akan nan atail wasahn kalohk. Dahme kak sewese kitail?
15. (a) Dahme Sises ketin padahkihong sapwellime wahnpoaron kan en wia ma aramas akan kahng rong irail? (b) Dahme kak sewese kitail en medemedewehte iaduwen kitail en rapahkihda irail kan me men kasamwo kitail?
15 Sises ketin padahkihong sapwellime tohnpadahk kan irail en dehr nohn kin nsenohki ma ekei kin sohte men rong rongamwahu wet ahpw en kin medemedewehte iaduwen irail en rapahkihda irail kan me pahn men kasamwo irail. (Wadek Madiu 10:11-15.) En wiahda mehn akadei kan me tikitik de me kitail kakohng pahn sewese kitail en wia met. Emen brother kin karasahiong ih duwehte soun rapahki kohl men. Eh iren mehn akadei iei, “I kin kasik me I pahn diar kohl rahnwet.” Emen brother ahneki mehn akadei en “tuhwong aramas kadek men nan ehuehu wihk me kin men rong oh en pwurala rahn keite mwuhr pwehn sewese kakairada eh irair en men rong.” Ekei sounkalohk kan kin nantihong en ehukihong tohnihmw kan ehu de riau iren Paipel kan ma irail kak. Ke kak koasoanehdi ehu mehn akadei me ke leme ke kakohng?
16. Kahrepe dah kan me kitail ahneki pwehn doulahte kalokalohk?
16 Pweidahn doadoahk en kalohk ihmw lel ihmw sohte kin ihte poahsoanda sang mwomwen aramas kan nan wasahn kalohko ma irail kin mwekidki de soh. Mehlel, doadoahk en kalohk kin wia mehkot inenen kesempwal ong me pid komouralahn me loallamwahu oh mehlel kan, ahpw e pil kin pidada kahrepe kesempwal teikan. Doadoahk en Kristian wet kin kihong kitail ahnsou mwahu en kasalehda atail limpoak ong Siohwa. (1 Sohn 5:3) E kasohwe atail pepehm me kitail pwukoahki mour en meteikan. (Wiewia 20:26, 27) E panawihekin irail akan me sehse Koht duwen “e lelehr ahnsoun eh pahn ketin kadeikada tohn sampah kan.” (Kaud. 14:6, 7) Laudsang mepwukat koaros, sampah pwon kin kapikapinga mwaren Siohwa pwehki doadoahk en kalohk wet. (Mel. 113:3) Eri, mendahki ma aramas kin rong de soh, kitail anahne en doulahte kalokalohki duwen rongamwahu en Wehio. Ni mehlel, atail eimah en kalohki rongamwahu wet kin wia mehkot inenen kaselel mwohn silangin Siohwa.—Rom 10:13-15.
17. Dahme aramas akan pahn anahne en pohnese ni ahnsou keren?
17 Mendahki pali laud kin sohte nsenohki atail doadoahk en kalohk, ahnsou keren arail madamadau duwen met pahn wekila. (Mad. 24:37-39) Siohwa ketin kamehlelehiong Esekiel me ni ahnsou me kadeik kan me e ketin mahsanihier pahn pweida, irail mehn Israel kahngohdi kan pahn “ese me soukohp men miher nanpwungarail.” (Esek. 2:5) Pil duwehte, ahnsou me Koht pahn ketin kadeikada koasoandi wet, aramas akan pahn uhdahn pohnese me rongamwahu wet me Sounkadehdehn Siohwa kan kin kalokalohki ong wehi pokon sang ihmw lel ihmw iei rohng ehu me uhdahn pwilisang rehn Koht, Siohwa, oh met pil pahn kasalehda me Sounkadehde pwukat kin ni mehlel wia sapwellime wiliepe kei. Ia uwen met wia pwais kaselel ehu en kadehdehda duwen mware oh kin pakpakairki sapwellime rongamwahu nan soangen ahnsou pwukat! Ki sapwellime sawas, kitail en doulahte oh powehdi soangen kahpwal kan nan doadoahk en kalohk ihmw lel ihmw.
Iaduwen Ke Pahn Sapeng?
• Iaduwen kitail kak kakehleikitailda pwehn kak kalohk?
• Dahme kak sewese kitail en tepida koasoia nan Paipel nan doadoahk en kalohk ihmw lel ihmw?
• Iaduwen kitail kak kasalehda me kitail kin uhdahn nsenohki dahme meteikan kin nsenohki?
• Dahme kak sewese kitail en kolokol irair en madamadau me kitail pahn pweida nan atail wasahn kalohk rehn aramas akan?
[Box/Kawehwehpen kilel kan nan ehu ehu pali 15]
Ehu Ahl en Tepiada Koasoia nan Paipel
Pwehn tepiada:
◼ Mwurin ahmw pahn rahnmwahwih tohnihmwo, ke kak kihong ih ehu tract oh nda, “Kahrepen ei leledo rahnwet iei en ehukihong uhk ehu iren kamweit duwen ire kesempwal wet.”
◼ De mwein ke kak kasalehiong ih tract oh nda, “Rahnwet I mwemweitdo wasaht ahnsou mwotomwotte pwe I men ese ia omw madamadau ong ire wet.”
Ma irail pahn perenki ale tract wet:
◼ Uhdi ekis, kowe eri idek rehn tohnihmwo ehu peidek mengei me pahn kasalehda eh madamadau ong duwen oaralap en tracto.
◼ Rong kanahieng, nantihong en wehwehki mwahu ahn tohnihmwo pahn kasalehda eh madamadau. Kalahnganki eh iren madamadau oh pil medemedewe omw en doadoahngki dahme e nda nan ahmw kin koasoakoasoi ong ih.
En pousehlahte koasokosoi ong tohnihmwo:
◼ Wadek oh pil koasoia ehu de riau iren Paipel kan, wia ahmw koasoi en pahrekiong dahme tohnihmwo kin nsenohki?
◼ Ma e sansal me tohnihmwo kin perenki, kasalehiong ih ehu pwuhk me wia sawaspen Paipel oh kamwomwada ia mwomwen en kin onopki Paipel ma kak. Koasoanehdi en pwurala reh.