Ke Kin Eimah Ni Ahnsou Me Ke Kin Kalohk?
1 Mendahki ma aramas akan kin uhwong Piter oh Sohn oh pil parokedi ira, re kin nantihong kalohki Rongamwahu en Wehio ni eimah. (Wiewia 4:17, 21, 31) Ahpw, iaduwen kitail pahn kak kalohk ni eimah rahnwet?
2 Kalohk Ni Eimah: “Eimah” kin wehwehki “sohte masak aramas, nannanti mendahki uhwong oh pil dadaur.” Ong kitail Kristian mehlel akan, kalohk ni eimah kin wehwehki me kitail sohte pahn masak kalohk ong aramas ahnsou koaros oh ehukihong irail duwen Rongamwahuwo. (Wiewia 4:20; 1 Pit. 3:15) E kin wehwehki me kitail sohte kin namenengki Rongamwahuwo. (Mel. 119:46; Rom 1:16; 2 Tim. 1:8) Ihme kahrehda, eimah kin wia irair ehu me anahn ma kitail pahn kapwaiada kupwuren Koht me pid kehkehlik en kalohki Rongamwahu en Wehin Koht nan imwin rahn pwukat. E pahn kamwekid kitail en ehukihong aramas koaros wasa koaros duwen Rongamwahuwo.—Wiewia 4:29; 1 Kor. 9:23.
3 Eimah Kalohk Nan Sukuhl: Ke kin apwaliki kalohk ong iengomw tohnsukuhl akan pwehki ke kin namenek de masepwehk? Ekei pak, e sohte pahn mengei; ni mehlel, e kin apwal. Ahpw, Siohwa pahn kakehlail uhk ma ke pahn kapakapki eimah pwe ken kak kalohk ong meteikan. (Mel. 138:3) Ma ke kin kalohk ni eimah, e pahn mengei ong uhk en kasalehong meteikan me kowe emen Sounkadehdehn Siohwa kan oh ke pahn kak dadaurete mendahki uhwong. Pwehki ahmw eimah kalohk, ke kak sewese irail me rong uhk nan sukuhl en ale komourparail.—1 Tim. 4:16.
4 Eimah Kalohk Ni Wasahn Doadoahk: Iengomw tohndoadoahk kan kin ese me kowe emen Sounkadehdehn Siohwa kan? Mwein ihte ahl me iengomw tohndoadoahk kan pahn rong duwen Rongamwahu en Wehio ma ke pahn kalohk ong irail. Ahmw eimah kalohk pahn kakete sewese iuk en idek rehn ahmw kaun en doadoahk ma ke kak kommoal sang doadoahk pwe ken iang towehda mihding kan oh kapokon kan.
5 Eimah Mendahki Lokolok: Kitail anahne eimah ma kitail pahn kak dadaurete mendahki uhwong de lokolok. (1 Deselonika 2:1, 2) E kin sewese kitail en kolokolete atail pwoson mendahki aramas kin kauwe, uhwong de kaloke kitail. (Pilipai 1:27, 28) E kin kakehlail kitail pwe kitail en kesihnenda teng oh kapwaiada kosonned en Siohwa Koht mendahki kasongosong kan oh uhwong kan kin lelohng kitail. E kin kakehlail kitail en ahneki popohl rehn aramas koaros ahnsou me aramas akan kin men akamai ong kitail.—Rom 12:18.
6 Sohte lipilipil kahpwal akan me kitail kin lelohng, kitail en nantihong eimah ni atail pahn kalohki Rongamwahuwo.—Episos 6:18-20.