Kitail en Eimah Kalohki Mahsen en Koht
1 Nin duwen Kristian sounkalohk, kitail ese me kaidehn aramas koaros pahn perenki rong atail padahk kan. (Mad. 10:14) Ahpw, mendahki met, kitail sohte men uhdi sang kalohki Rongamwahuo. (Lep. Pad. 29:25) Dahme kin sewese kitail en kalohki Mahsen en Koht ni eimah?
2 Wahnpoaron Pohl wehwehki duwen “soahngteieu me inenen katapan oh kesempwal iei marain en Krais Sises.” Met kin kamwekid ih en kalohk “ni ah kamehlele unsek me mehlelo.” (Pil. 3:8; 1 Dese. 1:5) Edetehn ekei aramas kin kilangwong ah doadoahk nin duwen doadoahk pweipwei ieu, Pohl wehwehki me “manaman en Koht me kin komourala koaros me kin pwoson, mehn Suhs mahs, oh pil mehn liki kan.” (Rom 1:16) Ihme kahrehda, ni ahnsou me e kin lelong uhwong kan, e kin pousehla “padahngki duwen sapwellimen Siohwa kalahngan me mehlel oh pwung.”—Wie. 14:1-7; 20:18-21, 24.
3 Utupen Atail Kehl: Pohl kin kak kalohk ni eimah, ahpw e sohte kin wia met sang pein ah kehl. Pohl koasoia duwen pein ih oh Sailas ni e ntingihdi: “Kumwail pil ese duwen at ale kalokolok oh mwamwahllahr nan Pilipai mwohn at pwarowohng kumwail. Eri, atail Koht ketin kakehlaikitada pwe se en padahkihong kumwail Rongamwahwo me pwarodo sang reh, mehnda ma se diarada apwal laud.” (1 Dese. 2:2; Wie. 16:12, 37) Oh pil ni ahnsou Pohl selidi nan Rom, e peki rehn meteikan en kapakapki ih pwe en sewese ih en pousehla kalohki Rongamwahu ‘pwe en kehlail padahk duwen Rongamwahu.’ (Epi. 6:18-20) Pwehki Pohl sohte kin likih pein ih ahpw e kin likih Siohwa, met kin sewese ih en pousehla kalohki Mahsen en Koht ni eimah..—2 Kor. 4:7; Pil. 4:13.
4 Met kak pil wiawi rahnwet. Emen brother me kin apwaliki kalohk ong ienge tohndoadoahk kan ndaiong irail me e kin wia emen Sounkadehdehn Siohwa. Ih eri kapakap oh tepida kalohk ong irail. Emen ienge tohndoadoahk me sohte perenki rong nin tepio tepida onop Paipel ni ahnsou me e rong duwen koapworopwor en kaiasada. Pwehki dahme wiawi, brother menet sukuhliki me e anahne doadoahngki ahnsou mwahu koaros en kalohk. Ni ahnsou me e uhd doadoahk pil ehu wasa, e sewese aramas 34 en papidais erein sounpahr 14. Kitail kak likih me Siohwa pahn ketin sewese kitail en ‘kalohki sapwellime mahsen ni eimah.’—Wie. 4:29.