Sewese Mehteikan En Diarada Kamweit
1 Aramas tohto pwangahkihda rong duwen kahpwal akan, mahwin kan, mwersuwed kan, oh kalokolok kan. Mehn kamweit, me sohte kin pwarada nan nuhspepah kan en rahn pwukat, iei mehkot me aramas anahne. Mehn kamweit kin wehwehki “en kakehlail oh kihda koapwoaroapwoar” oh “katikitikla pahtou oh nsensuwed” en mehteikan. Nin duwen Sounkadehdehn Siohwa kan, kitail kaunopadaier en sewese mehteikan. (2 Kor. 1:3, 4) Neitail brochure kan me kin poahsoanda pohn Pwuhk Sarawi me kitail pahn kihla nan August oh September kin audaudki mehn kamweit sang padahk mehlel. (Rom 15:4) Iet ekei mehn sawas me kin sewese kitail en koasoiong aramas me anahne mehn kamweit:
2 Ma mie ripoht en nuhs me koasoia me kahpwal laud wiawi, met pahn kihong kitail mehkot en koasoiaiong mehteikan oh kihda mehn kamweit, kitail kak nda:
◼ “Ni ahnsou me kahpwal pwukat kin pwarada, ekei kin wahpwonki ma mie Koht oh, ma mie, ma Koht kin nsenohki kitail. Dahme ke medemedewe? [Mweidong en sapeng.] Ehu ahl me kitail kak wehwehki ma mie Koht iei en kasawihada sampah wet.” Wadek Rom 1:20. Kasalehda ekei kapikapikda kan me kin kasansalehda sapwellimen Koht erpit oh limpoak. Mwurin mwo, ke kak pousehla oh nda: “Mie neit brochure me I ese me ke pahn diarada sang ie mehn kamweit. Eden brochure wet iei Dahme Koht Kupwurki Kitail en Wia? [Wadek ekei oaralap en irelaud kan sang audepen brochure.] Brochure wet kin kasalehda, kaidehn ihte me mie Koht, ahpw me e pahn kerenieng kasohrala irair kopwung sapwung kan me kitail kilang rahnwet. Ke men wadek brochure wet?” Koasoanehdi ahnsou me ke kak pwurehng pwurala rehn aramaso.
3 Ahnsou me ke pahn pwurehng pwurala, ke kak nda:
◼ “Kitail koasoipene duwen mehn kamehlele ma mie Koht ahnsou me I kohdo oh kihong uhk brochure Dahme Koht Kupwurki Kitail en Wia? Mwein ke pil tehk Iren Mehn Kasukuhl 5, ‘Ia Kupwuren Koht ong Sampah?’ [Kasalehda kilel kan ni pali 11.] Met kin kasalehda me Koht limpoak men mie. [Wadek parakrap 7.] Pein ahi onop Paipel kin sewese ie en powehdi kahpwal kan en mour me kin lelong kitail rahn koaros pwehki e pahn sewese kitail en ese sapwellimen Koht madamadau kan.” Padahkiong tohnihmwo me ke kak kamwomwada onop en Paipel.
4 Ke kak kalohk ni ahmw doadoahngki telephone oh doadoahngki brochure “Look! I Am Making All Things New.” Ke kak nda:
◼ “I ekerkin komwi mehkot kesempwal pwehki I sohte kak tuhwong komwi ni imwomw.” Oaralapiehda keieun parakrap ni pali 3 en brochure, oh wia met duwehte me ke pahn wia ni ahnsou ke uhdahn pahn tuhwong ih. Idek rehn tohnihmwo dahme e kin medemedewe, oh mweidong ih en sapeng. “I pakpesengehr nei Pwuhk Sarawi ong nan Aiseia 45:18. Ire wet kin kasalehda me Koht kapikada sampah pwe aramas en kousoanla loale. I kak wadek ong komwi ire wet?” Mwurin mwo, kawehwe kahrepen brochure, oh idek reh iaduwen kumwa pahn pwurehng tuhpene pwe ken kak kihong ih nah brochure.
5 Ni ahnsou me ke pwurehng dengwa tohnihmwo, ke kak song en tepiada onop en Paipel ni ahmw pahn nda:
◼ “I men kalaudehla dahme kita koasoipene rahn teio oh kasalehda karasaras ehu me pahn padahkiong kitail kahrepen mour. [Oaralapiehda parakrap 12 oh 13 ni pali 8 en Look! brochure.] Kaudiahl 4:11 kin kawehwe me Siohwa Koht iei atail Sounkapikada. [Wadek.] E sansal me mie kahrepe E kapingkihda kitail. Aramas me men ese kahrepeo kin onopki sapwellimen Koht Mahsen, Pwuhk Sarawi. I men ken pil onopki Pwuhk Sarawi.” Kawehwehda iaduwen kitail kin wia onop en Paipel, oh koasoanehdi rehn tohnihmw iahd kumwa pahn tepiada onop en Paipel.
6 Ma ke tuhwong emen me anahne mehn kamweit pwe emen eh peneinei de kompoakparail mehla, ke kak nda:
◼ “Se kin wia doadoahk ong wehi pokon oh men tuhwong irail kan me arail peneinei de kompoakparail mehla. Pwehki irair wet mwein ele irair me keieu apwal en powehdi, brochure me adaneki Paieki Mour Sampah Kohkohlahte! kin kihda mehn kamweit. E seweseiehr aramas rar rar kei. I men kasalehong komwi mehkot Sises Krais mahsanih. [Wadek dahme ntingihdi limwahn kilel 48, iangahki Sohn 5:28, 29.] Tehk kilelo pwe e kin kasalehda inou en Paipel me ahnsou ehu pahn kohdo me irail kan me kitail kin poakpoake me mehla pahn iasada sang mehla. Ma ke men wadek brochure wet, I pahn perenki kihdi noumw.”
7 Ahnsou me ke pahn pwurehng pwurala, ke pahn pwurehng kasalehda kilel 48 nan brochure “Paieki Mour Sampah Kohkohlahte!” oh ke kak nda:
◼ “Rahn teio, ahnsou me kita koasoipene, kita kilang dahme Pwuhk Sarawi mahsanih duwen kaiasada. [Pwurehng wadek nting limwahn kilel 48.] I men kasalehong komwi pil ehu iren Paipel me pahn sewese kitail en kamehlele inou wet. [Wadek Sohn 11:25.] Ma ke kasikasik en pwurehng tuhwong ahmw peneinei de kompoakpahmw me mehla, I kak sewese komwi en kilang iaduwen koapwoaroapwoar wet uhdahn pahn pweida.” Koasoanehdi onop en Paipel rehn tohnihmwo.
8 Kitail anahne wia uwen me kitail kak nan sounpwong kohkohdo kan en kalimengih Sises ni eh kin ‘koaloalamwahwihala koaros me pahtou kan.’—Aiseia 61:2.