Me Mah Kan Kin Kalohk oh Sohte Uhdi
1 Ni ahnsou me aramas kin mahla, pali moron en irail kin kasikasik arail sohlahr pahn doadoahk en mwohni oh irail kak kommoal sang ahnsouo kohkohla. Irail kin medemedewe me irail doadoahk laudehr oh irail anahne ahnsou en kommoal. De irail men wia nsenarail oh wia dahme re mwahuki ong arail mour, dahme me luhwe.—Luk 12:19.
2 Ahpw, ong sapwellimen Siohwa ladu kan me inoukihdahr atail mour, atail madamadau ong mour kin weksang ahn mehteikan. Kitail wehwehki me kitail sohte kin kommoal sang atail papah Koht. Atail koapwoaroapwoar inenen mwahu pwe kitail kin kasikasik “mour soutuk.” (Sud 21) Pwehki kitail kin nantiong audaudki loalokong pwung oh koahiekla ni pali ngehn, met kin sewese emen en anehki erpit. Soahng pwukat pahn sewese emen en anehki erpit laud sang mahs oh tohpahrek laud sang mahs oh kasalehda kalahnganki mour laud sang mahs. Irair pwukat kin inenen kesempwal ong emen sounkalohk en rongamwahu.
3 Ahnsou me emen kin mahla, met sohte kin ihte wehwehki mahla ni paliwar, ahpw e pil kin pid koahiekla ni madamadau. Ma ke kin kasikasik en mour werei oh ke men anehki madamadau mwahu ong soahng koaros, ke kak wia soahng pwukat koaros. Me mah kan kak nsenamwahu nan arail mour ma re pahn kalaudehla arail loalokong pwung oh ehukihong mehteikan soahng pwukat.—1 Kor. 9:23.
4 Karasepe Mehlel kan: Emen sister me mahki sounpahr 86 koasoia: “Ni ahnsou me I kin medemedewe duwen ahi mihmiki nan padahk mehlel erein sounpahr 60, I kin tamatamante inou kan en Siohwa. Ei, Siohwa, me kin loalopwoatohng irail me kin loalopwoatohng Ih, kin kihong kitail peren mwuledek.” (Melkahka 18:25) Emen brother mah kin tamanda ia uwen mehlahn ah pwoudo kin wia mehkot pwuriamwei ong ih oh ihme eh roson en paliwar tepida kohkohdi mwadang. E koasoia: “Pwehki sapwellimen Siohwa kadek, I mwahula sang ahi soumwahu oh mwurin sounpahr riau, I kakehr iang doadoahk en pioneer. I kin kalahngan ong Siohwa pwehki I kehlailda ni paliwar ni ahi kalaudehla ahi awahn kalohk!”
5 Kaping en kohwong me mah tohto me kin wia uwen me irail kak nin duwen arail roson oh kehl oh kin nannanti en iang kalohk—oh sohte kin uhdisang! Mie arail kahrepe mwahu en lohki: “Komw ketin padahkihieier sang ni ei tikitik, oh lel met I pil lohlohkiseli sapwellimomwi wiewia kapwuriamwei kan.”—Melkahka 71:17.