Siohwa Kin Ketin Apwalih Ni Keneinei Sapwellime Sounpapah Mahlahr Akan
“Koht me uhdahn pwung; e sohte pahn ketin meliehla amwail wiewia kan de amwail limpoak ong ih.”—IPRU 6:10.
1, 2. (a) Ni atail kin kilang emen me moangepwetalahr, dahme met kin katamandohng kitail? (b) Iaduwen Siohwa kin ketin kilangwohng Kristian mah kan?
NI AHMW kin kilang me mah kan nan mwomwohdiso me moangepwetalahr, e sou kin katamandohng uhk dahme wiawi nan pwuhken Daniel nan Paipel? Nan kasansal me E ketikihong Daniel, Siohwa Koht kin ketin kasansalehda ih nin duwen emen me moangepwetalahr. Daniel ntingihdi: “Nindokon ei kilikilang mepwukat, mwoahl ekei wie koasoakoasoansoan. Oh Mehmeno me ahneki mour poatopoat ket nan ehu mwoahl pwukat. Sapwellime likou me pwetepwet duwehte sinoh, oh pitenmoange kan rasehng wunen sihpw mwakelekel.”—Dan. 7:9.
2 Ma ke pahn kilang wunen sihpw, e kin poh pwetepwet mwakelekel. Ihme kahrehda, pitenmoang pwetepwet mwakelekel oh pil mwar wet “Mehmeno me ahneki mour poatopoat” kin kasalehda duwen mehlelpen sapwellime erpit lapalap. E konehng kitail en wauneki met. Eri iaduwen Siohwa, me sapwellimanki mour poatopoat kin ketin kilangwohng irail ohl oh lih lelepek mahla kan? Sapwellimen Koht Mahsen mahsanih me “mour werei iei ketingpen pwung; moangepwet iei kapwat lingan ehu.” (Lep. Pad. 16:31) Ei, ni emen Kristian lelepek kin moangepwetla, e kin wia mehkot lingan mwohn silangin Koht. Ke kin kilangwohng riomw Kristian me mah kan nin duwen Siohwa ketin kilangwohng irail?
Dahme Kahrehda Irail Inenen Kesempwal?
3. Dahme kahrehda kitail kin kesempwalki iengetail me mahlahr kan nan pwoson?
3 Nanpwungen irail ladu en Koht mahlahr kan iei irail pwihn en Governing Body en Sounkadehdehn Siohwa kan, sounapwalih en district oh circuit kan nan rahnpwukat oh pil mehn mwowe kan, pioneer ngoang kan, oh pil sounkalohk en Wehio kan—brother oh sister kan me kin ni lelepek papah nan atail mwomwohdiso. Mwein ke ese emen me kin kalohki rongamwahwo ni eimah ki erein sounpar tohto me arail mehn kahlemeng kan kin sewese kamwakid me pwulopwul akan en kawekila arail mour. Ekei kisehtail nan pwoson me mahlahr kin pil pwukoahki wisik toutou kan oh re kin dadaur mendahki kalokolok kan pwehki rongamwahwo. Siohwa oh “ladu lelepek oh loalokong” kan kin inenen kalahnganki sawas koaros me irail kin toukihda ong doadoahk en Wehio nan ahnsou pwukat oh pil ahnsou kan mwowe.—Luke 12:42.
4. Dahme kahrehda kitail en wauneki Kristian mah kan oh pil kin kapakapki irail?
4 Me mah lelepek pwukat uhdahn warohng ale kalahngan oh pil wahu sang ladu en Siohwa Koht teikan. Ni mehlel, sapwellimen Koht Kosonned me e ketikihong Moses kin kadokepene nsenoh oh wahu ong me mah kan oh arail pahn kin lemmwiki Siohwa. (Lip. 19:32) Kitail en kin kaukaule kapakapki irail me lelepek pwukat oh kin kalahngankihong Koht pwehki arail limpoak me kahrehiong irail en kin doadoahk laud. Wahnpoaron Pohl kin kapakapki ienge tohndoadoahk kompoake kan, me pwulopwul oh pil me mah kan.—Wadek 1 Deselonika 1:2, 3.
5. Iaduwen kitail kak paiekihda atail en miniminiong sounkaudok lelepek en Siohwa me mah kan?
5 Patehng met, koaros nan mwomwohdiso kak en paiekihda arail miniminiong Kristian mah kan. Sang arail kin onop, tetehk dahme kin wiawi, oh pil soangsoangen irair akan me re kin lelohng nan mour, sounkaudok lelepek en Siohwa mah pwukat alehdier loalokong me inenen laud oh kesempwal. Irail esehla kanengamah oh kin wehwehki pepehm en meteikan. Oh en padahkihong dih en mwuhr kan dahme irail sukuhlikihdier kin wahdohng irail peren oh nsenamwahu laud. (Mel. 71:18) Kumwail me pwulopwul kan, kumwail en ahneki erpit oh isaneki alehda soangen utupen loalokong pwukat duwehte ahmw kin idipada pihl nan pwarer loal ehu.—Lep. Pad. 20:5.
6. Iaduwen ke kak kasalehiong me mah kan me ke kin uhdahn kesempwalkin irail?
6 Ke kin kasalehiong irail me mah kan me ke kin kesempwalkin irail duwehte ahn Siohwa kin ketin kesempwalkin irail? Ehu ahl me ke kak wia met iei en padahkihong irail ia uwen ahmw kin poakohng irail pwehki arail lelepek oh ke kin inenen kalahnganki arail iren madamadau kan. Patehng met, ni ahmw kin kapwaiada dahme ke sukuhlikihsang irail, ke kin kasalehda me ahmw wauneki irail kin uhdahn mehlel. Kristian mah tohto kin kak tamanda soangen kaweid erpit kan me irail alehsang me mah lelepek en mahs akan oh iaduwen arail kin kapwaiada kaweid pwukat kin wahdo kamwahu laud nan arail mour.a
En Kasalehda Pepehm ni Ahl me Konehng
7. Ihs me Siohwa ketin kapwukoahki en apwalih me mah kan?
7 Koht ketikihong peneinei en me mah kan en kin keieu pwukoahki apwalih irail. (Wadek 1 Timoty 5:4, 8.) Siohwa kin ketin kupwurki ma peneinei ehu kin kapwaiada arail pwukoa en apwalih arail peneinei mah kan oh kasalehda me re kin nsenohki irail duwehte Siohwa kin ketin nsenohki me mah kan. Koht kin ketin utung soangen peneinei pwukat oh kin ketin kapaiada arail kin nannanti oh pil arail tounmetei laud.b
8. Dahme kahrehda mwomwohdiso kan anahne en kasalehda arail nsenohki Kristian mah kan?
8 Pil duwehte, Siohwa ketin kupwurki ni en mwomwohdiso kan kin sewese me mah lelepek kan me kin anahne sawas ahpw sohte emen sang arail peneinei wie kiseh nan pwoson de pil men apwalih irail. (1 Tim. 5:3, 5, 9, 10) Mwomwohdiso kan kin kasalehda me irail kin ahneki ‘soangen lamalamteieu oh kupwurteieu; limpoakpene nin duwen Kristian, oh kin kadek’ ong irail me mah kan. (1 Pit. 3:8) Arail kin nsenohki me mah kan nan mwomwohdiso kin rasehng dahme Pohl koasoia ni eh kasalehda me ma ehu kakon en war kin medekla, “kakon koaros kin iang medekla.” (1 Kor. 12:26) Eri en kin wia mehkan ni ahl me konehng oh ni elen poakehla ong me mah kan kin kasansalehda mour en kaweid me Pohl kin kaweidki: “Kumwail sawaskipene amwail wisik toutou kan, pwe ih duwen amwail pahn kapwaiada kosonned en Krais.”—Kal. 6:2.
9. Soangen iren kapwunod dah kan me kak lelohng me mah men?
9 Soangen iren kapwunod dah kan me irail me mah kan kin ahneki? Pali laud en irail kin mwadang en pwangada. Ele irail kin pehm me en wia kisin doadoahk kan duwehte—kohla tuhwong toahkte, kohla pwainla arail pihl de liohl de pweipwand teikan, kamwakel nan ihmw, kaunopada mwenge—kin wia mehkan me nohn laud ong irail. Pwehki arail irair en men mwenge de nim kin tikitikla ni arail kin mahla, mwein irail kin leme me irail sohte anahne en kang de nim uwen dahme koasoandier irail en ale. Met pil kakete duwehte arail koasoandi en onop Paipel de koasoandi en towehda mihding kan. Pwehki irail mahlahr, ele meserail oh salengarail kan kin kahrehiong irail en apwaliki wadek de rong padahk kan nan mihding en Kristian kan, oh en kaunopadahng kohla iang mihding ele pil inenen kapwang. Eri dahme meteikan kak en wia ong me mah pwukat?
Iaduwen Ke Kak Sawas
10. Dahme elder kan kak wia pwe me mah kan kak alehdi sawas me irail anahne?
10 Nan mwomwohdiso tohto, me mah kan kin ale epwel mwahu ni ahl me kin kihda mehn kahlemeng mwahu. Brother oh sister kan kin ni limpoak sewese irail wia arail doadoahk en netinet, kaunopada kenerail mwenge, oh pil kamwakel. Irail kin sewese me mah kan en onop, kaunopada kohla mihding, oh pil sewese irail en kin kaukaule iang doadoahk en kalohk. Sounkadehde pwulopwul kan kin pil iang irail oh pil kin apwalih irail ki mehn peidaid. Ma me mah kan sohte kak en pedoi sang nan imwarail pwehki soumwahu, padahk kan kak wiawihda nan cassette pwe irail en kak rong. Ma kak, elder kan kin tehk mwahu pwe koasoandi kan en kak wiawihda ni ahl pwung pwehn kak apwalihala anahn en me mah kan nan mwomwohdiso.c
11. Kawehwehda iaduwen ehu peneinei kin sewese brother mah men.
11 Emenemen Kristian kak kihda sawas oh pil kasalehda irair en sapan. Mwurin ahn brother mah men eh pwoud mehla, nein liho sent en imwin sounpwong sohla kin kohdo reh, kahrehda e solahr kak pwain pweinen imweo. Ih oh eh pwoud kin onop Paipel rehn peneinei ehu—pahpa men, nohno men, oh neira serepein pwulopwul riemen—me imwaneki ihmw laud ehu. Irail kihong ih pere riau en kin kousoan loale. E wiahla tohnpeneinei wet, oh erein sounpar 15, irail kin kousoanpene oh ahneki soangen ahnsou kaperen tohto. Me pwulopwul ko alehdi kamwahu tohto sang ara kin sukuhliki sang reh irair en pwoson oh pil duwen eh mour, oh brothero kin pil paiekihda ara kin perenki ih. Brother mah menet kin kousoan rehrail lao e mehla ni eh mahki sounpar 89. Peneinei wet kin kalahngankihong Koht soangen kapai tohto me irail alehdi sang arail miniminiong brother menet. Irail “uhdahn pahn ale pwaise” pwehki irail sewese emen iengerail tohnpadahk en Sises Krais.—Mad. 10:42.d
12. Dahme ke kak wia pwehn kasalehda ahmw kin poakehla riatail kan me mahlahr?
12 Ele ke sohte kak sewese me mah men duwehte dahme peneinei wet wiahier, ahpw mwein ke kak sewese irail en kohla iang mihding oh pil kohla kalohk. Ke kak pil luke irail en kohdo mwemweit ni imwomwo oh kak wahla irail wasahn mwemweit kan me ke kin perenki. Ke kak mwemweitla rehrail, ahpw mehlel ahnsou kan me irail soumwahu de kin mihmihte nan imwarail. Laudsang met, ke kak oh ke pil anahne en ahnsou koaros kasalehda wahu pwehki irail aramas laud kei. Kristian mah kan anahne en pil kin kihda arail pwung en wiahda arail pilipil ong dahme pahn mwahu ong irail nin doken arail ahnekihte koahiek en madamadau. Pil irail akan me mwein sapwungalahr arail irair en madamadau kak en pehm ma re sohte kin ale wahu sang meteikan.
Siohwa Sohte Pahn Ketin Manokehla Ahmw Doadoahk
13. Dahme kahrehda e kesempwal en nsenohki pepehm en Kristian mah kan?
13 En kasalehda me ke kin nsenohki pepehm en me mah kan kin pil kesempwal. Me mah kan kin nsensuwedkihla arail solahr kak en wia soahng kan me irail kin kak wia ahnsou me irail pwulopwul oh kehlail. Karasepe ehu, emen sister papah Siohwa erein sounpar 50 nin duwen regular pioneer men ahpw tepiada ahneki soumwahu ehu me kin ekis ekis kaluwetehla ih oh kin kahrehiong ih en inenen apwaliki kohla iang towehda mihding kan. Ni eh kin medewehla eh doadoahk en kalohk en mahs oh pil ahnsou wet, e kin tepida sengiseng. E kin itiekidi oh pilen mese kan kin keredi ni eh nda: “Sohte mehkot I kak wia met.”
14. Soangen kangoang dah me sapwellimen Siohwa ladu lelepek mahla kan kak alehsang nan melkahka kan?
14 Ma kowe emen me mah, ke kin ahneki soangen pepehm pwukat? De mie pak me ke leme me mwein Siohwa ketin likidmelieiukala? Sounmelkahkao ele pil kin ahneki soangen pepehm wet ni ahnsou me e mahlahr pwehki e wiahda pekipek wet ong Siohwa: “Komw dehr ketin likidmelieiehla ni ei likeilapalahr, komw pil dehr ketin keseiehla ni ei luwetalahr. A met ni ei mahlahr oh moangepwetalahr, Maing Koht, komw dehr ketin likidmelieiehla!” (Mel. 71:9, 18) Ni mehlel, Siohwa sohte pahn ketin likidmeliehla sounnting en melkahka wet, oh E sohte pahn ketin likidmelieiukala. Nan ehu melkahka, Depit kasalehda eh kin koapworopworki sapwellimen Koht sawas. (Wadek Melkahka 68:19.) Ke kak en koapworopworki me ma kowe Kristian lelepek mahlahr men, Siohwa pahn ketin ieiang uhk oh pahn apwahpwalih iuk ehuehu rahn.
15. Dahme kak sewese me mah kan en kolokol arail madamadau me irail kak pweida?
15 Koht sohte pahn ketin manokehla wiewia kan me kumwail Sounkadehdehn Siohwa mah kan wiahdahr mahs oh pil ahnsou wet pwehn kalinganahda ih. Paipel mahsanih: “Koht me uhdahn pwung; e sohte pahn ketin meliehla amwail wiewia kan de amwail limpoak ong ih ni sawas me kumwail kasalehdahr.” (Ipru 6:10) Ihme kahrehda, dehr kakairada madamadau sapwung oh kin lemeleme me pwehki ke mahlahr, Siohwa solahr pahn kak doadoahngkin uhk. Nantihong en kihsang soangen madamadau kansensuwed kan oh wiliankihdi madamadau me ke pahn pweida nan ahmw doadoahk. Perenki kapai kan me ke kin alehdi oh pil ahmw koapworopwor en ahnsou kohkohdo. Mie “ahnsou kohkohdo kan me [kitail] kasikasik”—ahnsou me keieu mwahu—oh atail Sounkapikadao kin ketin kamehlelehiong kitail mepwukat. (Ser. 29:11, 12; Wiewia 17:31; 1 Tim. 6:19) Medemedewe duwen omw koapworopwor, kolokol nan omw mohngiong oh madamadau me ke uhdahn kak pweida oh dehr medemedewe me solahr kesempwalpen omw pahn iang towehda mihding kan!e
16. Dahme kahrehda brother mah men kin leme me e anahne en uhdihsang eh pwukoahn elder? Iaduwen pwihn en elder kan kin kangoange ih?
16 Medewehla Johan, me mahki sounpar 80 ahpw kin rahn koaros apwalih eh pwoud lelepek, Sannie, me soumwahulahr.f Sister kan kin pil iang sewese Sannie pwe Johan en kak kohla iang mihding oh pil iang kalohk. Ahpw, ahnsou kis kerendo, Johan pehm me e uhdahn pwangadahr oh kin tepida medemedewe me e anahne uhdihsang eh pwukoahn elder nan mwomwohdiso. Pilen mese kan dirda oh e idek: “Ia kahrepen ei wia emen elder? I solahr kakohng wia soangen doadoahk laud kan nan mwomwohdiso.” Ienge elder teikan eri kamehlelehiong ih me eh koahiek oh pil eh irair en madamadau toupahrek kin inenen anahn. Irail kangoange ih en pousehlahte wia elder men mehnda ma e sohla kak wia doadoahk laud. Johan inenen kehlailkihda mehn kangoang pwukat oh eri doulahte wia eh pwukoahn elder oh met kin wia kapai laud ehu ong nan arail mwomwohdiso.
Siohwa me Ketin Nsenoh
17. Mehn kamehlel dah kan me Paipel ketikihda ni sansal ong Kristian mah kan?
17 Iren Paipel kan kin kasalehda ni sansal me irail me mah kan kak en kakairada arail nanpwungmwahu rehn Siohwa mendahki kahpwal en mahla. Sounmelkahkao koasoia: “Re rasehng tuhke kan me poadidi nan tehnpas en KAUN-O . . . me kin wah mwahu ni ar mahlahr oh kin mwomwen pwulopwulte oh kehlail ahnsou koaros.” (Mel. 92:13, 14) Wahnpoaron Pohl, me mwein kin pil ahneki soumwahu en paliwar, ‘sohte kin loaltikla, mehnda ma paliwere kin luhluwetala.’—Wadek 2 Korint 4:16-18.
18. Dahme kahrehda iengetail me mahlahr akan nan pwoson oh pil irail me kin apwalih irail kin anahne sawas sang meteikan?
18 Mie kahlemeng tohto nan rahnpwukat me kin kadehdehda duwen ahn me mah kan kak en “wah mwahu ni ar mahlahr.” Ahpw kahpwal en soumwahu oh mahla kak kaluwetela irail mendahte ma mie arail peneinei me kin uhdahn nsenohki en apwalih irail. Irail me kin apwalih me mah kan ele pil kin pwangada. Mwomwohdiso ahneki pwais oh pil pwukoa kaselel ehu en kasalehda arail limpoak ong me mah kan oh pil ong irail kan me kin apwalih irail. (Kal. 6:10) Soangen sawas pwukat kin kasalehda me kitail kaidehn soangen aramas me kin ndahte irail en kohla “ni popohl oh nsenamwahu” ahpw sohte kin sewese irail ni ahl akan me konehng.—Seims 2:15-17.
19. Dahme kahrehda Kristian mah lelepek kan kak en kilangwohng ahnsou kohkohdo ki koapworopwor?
19 Mahla ele kak kawekila koasoandi en wiewia kan en emen Kristian, ahpw met sohte kin katikala sapwellimen Siohwa limpoak ong sapwellime ladu lelepek mahlahr akan. Koaros irail Kristian lelepek pwukat kin inenen kesempwal mwohn silangin Koht oh e sohte pahn ketin likidmeliehla irail. (Mel. 37:28; Ais. 46:4) Siohwa pahn ketin apwahpwalih irail erein arail mahla.—Mel. 48:14.
[Nting tikitik me mi pahs]
a Kilang artikel “Me Mah kan—Irail Wia Kapai Ehu ong me Pwulopwul kan,” nan Kahn Iroir en September 1, 2007.
b Kilang pali 3-10 en Awake! en February 8, 1994.
c Nan ekei sahpw, met kak pidada en sewese me mah kan en alehdi sawas akan me arail koperment kak kihda ong irail. Kilang artikel en “Koht Kin Ketin Kupwure Irail Aramas Mah kan,” en nan Kahn Iroir en September 1, 2006.
d Kilang artikel en “Siohwa kin Ahnsou Koaros Ketin Apwalih Kitail,” nan The Watchtower en September 1, 2003.
e Kilang artikel en “Lingan en Moangepwet,” nan The Watchtower en March 15, 1993.
f Ahd akan kin wekidekla.
Iaduwen Ke Pahn Sapeng?
• Dahme kahrehda ke leme me irail Kristian mah lelepek kan kin uhdahn kesempwal?
• Iaduwen kitail kak kasalehda pepehm en kadek ong iengetail sounkaudok mah kan?
• Dahme kak sewese ladu en Siohwa mah kan en ahneki madamadau en pweida mwahu?
[Kawehwehpen kilel kan nan ehu ehu pali 22]
Tohn mwomwohdiso kan kin wauneki irail me mah kan