Apwalih Me Mah Kan​—pwukoahn Kristian Akan

“Ngehi me amwail Koht, oh I pahn kin apwahpwalih kumwail lao kumwail likeilapala oh moangepwetala.”​—AISEIA 46:4.

1, 2. Iaduwen epwel en atail pahpa nanleng kin weksang epwel me atail pahpa oh nohno kin kihong kitail?

PAHPA oh nohno kan kin poaden apwalih neirail seri pwelel, ekis laudla, oh lel ni ahr wialahr mwahnakapw oh peinakapw. Pil lel ni ahr laudlahr oh anehkihier pein arail peneinei, arail pahpa oh nohno kan pil kin kihkihiengte irail epwel oh sawas limpoak kan.

² Mie soahng kan me aramas sohte kak kihong neirail seri kan, ahpw Samatail me ketiket nanleng kak kihong sapwellime ladu loalopwoat kan epwel oh sawas limpoak kan ahnsou koaros. Ni ah mahsanih ong sapwellime aramas me pilipilda ko mahs, Siohwa mahsanih: “Ngehi me amwail Koht, oh I pahn kin apwahpwalih kumwail lao kumwail likeilapala oh moangepwetala.” (Aiseia 46:4) Ia uwen mahsen pwukat ah kihong me irail Kristian mah kan koapworopwor! Siohwa sohte kin likidmeliehla irail akan me kin lelepek ong Ih. E inoukihda me E pahn apwalih irail oh kahluwa irail erein arail mour, pil lella ni ahr mahlahr.​—Melkahka 48:14.

3. Dahme kitail pahn koasoia nan artikel wet?

³ Iaduwen kitail kak alasang soangen nsenoh limpoak me Siohwa kin kasalehiong me mah kan? (Episos 5:1, 2) Kitail pahn kilang ekei ahl akan me seri kan, me kin apwalih mwomwohdiso kan, oh emen emen Kristian kan kak apwalih anahn akan en riatail Kristian me mahlahr kan.

Atail Pwukoah Nin Duwen Seri kan

4. Pwukoa dahieu irail seri Kristian akan ahneki ong arail pahpa oh nohno?

⁴ “Kahkahki semomw oh inomw.” (Episos 6:2; Eksodus 20:12) Ki mahsen loal pwukat me kohsang palien Pwuhk Sarawi ni lokaiahn Ipru, wahnpoaron Pohl katamanehki seri kan arail pwukoa kan ong arail pahpa oh nohno kan. Iaduwen mahsen pwukat pid duwen apwalih me mah kan? Ehu mehn karasepe mwahu en mahs pahn sewese kitail en sapeng peidek wet.

5. (a) Dahme kasalehda me Sosep sohte manokehla eh pwukoa nin duwen seri kan? (b) Dahme kin pidada en wauneki pahpa oh nohno, oh mehn karasepe mwahu dahieu Sosep kasalehda?

⁵ Erein sounpar 20 samwa, Sosep sohte kilang semeo Seikop me mahlahr oh pil wia kaun en peneinei. Ahpw, e sansal me Sosep sohte kesehla ah limpoak ong Seikop. Ni mehlel, ahnsou me Sosep kasalehiong rie pwutak ko ihs ih, e idek: “Ei pahpao momourte?” (Senesis 43:7, 27; 45:⁠3) Ahnsowo, sapwen Kenan mih nan lehk lapalap. Ihme Sosep ileklahng semeo oh patohwan: “Komw mwadangodo rehi. Komw dehr pwand. Komw pahn kousoanla nan Kosen, wasa me komw kak karanih ie . . . I pahn apwalih komwi oh kihong komwi ahmw anahn en war akan.” (Senesis 45:9-​11; 47:12) Ei, kahkahki semomw oh inomw me mahlahr pid apwalih irail oh kihong irail arail anahn en war akan ahnsou me re solahr kak pein apwalih irail. (1 Samuel 22:1-4; Sohn 19:25-​27) Sosep perenki kapwaiada pwukoa wet.

6. Iaduwen Sosep kin kasalehda eh limpoak mehlel ong ah pahpa oh iaduwen kitail kak kahlemengih ih?

⁶ Ki kapai en Siohwa, Sosep wiahla emen aramas me keieu kepwehpwe oh lapalap nan sapwen Isip. (Senesis 41:40) Ahpw, e sohte medewehiong me e nohn kesempwal oh kedirepw en kahkahki semeo me mahkier sounpar 130. Ni ah esehda me Seikop (Israel) kohkohdo reh, “Sosep ahpw ketin kaunopada sapwellime werennansapw oh ketilahng Kosen pwe en tuhwong eh pahpa Seikop. Eri ni eh tuhwong, e pwoalehdi oh tentenihr ahnsou reirei.” (Senesis 46:28, 29) Kasemw wet kaidehn ihte kasemw en wahu ehu. Sosep inenen limpoak ong semeo me mahlahr oh sohte namenek en kasalehda ah limpoak. Ma mie atail pahpa oh nohno me mahlahr, kitail kin sohte namenek en kasalehda atail limpoak ong irail?

7. Dahme kahrehda Seikop men seridi nan Kenan?

⁷ Ahn Seikop poadidi ong Siohwa kehlailte lao lel imwin ah mour. (Ipru 11:21) Pwehki ah pwoson sapwellimen Koht inou sarawi kan, Seikop pekihda paliwere en serdihte nan Kenan. Sosep kasalehda wahu ong semeo ni ah kapwaiada pekipek en Semeo mendahki pweilaud oh doadoahk laud me met pidada.​—Senesis 47:29-​31; 50:7-​14.

8. Ia kahrepe keieu laud me pahn kamwekid kitail en apwalih pahpa oh nohno mahlahr kan?

⁸ Dahme kamwekid Sosep en apwalih Semeo? Mehlel me limpoak oh pepehmw en me e pweipwandki ah mour oh epwel, e sansal me Sosep pil ahneki ineng en men kaperenda Siohwa. Kitail pil anahne ahneki soangen pepehmohte. Pohl ntingihdi: “Ahpw ma liohdi men mie nah seri, de nein nah seri kan, irail uhdahn pahn kapwaiada mahs arail pwukoa doadoahk ong arail peneinei, pwe iei duwen arail pahn dupukohng arail pahpa oh nohno kan, de arail pahpa oh nohno kahlap akan; oh iei me Koht kin ketin kupwurperenki.” (1 Timoty 5:⁠4) Limpoak ong Siohwa oh lemmwiki Ih pahn kamwekid kitail en apwalih atail pahpa oh nohno me mahlahr mendahki soangen irair apwal dah kan me met pidada.a

Iaduwen Elder kan Kak Kasalehda Me Re Kin Nsenohki

9. Ihs me Siohwa pilada en apwalih pelin pwihn wet me iangahki Kristian mah kan?

⁹ Kerkerenlahng imwin ah mour, Seikop koasoiahki Siohwa ninduwen “Koht me ketin kakahluwa ie lel rahnwet.” (Senesis 48:15) Rahnwet, Siohwa kin apwalih sapwellime ladu kan ki sounapwalih en Kristian kan, de elder kan pahn kaweid en sapwellimeo, Sises Krais, “Silepe Lapalapo,” me wia. (1 Piter 5:2-4) Iaduwen irail sounapwalih kan kak alasang Siohwa ni ahr apwalih irail me mahlahr kan nan sapwellimen Siohwa pwihn?

10. Koasoandi dahieu wiawihda ong epwelpen me Kristian mah kan?

¹⁰ Ahnsou kis mwurin kokoudahn mwomwohdiso en Kristian, wahnpoaron ko idihada “ohl isimen me . . . diren ngehn sarawi oh erpit” oh pwen apwalih “nehnehn” mwenge nanpwungen liohdi Kristian kan. (Wiewia 6:1-6) Mwuri, Pohl padahkiong sounapwalih men, Timoty en kilelehdi eden liohdi mahlahr akan me anahne sawas en war akan. (1 Timoty 5:3, 9, 10) Pil duwehte met, irail sounapwalih en mwomwohdiso kan rahnwet kin kihda sawas konehng kan ong Kristian me mahlahr kan ahnsou me konehng. Ahpw mie pil mehkan me kesempwal en wia ong ni atail kin apwalih irail me mah pwoson kan.

11. Dahme Sises kasalehda duwen liohdi semwehmweho me kihda ah meirong tikitik?

¹¹ Kerenlahng kaimwiseklahn ah pwukoa nin sampah wet, Sises ketidiong wasakis nan tehnpaso oh “kin mahmahsanih duwen aramas ako ar kin kesehdiong nair mwohni ko nan dewen meirongo.” Sises ahpw tehkada meirong en emen aramas ako. Pwuhk Sarawi mahsanih: “A liohdi semwehmwe men ahpw pil lelodo oh iang kesehdi sens toantoal riau.” Sises likwerihdo sapwellime tohnpadahk ko oh padahkiong irail: “I men kumwail en ese pwe en liohdi menet oh meirong inenen laud mehlel sang en mehteiko koaros. Pwe mehteiko kesehdiong nair mwohni nan dewen meirongo sang nan ar pai, ah liohdi menet sang nan eh paisuwed e kihdi mehkoaros me e ahneki oh kin momourki.” (Mark 12:41-​44) Uwen mwohni me liohdio meirongkio tikitik ahpw Sises ese uwen Seme nanleng eh kin kesempwaliki kisakis me kohsang mour unsek. Mendahki sounpar en liohdi semwehmwe menet Sises sohte pohnsehse dahme lih menet wia.

12. Iaduwen elder kan kak kasalehda arail kalahngan ong en Kristian mah kan sawas me re kin kihda?

¹² Duwehte Sises, sounapwalih Kristian kan sohte kin pohnsehse dahme me mah kan kin wia pwehn utung padahk mehlel. Elder kan ahneki kahrepe mwahu en kapinga me mah kan ki ahr sawas akan nan doadoahk en kalohk, ahr pasapeng kan nan mihding, oh ahr mehn kahlemeng mwahu kan nan mwomwohdiso oh ahr pil kin dadaur nan apwal. Lokaiahn kangoang kan kak sewese me mah kan en kilangada “kahrepen en peren” nan ahr pwukoa sarawi, pwe ren dehr kin pahtoula ni ahr kin kapahrekiong dahme re wiahda ong dahme Kristian teikan kak wia de pil ong dahme pein irail kin kak wiahda mahs.​—Kalesia 6:4.

13. Ni ahl dah kan elder kan kak koasoia koahiek oh ekspiriens en irail me mah kan?

¹³ Elder kan kak pohnese soangen sawas katapan kan me Kristian mah kan kin wia ni ahr ki kosoiahda ahr ekspiriens kan oh koahiek kan. Irail me mah me wia mehn kahlemeng mwahu kan kak iang wia kamwomwada kan de pil interview kan. Emen elder koasoia, “Irail me kin rongorong kan kin mwohndi inenda oh rongorong mwahu ni ai kin interview brother oh sister mah kan me kin kakairada seri kan nan padahk mehlel.” Elder kan nan ehu mwomwohdiso koasoia me sister pioneer men me sounpar 71 kin pweida mwahu ni eh kin sewese sounkalohk teikan en iang doadoahk en kalohk ahnsou koaros. E pil kin kangoange irail en wia “wiewia kesempwal kei” duwehte wadek Pwuhk Sarawi oh Iren Rahn oh doudouloale dahme irail wadek.

14. Iaduwen ehu pwihn en elder kasalehda kalahngan ong emen sounapwalih mah men?

¹⁴ Elder kan pil kin kesempwalki sawas kan en irail sounapwalih mahlahr akan. José, me sounpahr 70 samwa oh kin wia elder men erein sounpahr tohto, me ahpwtehn pwal. Ni ah pwand en kehlailda sang eh soumwahu, e medewehda en uhdisang ah pwukoa en papah nin duwen Presiding Overseer men. José nda, “I pwuriamweikihla mwekid en elder teiko ong ie. Irail sohte pwungki ien uhdisang ai pwukoa, irail idek ma soangen sawas dah kan me I anahne pwe ien kak kolokolte ahi pwukoa.” Ki sawas en elder pwulopwul men, José kak pousehlahte oh papah nin duwen Presiding Overseer peren men, oh met inenen wia kapai ehu ong arail mwomwohdiso. Emen elder kosoia: “Tohnmwomwohdiso kan inenen kalahnganki ahn José doadoahk nin duwen elder men. Irail kin poakohng ih oh wauneki ih pwehki ah koahiek oh mehn kahlemeng en pwoson. E kin inenen sewese aht mwomwohdiso.”

Apwalih Emenemen

15. Dahme kahrehda Kristian koaros anahne pohnese oh tehk mwomwen momour en irail me mah kan?

¹⁵ Kaidehn ihte seri kan me pahpahki oh nohnohki me mahlahr kan oh pil irail me kin ale pwukoa nan mwomwohdiso me anahne en tehk me mah kan. Pohl karasahiong mwomwohdiso ong paliweren aramas, oh e ntingihdi: “Koht ketin koasoanehdi paliwaratail kan oh ketikihong wahu laud kakon akan me sohte ar lingan pwe saminimin en dehr kin mie ni paliwaratail ahpw kakon koaros en soangen nsenoh teieu ong ni sawaspene.” (1 Korint 12:24, 25) Ehu kawehwe koasoia: “Kisehn paliwar koaros anahne en keieu nsenohki kamwahupen kisehn paliwar teikan.” (Knox) Pwe mwomwohdiso en Kristian en kak miniminpene, emen emen tohnmwomwohdiso anahne en tehk dahme pahn mwahu ong meteikan, iangahki irail me mahlahr akan.​—Kalesia 6:⁠2.

16. Iaduwen kitail kak pohnese irail me mah kan ahnsoun mihding en Kristian akan?

¹⁶ Mihding kan en Kristian kihda ahnsou mwahu en kasalehda atail nsenohki me mah kan. (Pilipai 2:⁠4; Ipru 10:24, 25) Kitail kin koasoanehdi atail ahnsou en koasoakoasoiong me mah kan soangen ahnsou pwukat? Mehlel me e konehng kitail en idek ma irerail, ahpw iaduwe, kitail kak “kihong kapai ehu ong ni pali ngehn,” mwein sang ni atail ehukihong irail ehu ekpiriens en kangoang de pil ehu iren Pwuhk Sarawi? Pwehki me mahlahr kan sohlahr nohn kehlail en mwekimwekidseli, e pahn wia tiahk kadek ma kitail me kohla tuhwong irail ah kaidehn kitail en kasik me irail me pahn kohdo tuhwong kitail. Ma irail sohte kak nohn rong mwahu, kitail mwein anahne en lokaia wawai oh sansal. Pwe en mie “sawaspene” mehlel, kitail anahne rong kanahieng dahme me irail mah kan kin koasoakoasoia.​—Rom 1:11, 12.

17. Iaduwen kitail kak kasalehda atail nsenohki irail Kristian mah kan me sohte kak kohsang nan ihmw?

¹⁷ Iaduwen ma ekei me mah kan sohte kak iang mihding en Kristian kan? Seims 1:27 kasalehda me e wia atail pwukoa en “apwalih me sepwoupwou kan oh liohdi kan nan ahr apwal akan.” Ehu wehwehn “en apwalih” ni lokaiahn Krihk iei “en mweimweitla rehrail.” (Wiewia 15:36) Oh ia uwen me mah kan ahr kin kalahnganki atail kin mwemweitla rehrail! Ni ah selidi nan Rom nan pahr 65 C.E., ni ahnsou me e “mahlahr,” Pohl kin wie kelekelehpw. E men kilangada iengeo Timoty, ih eri ntingihdi: “Eri, wia uwen omw kak pwe ke en mwadangodo rehi.” (Pailimwon 9; 2 Timoty 1:3, 4; 4:⁠9) Mendahki me mah kan sohte selidi duwehte Pohl, ekei irail kin mihmihte nan ihmw pwehki soumwahu. Met kahrehda arail pahn mwein iang ndinda, ‘Eri, wia uwen omw kak pwe ke en mwadongodo rehi.’ Iaduwen kitail kin pohnese soangen pekipek pwukat?

18. Kapai dah kan kak kohsang atail pahn pwarek me mah kan?

¹⁸ Dehr medemedewe me sohte kamwahupen mwemweitla rehn riatail brother de sister mahla kan. Ahnsou me Onesiporus emen Kristian mihmi nan Rom, e rapahkihala Pohl oh diar ih, oh mwurin mwo ‘kin kaperenih Pohl pak tohto.’ (2 Timoty 1:16, 17) Emen sister mah koasoia, “I kin perenki kihong ai ahnsou ong me pwulopwul kan. Me I kin keieu perenki iei arail kin wiahkin ie emen kisehn arail peneinei. E kin inenen kangoange ie.” Pil emen lih Kristian me mah pil koasoia: “I kin inenen kalahnganki ni ahnsou me emen kin kadarodohng ie nei kisinlikou, de call ie pil minit kei te, de pil mwemweitdo rehi mehnda ma kisin ahnsou kis te. E kin duwehte esingek ki kisinieng kapwo.”

Siohwa kin Kapaiada Irail kan me kin Nsenoh

19. Ia kapai kan me kin kohsang atail kin apwalih me mah kan?

¹⁹ Apwalih me mah kan kin imwikihla soangen kapai tohto. Werekiong me mah kan oh alehda ahr loalokong oh ekspiriens kan pil wia kapai ehu. Irail me kin apwalih me mah kan kin alehdi peren sang ni arail kin kihwei, oh re pil kin peren me irail kin wiahda mehkot katapan oh re pil kin ahneki popohl pwehki re kapwaiada arail pwukoa ni pali ngehn. (Wiewia 20:35) Pil patehng met, irail me kin apwalih me mah kan sohte anahne ahneki pepehm en perki me irail pahn kelehpw oh sohte me pahn tehk irail ni ahnsou re pahn mahla, pwe Mahsen en Koht kin inoukihong kitail: “Kadek, ke ahpw pahn paiamwahula. Sewese meteikan, ke ahpw pahn ale sawas sang meteikan.”​—Lepin Padahk 11:25.

20, 21. Iaduwen Siohwa kin kilangwong irail kan me kin apwalih oh nsenohki me mah kan oh dahme kitail anahne nantiong en wia?

²⁰ Siohwa kin kapaiada irail seri kan me kin lahn Koht, iangahki sounapwalih en mwomwohdiso kan, oh pil irail Kristian kan me kin ni soh roporop apwalih ong irail me mah kan anahn akan. Soangen ngehn en nsenoh wet kin pahrekiong lepin padahk wet: “Ni omw kin kisekise me semwehmwe kan, duwehte omw patohwanohng Kauno, oh Kauno ahpw pahn ketin kasapahldohng uhk.” (Lepin Padahk 19:17) Ma limpoak me kin kamwekid kitail en kasalehda kadek ong me anahn oh semehmwe kan, eri Koht pahn kapaia kitail. E pil kin kapaia kitail ni ahnsou kitail kin ni limpoak sewese irail riatail mah kan nan mwomwohdiso, me pali laud en irail sohte kepwehpwe ni paliwar ahpw kepwehpwe ni pali ngehn.’​—Seims 2:5.

²¹ Ia uwen laud kadek me Koht kin kasalehda! E kin pil pid mour soutuk. Ong pali tohto en sapwellimen Siohwa ladu kan arail koapworopwor iei mour pohn paradais nin sampah​—⁠ahnsowo solahr dihp oh irail me mah lelepek kan pahn pwurehng ale kapai en pwurehng pwulopwula. (Kaudiahl 21:3-5) Ni atail awiawih kapai wet en leledo, kitail en pousehlahte kapwaiada atail pwukoahn Kristian en apwalih me mah kan.

[Nting tikitik me mi pah]

Ia Ahmw Pasepeng?

• Iaduwen seri kan kak kasalehda wahu oh kalahngan ong pahpa oh nohno mahlahr kan?

• Iaduwen elder kan kin kasalehda arail kalahngan ong irail me me mahlahr kan nan mwomwohdiso?

• Dahme emen emen Kristian kak wia pwehn kasalehda arail nsenoh ong irail me mah kan?

• Kapai dah kin kohsang atail kin nsenohki Kristian mah kan?

[Kilel nan Pali 13]

Atail nsenohki me mah kan kin pidada kadek ong pahpa oh nohno mah kan?

[Kilel nan Pali 14]

Koaros nan mwomwohdiso kak kasalehda arail limpoak ong iengerail pwoson mah akan