Koht Kin Ketin Kupwure Irail Aramas Mah kan

NAN rahnwet e sohte kapwuriamwei rekilahn irail me kin wia kauwehla aramas mah kan. Kawao, Paipel kohpadahr me ni “imwin rahn akan” nan koasoandi suwed wet, aramas akan pahn “roporop, . . . oh sempoak.” (2 Timoty 3:1-3) Lepin lokaiahn Krihk me kawehwe “limpoak” kin pid limpoak me kin dierek nan peneinei kan. Paipel kohpada me soangen limpoak wet pahn sohlahr nan rahnwet, oh kokohp wet pweida.

Weksang douluhl irail oko me kin wiakauwe aramas mah kan, Siohwa Koht kin ketin kesempwaliki oh kin ketin apwalih irail oko me mahlahr. Tehk iaduwen met sansal sang nan Paipel.

“Sounkopwung en Liohdi kan”

Kasalepen me Siohwa Koht kin kupwure aramas mah kan kin sansal nan Paipel palien nting en lokaiahn Ipru. Karasepe, nan Melkahka 68:5, Depit likwerikin Koht “sounkopwung en liohdi kan,” oh pali laud en irail liohdi kan wia me mah kei.a Nan ekei kawehwehdi en Paipel, lepin mahsen “sounkopwung” kin wehwehki “sounpoadoandor,” “sounpereper” oh “me kin kana.” E sansal me Siohwa kin kupwure liohdi kan. Ni mehlel, Paipel mahsanih me ma irail pahn wia kaula, sapwellime engieng pahn ketin lulda. (Eksodus 22:22-24) Liohdi kan—oh koaros aramas mah kan me lelepek—inenen kesempwal rehn Koht oh sapwellime ladu kan. Lepin Padahk 16:31 kin kasalehda sapwellimen Siohwa Koht kupwur oh pil madamadau en sapwellime kan ni ah mahsanih: “Mour werei iei ketingpen pwung; moangepwet iei kapwat lingan ehu.”

Wauneki aramas mah kan kin wia kisehn sapwellimen Siohwa Kosonned ong Wehin Israel. Pahngok kohwong mehn Israel akan mahsanih: “Kahkahki oh wauneki me mah kan. Kumwail lemmwikin ie oh peikiong ie. Ngehi me Siohwa.” (Lipai 19:32) Kahrehda nan Israel, en emen wauneki me mah kan kin pidada ah nanpwung mwahu rehn Siohwa Koht. Aramas emen sohte kak nda me e poakohng Koht ma e kin wiekauwe aramas mah.

Kristian kan sohte mih pahn Kosonned en Moses. Ahpw, irail mih pahn “kosonned en Krais,” me kin kamwekid laud duwen arail wiewia kan oh arail madamadau kan, pil mehkan me pid kasalepen limpoak oh nsenohki pahpa oh nohno kan oh irail me mah kan. (Kalesia 6:2; Episos 6:1-3; 1 Timoty 5:1-3) Oh Kristian akan sohte kin kasalehda limpoak pwehki ihte kaweid kohwong irail en wia met, ahpw irail kin mwekidiki audepen mohngiongirail. Wahnpoaron Piter ketikihda kangoang wet, “Kumwail limpoakpene sang nan kapehdamwail unsek.”—1 Piter 1:22.

Tohnpadahk Seims pil kihda kalaudepen kahrepen atail en apwalih aramas mah kan. E ntingihdi: “Eri, iet duwen poadidi ong papah Koht me uhdahn pwung oh unsek mehlelen, me Samatail Koht kin ketin kupwurki: apwalih me sepwoupwou kan oh liohdi kan nan ar apwal akan, oh dehr saminkihla tiahk suwed kan en sampah wet.” (Seims 1:27) Seims kihda kaweid me pahn kamwekid loalatail. E katamankin kitail kesempwalpen irail me kompoak pwukat ong Siohwa.

Kahrehda, e sohte itar kitail en ihte dehr wiekauwe aramas mah. Weksang met, kitail uhdahn pahn kasalehda nsenohki irail ni atail pahn wia doadoahk mwahu kan. (Kilang nan koakon “Limpoak Ah Kin Doadoahk,” ni pali 6-7.) Seims ntingihdi: “Pwoson me sohte doadoahk kan iang iei doadoahk mehla ieu.”—Seims 2:26.

Kamweit “nan Arail Apwal”

Mie pil ire kesempwal me kitail kak kihsang rehn mahsen en Seims. Tehk pwe Seims padahkiong Kristian akan ren apwalih liohdi kan “nan arail apwal akan.” Lokaiahn Krihk me kawehwe “apwal” kin wehwehki nsensuwed, irair apwal akan, de lokolok me kin kohsang kapwunod en irair laud akan nan atail mour. E sansal me tohto nanpwungen irail me mah kan me kin nsensuwed. Ekei kin sangat. Ekei kin pwunodki soh itar en war akan me iangodo arail likeilapalahr. Pil irail akan me kin pwerisek mwekidseli nan arail papah Koht pil kak lelohng pahtou. Tehk duwen Sohn,b sounkalohk en Wehin Koht lelepek nan erein pahr 40 samwa, oh kaimwiseklahn pahr silihsek e wia sounkalohk kaukaule men. Ni ah mahki sounpar 80 samwa, Sohn nda me ekei pak e kin mworusala. E koasoia: “I kin kalap kousapahl oh tamanda ahi sapwung kan, soangsoangen sapwungala tohto, me I kin kaukaule ndahiong pein ngehi me I kakete wia mwahusang.”

Soangen aramas duwehte met pahn maiauda ni arail pahn ese me Siohwa, me unsek, sohte kin kasik aramas en unsek. Edetehn e mwahngih atail sapwung kan, Paipel mahsanih duwen Ih: “Ma komw pahn ketin kilelehdi dipat akan, ihs me kak pitsang sapwellimomwi kadeik?” (Melkahka 130:3) Ei, Siohwa kin sohte ketin mahsanihte atail sapwung kan ahpw e kin mahsanih dahme mih nan mohngiong. Iaduwen atail ese met?

Nanmwarki Depit—pein ih kin wia sapwung oh soh unsek—ale sapwellimen Koht kaweid pwehn wiahda melkahka ni mahsen pwukat, me ntingihdi nan Melkahka 139:1-3: “Maing Kaun, komw ketin kasawih ie, eri, komw ketin mwahngih ie. Komw ketin mwahngih mehkoaros me I kin wia; sang wasa doh, komw ketin mwahngih ei lamalam akan koaros. Ei tungoal seiloak oh ei tungoal kommoal, komw ketin katohrehsang, oh komw ketin mwahngih ei wiewia kan koaros.” Wasaht lepin mahsen “katohrehsang” kin wehwehki “sihpihsang,” duwehte soumwet emen ah kin kesehda nan kisinieng weren tuhke pilawa pwe en poukasang kili kan oh war kan te en luhwe. Pahn kaweid en ngehn sarawi, Depit ketin kamehlelehiong kitail me Siohwa mwahngih iaduwen e pahn kin ketin kamwakelehda oh kolokol nan sapwellime kataman atail doadoahk mwahu kan.

Samatail me ketiket nanleng ketin tamataman—oh kupwurperenki—atail doadoahk mwahu kan ma kitail pahn kolokolete atail lelepek ong Ih. Ni mehlel Paipel mahsanih me e pahn wia mehkot sapwung en ketin likidmeliehla atail doadoahk oh limpoak me kitail kasalehda pwehki mware.—Ipru 6:10.

“Soahng Mering kan Sohralahr”

Paipel kasalehda me kahpwal akan en aramas mah kan sohte wia sapwellimen Koht koasoandi ong aramas. Mwurin atail pahpa oh nohno kahlap oko, tepin ohlo oh liho, ara pelianda ara Sounkapikadao me kahpwal akan en aramas mah kan tepida wiahla kisehn mour en aramas. (Senesis 3:17-19; Rom 5:12) Met sohte pahn mihmi kohkohlahte.

Nin duwen me sansaldahr, irair suwed tohto me kitail kin lelohng rahnwet—iangahki wiekauwe aramas mah—wiahier kadehdehpen me kitail mihmihier nan “imwin rahn akan” en koasoandi suwed wet. (2 Timoty 3:1) Sapwellimen Koht koasoandi iei en ketikihsang kahpwal akan me dihp kin wahdo, iangahki kahpwal akan en mahla oh mehla. Paipel mahsanih: “[Koht] pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”—Kaudiahl 21:4.

Nan sapwellimen Koht sampah kapw, medek oh weirek en aramas mah pahn solahr. Pil iangahki wiewiahn wiekauwe aramas mah kan. (Maika 4:4) Pil irail oko me melahr oh Koht ketin tamataman irail pahn pwurehng mourda, pwe irail en pil kak iang ale ahnsou mwahu en mour soutuk nan paradais nin sampah. (Sohn 5:28, 29) Ahnsowo, e pahn inenen sansalda mwahu me Siohwa kin ketin kupwukupwure kaidehn irail me mah kante ahpw pil irail kan koaros me kin peikiong Ih.

[Nting tikitik me mi pahs]

[Kawehwehpen kilel kan nan ehu ehu pali 6, 7]

Limpoak Ah Kin Doadoahk

Nanpwungen Sounkadehdehn Siohwa kan, elder kan en mwomwohdiso kin tiengla mwowe ni arail kasalehda nsenohki aramas mah kan. Irail kin kesempwaliki kehkehlik en Piter me mahsanih: “Kumwail en kin wia doadoahk en silepen sihpw me Koht ketikihong kumwail, oh apwalih irail.” (1 Piter 5:2) Apwalih aramas mah kan kin wia kisehn pwukoa en apwalih sapwellimen Koht pelin sihpw akan. Dahme met kin pidada?

Pwe kitail en esehda anahn en aramas mah men, kitail anahne kanengamah oh pwurepwure oh koasoakoasoi ong ih. Mwein re anahne aramas en sewese kohla ni sidohwa de kamwakel, de sawas en mehn peidaid en kohla mihding en Kristian akan, de sawas en wadek Paipel oh sawasepen Paipel kan, oh soangen anahn teikan. Ni ahnsou me kak, e konehng wiahda koasoandi mwahu kan me pahn kak doadoahk.c

Iaduwen ma brother de sister mah men nan mwomwohdiso lelohng kahpwal laud, mwein e anahne mwohni? Keieu, e pahn mwahu en diarada ma mie nah seri kan de ah peneinei me kak sawas. Met pahn pahrekiong dahme koasoipen pwarada nan 1 Timoty 5:4: “Ahpw ma liohdi men mie nah seri, de nein nah seri kan, irail uhdahn pahn kapwaiada mahs arail pwukoa doadoahk ong arail peneinei, pwe iei duwen arail pahn dupuk ohng arail pahpa oh nohno kan, de arail pahpa oh nohno kahlap akan; oh iei me Koht kin ketin kupwurperenki.”

Ele aramas mah emen anahne emen en sewese diarada ma e kak ale sawas kan sang palien koperment. Mwein mie aramas nan mwomwohdiso me kak sewese ih rapahki soangen sawas pwukat. Ma sohte soangen sawas kan me e kak ale, irail elder kan kak diarada ma aramaso kak ale sawas sang mwomwohdiso. Nan senturi keieu, mie pak me soahng wet wiawi, oh met sansal sang mahsen en wahnpoaron Pohl ong ienge Timoty: “Ke dehr kapatahiong emen liohdi ong ni irek en eden liohdi kan, ma e saikinte lel sounpar weneisek. Pil ehu, e uhdahn pahn pwopwoud paktehpak, oh adamwahuki eh wiewia mwahu: eri, lih emen me kakairada mwahu nah seri kan, me kin kasamwo mehn keiru kan ong nan imwe, me kin widen nehn sapwellimen Koht aramas akan, me kin sewese aramas akan nan ar apwal akan, oh kin poadidiong wiewia doadoahk mwahu.”—1 Timoty 5:9, 10.

[Nting tikitik me mi pah]

[Kawehwehpen kilel kan nan ehu ehu pali 5]

Dorkas kin sewese irail liohdi semwehmwe kan.—Wiewia 9:36-39.