Aramas kin Wiakauwe oh Sohte Nsenohki Aramas Mah kan
NI AHNSOU soun silepen ni pwongo douseli, e sohte onopada nan kapehde en kilang soahng kapwuriamwei me awiawih ih. Likinte ihmw kaselel ieu, e diar paliwar en me mehla riemen—pwopwoud mah ieu me lus sang nan wenihmwtok en ara apartment me mih nan poasoake waluh. Ara kemehla pein ira kin wia mehkot kapwuriamwei, ahpw me kapwuriamwei sang met iei kahrepen ira wiahki met. Kisinlikou kis dierek nan ahn ohlo pwekid me nda: “Se irehdier aht mour pwehki mwuledek en wiakau oh kamasak me nait pwutak oh ah pwoud kin wiahiong kiht.”
Oaritik en koasoi wet wia mehkot me sohte kin kalap wiawi, ahpw kahpwal wet wia mehkot me rek. Ni mehlel, wiakauwe aramas mah kin wia duwehte soumwahu lusulus wasa koaros pohn sampah. Tehk ire pwukat:
• Ehu roporop kasalehda me persent 4 en aramas mah nan Canada kin ripohtki me re wiakau de aramas kin pitih irail—kin kalap sang rehn tohn peneinei. Ahpw, aramas mah tohto me inenen namenengki de inenen masak koasoia duwen arail apwal me re mihmi loale. Mwein ele nempe me pwung iei persent 10, iei me semen kan nda.
• Makisihn me ede India Today ripohtki me: “Wehin India, kin kose me ehupenehn peneinei me kehlail, ahpw, ni mehlel, e kin luwetala pwehki nein aramas mah tohto neirail seri kan solahr poakpoake irail.”
• National Center on Elder Abuse kasalehda me “nanpwungen Mehn Amerika million 1 oh 2 me sounpar 65 oh pohnangin sounpahr 65 kin lelohng ohlahn paliwar, aramas pitih irail, de wiakaula sang rehn aramas akan me irail kin keieu koapworopworki me irail me pahn apwalih oh pere irail. Deputy district attorney men nan San Diego, California, koasoia duwen wiakaulahn aramas mah kan: “Met iei ehu kahpwal me keieu laud me palien utung kosonned kan ahneki nan rahnwet.” E pil kapatahiong nda: “I kilang me kahpwal wet pahn laudla mehlel mwurin pahr ekei.”
• Nan Canterbury, New Zealand, ehu iren kapwunod laud iei me en aramas mah kan arail peneinei pahn kin isanekin irail—ahpw mehlel kisehn arail peneinei kan me kin doadoahngki wini en kelitepw, sakau en wai oh pilein mwohni. Tohtohn irail aramas mah kan me lelohngehr irair en wia kaula nan Canterbury wiahkintehieu tohtohla, sang meh 65 nan pahr 2002 lel 107 nan pahr 2003. Kaunen ohpis me kin irehdi mwekid lemei koasoia me nempe pwukat mwein kin wia kasalepen me “aramas mah tohto lelohng kahpwal akan wasao ahpw sohte me ese.”
• The Japan Times koasoia me The Japan Federation of Bar Associations kasalehda me “kitail anahne tehk kahpwal en wiakaulahn aramas mah laudsang atail kin tehk duwen wiakaulahn seri oh kahpwal teikan koaros nan peneinei.” Dahme kahrehda? Ehu kahrepen met, The Japan Times koasoia, iei pwehki “wiakaulahn seri oh ahn emen pwoud, soangen wiakaula kan kin mwadang sansalda ahpw wiakaulahn aramas mah kan sohte nohn mengei en kilangada pwehki aramas mah kan ekei pak kin ahneki pepehm me pein irail me kahrehda neirail akan kin mwamwahlikin irail, oh pil pwehki palien koperment oh kaunen wehi kan sohte kin tehk kahpwal wet.”
Karasepe malaulau pwukat me pid duwen dahme wiewiawi nan sampah kin kahrehiong kitail en idek: Dahme kahrehda aramas kin wiakauwe oh sohte nsenohki me mah tohto? Mie koapworopwor me irair wet pahn mwahula? Soangen mehn kamweit dah me mie ong aramas mah kan?