Kahkahki me Mah kan Nanpwungamwail

1. Soangen irair kansensuwed dah me aramas akan kin lelohng rahnpwukat?

SIOHWA sohte ketin kupwurki aramas akan en lokolok, luwetala, oh mahla. Kupwure nin tapio iei me ohl oh lih akan ren ahneki mour unsek nan Paradais. Ahpw met, “audepen lahng oh sampah koaros kin weiweirek.” (Rom 8:22) Ia sapwellimen Koht pepehm ni eh ketin mahsanihada aramas akan ar lokolok pwehki dihp? E kansensuwed en kilang me irail me mah tohto sohte kin ale sawas ni ahnsou me re anahne.​—Mel. 39:5; 2 Tim. 3:3.

2. Dahme kahrehda Kristian akan kin kalahnganki me mie me mah kan nan arail mwomwohdiso?

² Sapwellimen Siohwa aramas akan kin kalahnganki me mie me mah kan nan arail mwomwohdiso. Kitail kin paiekihda arail erpit, oh kitail men idawehn arail mehn kahlemeng en pwoson. Me tohto rehtail peneineiki me mah pwukat. Ahpw mendahki atail peneineiki irail de soh, kitail men tehk mwahu me re alehdi sawas me anahn. (Kal. 6:10; 1 Pit. 1:22) E pahn wia kamwahupatail en tehk ia sapwellimen Koht pepehm ong me mah kan. Kitail pil pahn koasoiapene pwukoa kan me tohn peneinei oh pil mwomwohdiso ahneki pwehn apwalih me mah kan.

“OMW DEHR KETIN LIKIDMELIEIEHLA”

3, 4. (a) Soangen peidek dah me sounnting en Melkahka 71 patohwan ong Siohwa? (b) Dahme me mah kan kak peki rehn Koht en ketin wia?

³ Melkahka 71:9 mahsanih: “Komw dehr ketin likidmelieiehla ni ei likeilapalahr, komw pil dehr ketin keseiehla ni ei luwetalahr.” Ele Depit me ntingihada lepin lokaia pwukat. E papah Koht erein eh mour oh Siohwa ketin doadoahngki ih pwehn wia soahng mwahu tohto. (1 Sam. 17:33-37, 50; 1 Nan. 2:1-3, 10) Mendahki e wiahda soahng tohto ong Siohwa, Depit mahlahr oh pehm me e anahne peki rehn Siohwa en ketin apwalih ih.​—Wadek Melkahka 71:17, 18.

⁴ Me tohto rahnwet duwehte Depit. Mendahki re mahlahr oh lelohng “sounpar kansensuwed kan,” re kin wia uwen arail kak en kapinga Koht. (Ekl. 12:1-7) Me tohto rehrail ele sohte kak wia uwen me re kak duwehte me re kin wia mahs, pil nan doadoahk en kalohk. Ahpw re pil kak peki rehn Siohwa en ketin pousehlahte kapaia oh apwalih irail. Me mah lelepek pwukat kak kamehlele me Koht pahn ketin sapengala arail kapakap akan. Kitail ese met pwehki Siohwa ketin kamwakid Depit en kapakapki duwen soangen kahpwal kan me duwehte mepwukat.

5. Ia sapwellimen Siohwa pepehm duwen me mah lelepek kan?

⁵ Siohwa ketin kesempwalki laud me mah lelepek kan oh ketin kasik sapwellime ladu kan en wauneki irail. (Mel. 22:24-26; Lep. Pad. 16:31; 20:29) Lipai 19: 32 mahsanih: “Kahkahki oh wauneki me mah kan. Kumwail lemmwikin ie oh peikiong ie. Ngehi me KAUN-O.” Ei en kahkahki oh wauneki me mah kan nan mwomwohdiso wia pwukoa laud ehu ni ahnsou me iren Paipel wet ntingdi, oh e pil duwehte rahnwet. Ahpw ihs me pwukoahki apwalih irail?

PWUKOAHN PENEINEIO

6. Mehn kahlemeng mwahu dah me Sises ketin kasalehda duwen apwalih eh nohno?

⁶ Mahsen en Koht padahkihong kitail: “Kahkahki semomw oh inomw.” (Eks. 20:12; Ep. 6:2) Sises ketin kasalehda me kehkehlik wet uhdahn kesempwal ni ahnsou me e ketin kadeikada Parisi ko oh sounkawehwehn kosonned ko me sohte men apwalih arail pahpa oh nohno kan. (Mark 7:5, 10-13) Pein Sises ketikihda mehn kahlemeng mwahu ehu. Mendahte e mi pohn tuhkehn kalokoloko, e ketin nsenohkihte eh nohno me ele wia liohdi men. E ketin tehk pwe sapwellime tohnpadahko me e ketin poakohng, Sohn, en apwalih eh nohno.​—Sohn 19:26, 27.

7. (a) Kaweid dahieu duwen peneinei kan me Pohl kasalehda? (b) Dahme Pohl pil koasoia?

⁷ Nan nah kisinlikou ong Timoty, Wahnpoaron Pohl ntingihdi me Kristian kan anahne pein apwalih arail peneinei kan. (Wadek 1 Timoty 5:4, 8, 16.) E kasalehda kaweid wet ni eh koasoia ihs me kak ale sawas en mwohni sang mwomwohdiso. Pohl nda me nein liohdi mah kan neirail seri kan, nein neirail seri kan, oh kisehrail teikan me pwukoahki apwalih irail. Ni arail wia met, pwukoa wet sohte anahne katoutouwih mwomwohdiso. Pil rahnwet kitail kak kadehde me kitail poakohng Koht sang atail tehk mwahu me atail peneinei kan kin ale dahme re anahne.

8. Dahme kahrehda Paipel sohte kihda kaweid oaritik kan duwen pahpa nohno me mahlahr kan?

⁸ Seri laud kan ahneki pwukoa en apwalihki arail pahpa nohno kan arail likou, kepwe de dipwisou kan. Pohl kin koasokoasoia duwen sewese peneinei me mi nan pwoson, ahpw seri ko en dehr pohnsehsehla pahpa nohno kan me kaidehn kisehn mwomwohdisohn Kristian. Irair en ehuehu peneinei wekpeseng, eri ehuehu peneinei anahne wiahda arail pilipil kan duwen arail pahn apwalih arail pahpa nohno kan. Ahn emenemen roson, anahn akan, oh soangen aramas dah ih, kin wekpeseng. Ekei me mah kan naineki seri tohto ahpw ekei naineki emente. Ekei kak ale sawas sang palien koperment, ah ekei sohte kak. Pil ehu, pilipil kan en irail me anahne sawas wekpeseng. E sohte pahn wia elen loalokong de limpoak en kauwe mwomwen ahn emen eh kin song en apwalih arail peneinei mahlahr kan. Siohwa kin ketin kapaiada pilipil koaros me kin poahsoankihda Paipel. E kak ketin wia pwe atail pilipil kan en pweida duwehte me e ketin wiahiong sapwellime aramas akan sangete mahs.​—Nemp. 11:23.

9-11. (a) Pilipil apwal dahieu me ele ekei anahne wiahda? (Menlau kilang tepin kilel.) (b) Dahme kahrehda seri laud kan en dehr mwadang uhdihsang arail doadoahngki pali laud en arail ahnsou ong papah Siohwa? Menlau kihda ehu karasaras.

⁹ Ni en pahpa nohno kan oh seri kan arail wasahn kousoan dohpeseng, e pahn kak apwal en kihong sawas me pahpa nohno mah kan anahne. Seri kan ele anahne mwadang kohla rehn Nohno oh Pahpa pwehki emen rehra pwupwudi, ehu tih ko timpeseng, de soangen kahpwal laud teikan. Mwurin mwo, pahpa nohno kan ele pahn anahne sawas ong ahnsoukis de ahnsou reirei.a

¹⁰ Irail me kin doadoahngki pali laud en ar ahnsou ong doadoahk ong Koht me mi nan ehu sahpw me dohsang arail pahpa oh nohno ele anahne wiahda pilipil apwal kan. Tohn Pedel kan, misineri kan, oh sounapwalih kan me kin seiloak kin pehm me arail doadoahk kin wia kapai kesempwal ehu sang rehn Siohwa. Ahpw ma arail pahpa nohno kan soumwahuda, mwein dahme re tepin medewehda iei, ‘Se anahne pwilikihdi at doadoahk oh pwurala sapwato pwehn apwalih at pahpa oh nohno.’ Ahpw e wia elen loalokong en kapakapki oh medemedewe dahme pahpa nohno kan uhdahn anahne de mwahuki. Emen en dehr mwadang uhdihsang eh doadoahk me kohsang rehn Siohwa, oh ele met sohte anahne wiawi ahnsou koaros. Ia duwe, me ahneki soumwahwo kak mwadang mwahula? Mie irail kan me mi nan mwomwohdiso me en seri ko pahpa oh nohno iang me pahn perenki sewese me mah pwukat oh mweidohng neirail seri kan en pousehlahte arail doadoahko?​—Lep. Pad. 21:5.

¹¹ Karasepe, pwopwoud mah ehu sang Sapan naineki pwutak riemen me kin papah dohsang sapwarao. Emen rehra wia doadoahk en misineri nan sapwen Paraguay, Palieir en Amerika, oh emen doadoahk nan poasen kaun en Sounkadehde kan en Siohwa nan Brooklyn, New York. Ni ahnsou me ara pahpa nohno anahne sawas, pwutak ko oh ara pwoud ko pwurala sapwarailo pwehn kilang dahme anahn. Pwopwoud me iang doadoahk en misineri medemedewe laud ira en pwilikihdi ara doadoahk pwehn kohla apwalih ara pahpa nohno. Ahpw elder kan nan mwomwohdiso me ara pahpa nohno kin iang delepwohnla rehra. Elder ko koasoiapenehier duwen irairo oh mwahuki misineri ko ira en mihmihte nan ara doadoahk. Elder ko kalahnganki ahn pwopwoudo ara doadoahk oh pein toukihda ren sewese apwalih ara pahpa nohno. Peneineio pwon kalahnganki ahn elder ko arail kasalehda limpoak oh nsenoh.

12. Ni emen eh wiahda pilipil ehu en apwalih me mah kan, dahme peneinei en Kristian kan anahne tehk mwahu?

¹² Sohte lipilipil dahme peneinei en Kristian ehu pilada pwehn apwalihki anahn kan en arail pahpa nohno me mahlahr kan, koaros anahne tehk mwahu me arail pilipil kan kin kawauwih mwaren Koht. Kitail uhdahn sohte men duwehte kaun en pelien lamalam kan ni mwehin Siseso. (Mad. 15:3-6) Ahpw kitail men kawauwih Siohwa oh mwomwohdiso.​—2 Kor. 6:3.

PWUKOAHN MWOMWOHDISO

13, 14. Ia duwen Paipel eh kasalehda me mwomwohdiso kan anahne apwalih me mah kan?

¹³ Kaidehn koaros kak sewese irail kan me kin doadoahngki pali laud en arail ahnsou ong papah Siohwa duwehte mwomwohdiso me kitail koasoiapenehier mwoweo. Ahpw Paipel kasalehda me mwomwohdiso kan anahne wia uwen me re kak pwehn sewese irail me mah lelepek kan. Nan mwomwohdiso en Serusalem ni mwehin wahnpoaron ko, “sohte mwahn emen nanpwungarail me anahnehda mehkot.” Met sohte wehwehki me koaros kepwehpwe. Ekei irail semwehmwe, ahpw “mwohni ko kin nehnehiong emenemen nin duwen eh anahn.” (Wiewia 4:34, 35) Ahpw mwuhr, mie kahpwal laud ehu nan mwomwohdiso. Ekei liohdi kan sohte “nehnehiong” mwenge ko rehrail. Eri dahme wahnpoaron ko wia? Re pilada ohl koahiek kei pwehn tehk mwahu me liohdi pwukat alehdi mwenge itar ong irail ni pahrek. (Wiewia 6:1-5) Met anahn pwehki ni Pendekos en pahr 33, mehn liki tohto wiahla Kristian kei oh mi nan Serusalem pwehn kakehlakahda arail pwoson. Eri mendahki nehnehn mwenge kin wiawi ni ahnsou mwotomwot, ahn wahnpoaron ko pilipil kasalehda me mwomwohdiso kan kak sewese apwalih anahn en Kristian mah lelepek kan.

¹⁴ Pohl kawehwehiong Timoty ahnsou dah me konehng mwomwohdiso en sewesehki liohdi Kristian kan arail anahn en kepwe kan. (1 Tim. 5:3-16) Koht ketin kamwakid Seims en ntingihedi me Kristian kan ahneki pwukoa en apwalih me sepwoupwou kan, liohdi kan oh meteikan me mi nan apwal. (Seims 1:27; 2:15-17) Wahnpoaron Sohn pil nda: “Ma aramas kepwehpwe men me kilangada apwal en [“rie,” NW], ahpw ritingedihsang rie eh mohngiong, ia duwen eh pahn kak nda me e poakohng Koht nan eh mohngiong?” (1 Sohn 3:17) Eri ma emenemen Kristian ahneki pwukoa en apwalih irail me anahne sawas, mwomwohdiso kan pil ahneki pwukoa wet.

15. Ni atail kin apwalih Kristian mah kan, soahng dah kan me met pidada?

¹⁵ Nan ekei sahpw, pali en koperment ele kin kihda mwohni de prokram en sawas teikan pwehn sewesehki me mah kan. (Rom 13:6) Nan ekei sahpw, soangen prokram pwukat sohte mie. Eri uwen sawas me peneinei kan oh mwomwohdiso kan kihda pahn pid dahme anahn ong irairo. Ma seri kan me mi nan padahk mehlel me mi dohsang arail pahpa nohno, met kak kahpwalihala arail pahn kak sewese irail. Seri kan anahne koasoiong elder kan nan mwomwohdisohn arail pahpa nohno kan pwehn tehk mwahu me koaros wehwehki irair en arail peneinei. Karasepe, elder kan ele kak sewese pahpa nohno en seri ko rapahki sawas dah kan me pelien koperment kak kihong me mah kan. Ele re pil tehkada soahng kan me seri ko anahne ese, duwehte kisinlikou kesempwal kan me re saikinte wadek de wini kan me pahpa nohno ko saikinte ale. Ma seri ko oh elder kan kin koasoiahpene soahng pwukat ni sansal, ele irail kak diar sawas ong dahme re kak wia. Ni emen me kousoan karanih me mah ko sewese de kihda kaweid ong tohn peneineio me mi uhdahn doh, met kak irehdi kahpwal ehu en dehr laudla, oh peneineio ele sohte pahn nohn pwunod.

16. Ia duwen ekei Kristian kan ar kin sewese me mah kan nan mwomwohdiso?

¹⁶ Pwehki ekei Kristian kin poakohng me mah pwukat, re kin toukihda arail ahnsou oh kehl pwehn sewese irail ni ahl sohte lipilipil me re kak. Re kin kasalehda ni sansal arail nsenohki laud me mah kan nan mwomwohdiso. Ekei irail me toukihda arail sawas kin nehkpeseng pwukoa kan rehn meteikan nan mwomwohdiso oh apwalih me mah kan ni arail kin weliweliali. Mendahki re sohte kak doadoahngki pali laud en arail ahnsou ong papah Siohwa, riatail Kristian pwukat ele kak sewese nein me mah ko neirail seri kan en mihmihte nan arail doadoahk kan. Madamadau en Kristian pwukat inenen mwahu! Ni mehlel, sohte lipilipil uwen sawas me meteikan kihda, seri kan pwukoahkihte wia dahme re kak ong arail pahpa nohno kan.

KAWAUWIHKI ME MAH KAN LOKAIAHN KANGOANG

17, 18. Soangen madamadau dah me pahn kamengeihala atail apwalih me mah kan?

¹⁷ Me mah kan oh me kin apwalih irail kak kamengeihala kahpwal ehu ni arail kin ahneki madamadau pwung. Ni emen eh kin mahla, ekei pak met kin kahrehiong ih en mworusala de pil nsensuwed laud. Eri nanti laud anahn pwehn kawauwih de kangoange riatail Kristian mah kan. Ia duwen omw kak wia met? Koasoia soahng mwahu kan. Irail me mah pwukat kin kolokolte arail lelepek ong Siohwa oh kitail anahne kapinga irail. Siohwa sohte kin ketin manokehla soahng koaros me re wiahdahr pwehn papah ih. Kitail en pil wia duwehte.​—Wadek Malakai 3:16; Ipru 6:10.

¹⁸ Doadoahk en ehuehu rahn pahn mengeila ma koaros kin kak kamwanpene. (Ekl. 3:1, 4) Pil ehu, me mah tohto kin song wia uwen arail kak pwehn dehr nohn sakone me kin apwalih irail. Re wehwehki me meteikan pahn tehk irail de kohla mwemweit rehrail ma re kin kadek. Me tohto me kin mwemweitla rehn me mah kan kalapw nda, “I kohla pwehn kangoange kompoakepahi me mah men, ahpw ngehi me uhd kin paiekihda kangoang sang reh.”​—Lep. Pad. 15:13; 17:22.

19. Dahme kak sewese me pwulopwul oh me mah ren kehlailte erein ahnsou apwal kan?

¹⁹ Kitail kin kasikasik rahno me mahla, lokolok oh soh unsek pahn imwisekla. Lao lel ahnsowo, sapwellimen Koht ladu kan anahne medemedewehte arail koapworopwor ong ahnsou kohkohdo me pahn mihmi kohkohlahte. Atail pwoson sapwellimen Koht inou kan kin kakehlaka kitail erein ahnsou apwal kan. Pwehki kitail ahneki pwoson, kitail ‘sohte kin uhdi, pwe mehnda ma paliwaratail luhluwetala, a loalatail kin kekehlailla rahn koaros.’ (2 Kor. 4:16-18, NW; Ipru 6:18, 19) Dahme pil kak sewese irail kan me ahneki pwukoahn apwalih me mah kan? Kitail pahn koasoiapene ekei soangen sawas kan nan iren onop en mwuhr.