Sewese Irail Me Pwoudki Sounkadehde kan Ahpw Soh-Pwoson
1 E inenen kaperen ahnsou me pwopwoud kan kin miniminpene ong kaudok mehlel. Ahpw nan ekei pwopwoud kan, emente kin iang pwoson. Iaduwen kitail kak sewese irail me pwoudki Sounkadehde men ahpw soh-pwoson en men iang kitail kaudokiong Siohwa?—1 Tim. 2:1-4.
2 Wehwehki Arail Madamadau: Mendahki ekei me kin pwoudki Sounkadehde men ahpw soh-pwoson kin uhwong, pali laud en ahnsou kahrepen irail sohte kin iangala arail pwoud kan iei pwehki soukautih de sawehwe. Mwein emen pahn pehm me ah pwoudo kahng en iang ih de e kin luwak pwehki eh pwoudo diarada mehkot me likamwete e kin nsenohki laud sang ih. Emen ohl pwopwoud koasoia: “I kin kelekelepw nan imwahto oh I kin sangat.” Emen ohl pwopwoud tohrohr koasoia: “I pehm me ahi pwoud oh nei seri kan kin kohkohsang ie.” Ekei ohl kan kin lemeleme me arail peneinei kesehla irail pwehki pelien lamalam. (Kilang Watchtower (lokaiahn wai) en August 15, 1990, pali 20-23.) Ihme kahrehda, e pahn mwahu ma ohl pwopwoudo kin iang ah pwoudo onop sang nin tepio.
3 Sawaspene Nanpwungamwail: Ehu pwopwoud en Sounkadehde kin sawaspene pwehn sewese pwopwoud kan en iangala padahk mehlel. Mwurin sistero kin tepiada onop rehn lih pwopwoudo, brothero pahn kohla tuhwong ohlo. E kin wia met pak tohto, oh imwikihla tepiada onop Paipel rehn ohl pwopwoudo.
4 En Kadek oh Kasamwo Mehteikan: Peneinei kan nan mwomwohdiso kak sawas ni arail pahn nsenohki peneinei kan me ekei arail tohnpeneinei kan saikinte iangala padahk mehlel. Ma tohnmwomwohdiso pahn mweimweitla rehn tohnpeneinei kan me saikinte iangala padahk mehlel, irail pahn kilang me Sounkadehdehn Siohwa kan kin wia Kristian kadek oh mwahu kan me kin nsenohki aramas teikan.
5 Ekei pak, elder kan pahn tehk ma tohnmwomwohdiso kin nantiong sewese irail me pwoudki Sounkadehde kan ahpw soh-pwoson oh dahme kitail kak wia pwehn sewese irail en iangala palien Siohwa.—1 Piter 3:1, ftn.