Koasoia Duwen Siohwa Rahn Koaros
1 Aramas kin kalap koasoia duwen dahme re kin poakpoake, pwe ewen aramas kin kapwadewei dahme audepen nan eh mohngiong. (Luk 6:45b) Dahme ke kin poakpoake? Sounmelkahka ntingihdi: “I ahpw pahn patowan lohkiseli sapwellimomwi pwung, oh pahn kin kapinga komwi sang nimenseng lel nipwong.” (Melkahka 35:28) E kin uhdahn kalahngan ong Siohwa oh kin kesempwalki pwais kaselel me e ahneki en koasoia duwen Koht oh kapinga ih ahnsou koaros. Pwehki sounmelkahkao kin karanih Siohwa, e kak kalahnganki soahng tohto. (Melkahka 35:9) Iaduwen ke kak kalimengih sounmelkahka menet?
2 Koasoia Duwen Siohwa Nan Imwomw: Nanpwungen tohnpeneinei, e konehng kitail en koasoia duwen Siohwa. Pahpa oh nohno kan me kin poakohng laud Siohwa pahn koasoia duwen Ih ni soahng koaros me re pahn wia. (Deud. 6:5-7) Ni ahnsou me pahpa oh nohno pahn koasoia duwen Siohwa, neira seri kan pahn kilang me pahpa oh nohno kin mourki ara pwoson oh kesempwalki kosonned en Koht. Seri kan pahn uhd kilangwong arail onop en peneinei nin duwen kasalepen ahn pahpa oh nohno loaloapwoat ong Siohwa.—2 Pit. 3:11.
3 Koasoia Duwen Siohwa Ong Riomw Kan Ni Pali Ngehn: Erein wihk kan koaros, mie ahnsou laud en medemedewe duwen mwengehn ngehn. Mie soahng ngehnin tohto me kitail kak koasoia. (Luke 6:45a) Mie mehkot ke sukuhliki sang ahmw onop de wadawad en Paipel me ke perenki? Kasalehong riomw kan, ihme pahn sewese irail en kalaudehla arail limpoak ong Siohwa.—Melkahka 35:18; Ipru 10:24.
4 Koasoia Duwen Siohwa Ong Aramas Teikan: Rahn koaros, kitail kin koasoiong aramas—ni ahmw wasahn doadoahk, nan sukuhl, de ahnsou me kitail kin tuhwong atail peneinei me sohte iang padahk mehlel—e pahn mwahu ma e pahn sansal ong mehteikan me kitail mwohnki ahnsou koaros men kadehde duwen Siohwa. Atail lokaia sohte pahn dirkihla lokaia suwed oh lemei oh kamedek duwehte aramas en sampah wet, kitail pahn kapinga Koht. Rahn koaros, ahnsou koaros, kitail en koasoiaiong mehteikan duwen rongamwahu me Siohwa kehkehlikiong kitail en kalohki.—Wiewia 5:42; Kolose 4:6.
5 Nin duwen tohnkaudok en Siohwa, kitail anahne isaneki ahnsou mwahu kan koaros pwehn koasoi duwen atail Koht, Siohwa.—Melkahka 106:47.