Mie me Nsenohki Ahmw Sohte Iang Mihding Kan!

¹ Ekei pak kitail kin katiasang mihding ehu de tohto sang oh kak pehm me ‘mehteikan sohte pahn kin katapankin ie; irail sohte pahn tehk ma I sohte iang.’ Madamadau wet sohte mehlel! Duwehte kakon koaros nan paliwar, emen emen kitail me kesempwal nan mwomwohdiso. (1 Kor. 12:⁠12) Ma kitail katiasang mihding pak ehu de tohto sang, e pahn kak kauwehla pali ngehn en riomw kan me kin iang towehda mihdingo. Ma ke katiasang towehda, ke en wehwehki me​—⁠mie me kin nsenohki ahmw sohte iang mihding!

² Kesempwalpen Ahmw Iang Mihding Koaros: Pohl men miniminiong rie kan ni pali ngehn. Rom 1:​11, 12 kin kawehwe dahme kahrehda: “Pwe I en kak kihong kumwail kapai ehu ong pali ngehn mehn kakehlakai kumwail. Eri, met wehwehki me kitail pahn sawaspene, amwail pwoson en sewese ie, oh ei pwoson en sewesei kumwail.” E pil duwehte rahnwet, atail pasepeng kan nan mihding kan, oh ahnsou me kitail kin wia padahk oh kamwomwada kan, oh pil ihte atail iangete towehda mihding pahn kangoange mehteikan en nantiong wia uwen me kitail kak pwehn papah Siohwa ni lelepek.​—⁠1 Deselonika 5:​11.

³ Ke kin men tuhwong riomw kan ahnsou me ke kin iang towehda mihding kan en mwomwohdiso? Ke kin rong kanaieng arail pasepeng kan oh kin kalahnganki arail kin kasalehda arail pwoson. Arail kisakis en pali ngehn kan kin wia mehn kangoang laud. Ma tohnmwomwohdiso teikan sohte kin iang mihding, ke pahn nda me ke luhs sang mehkot kesempwal. Riomw brother oh sister teikan kin ahneki soangen pepehmohte ni ahnsou me ke sohte iang towehda mihding.

⁴ Kesempwalpen Mihding kan: Rahn teio, The Watchtower koasoia duwen kesempwalpen mihding kan pwe kitail en kehlail ni pali ngehn ni e koasoia: “Nan sampah wet me liseliping oh kin dirkihla tiahk suwed, mwomwohdiso en Kristian wia wasahn ruk . . . , wasahn ruk me dirkihla popohl oh limpoak. Ihme kahrehda, kitail anahne iang mihding koaros kaukaule.” (w93 8/15 11) Rahn koaros, kitail kin lellong kasongosong me kin kaluwetala atail pali ngehn. Ma kitail sohte kin kanaieng, kitail kak kedirepwkin pein atail kapwunod kan lao kitail sohla kin nsenohki kesempwalpen kakehlail atail pali ngehn. Kitail koaros anahne mehteikan pwehn kangoange emen emen kitail pwehn ahneki minimin oh eimah ni atail kin papah Koht.​—⁠Ipru 10:24, 25.

⁵ Atail iang towehda mihding kaukaule me inenen kesempwal. Mwein soumwahu de mehkot kesempwal tohrohr pahn kahrehda kitail sohte pahn iang mihding ekei pak. Ahpw, likin kahrepe pwukat, kitail en nantiong iang mwomwohdiso en kapinga Siohwa ahnsou koaros!​—⁠Melkahka 26:12.