Kapinga Siohwa Ehuehu Rahn
1. Dahme sapwellimen Koht ladu kan kin men wia, oh pwekida?
1 Nanmwarki Depit kin kasalehda me e pahn kapinga Siohwa “ahnsou koaros kohkohlahte.” (Mel. 145:2, 7, 21) Kitail pil ahneki kahrepe tohto en kin kapinga Siohwa ehuehu rahn.—Mel. 37:10; 145:14, 18; 2 Pit. 3:13.
2. Ia duwen peneinei kan ar kak kapinga Siohwa ehuehu rahn?
2 Nan Imwatail: Mie neitail pwuhk kan me kin sewese kitail en koasoia duwen Koht oh Paipel ni ahnsou me kitail kin wia iren rahn, Kaudok en Peneinei, oh kaunopada ong mihting kan en mwomwohdiso. Peneinei tohto kin nantihong mwengepene pak ehu de tohtohsang nan ehuehu rahn. Met kin wia ahnsou ehu me irail sohte anahne karuwaru ahpw ahneki ahnsou mwahu en koasoipene oh kapinga Siohwa. Soangen koasoi pwukat me pahpa oh nohno kin tepida koasoia kak sewese ira en kakairada neira seri kan “ni kaiahn oh madamadau en Siohwa.”—Ep. 6:4; Deud. 6:5-7.
3. Soangen ahnsou dah kan mie ni ahnsou me kitail kin mi rehn riatail kan?
3 Rehn Riatail kan: Ni ahnsoun kalohk oh mihting kan en mwomwohdiso, mie ahnsou mwahu tohto me kitail kak kapinga Siohwa rehn iangatail Kristian akan. (Lep. Pad. 15:30; Pil. 4:8; Ipru 13:15) Pwehki kitail koaros kin poakohng Siohwa, e kin mengei en koasoiapene nanpwungatail atail kalahnganki kupwuramwahu en Siohwa.—Mel. 106:1.
4. Nan soangen irair dah kan me ke pil kak kapinga Siohwa?
4 Ahnsou me Kitail Kin Koasoiong Meteikan: Mendahki ma atail irair kan sohte kin mweidohng kitail en iang kalohk ong wehipokon ehuehu rahn, kitail kak koasoiaiong iangatail tohndoadoahk kan, tohnsukuhl kan, oh meteikan duwen Siohwa oh kupwure kan, oh met kak kihong aramas mohngiong mehlel kan koapworopwor. (Mel. 27:14; 1 Pit. 3:15) Emen sister me iang sompihr kak kalohk ong emen lih me pil iang sompihro. Liho perenkihda dahme e rong kahrehda e kihong sistero nah adres oh nempe en telephone pwe ira en kak pwurehng koasoipene. Nin duwen kahpwal kan en sampah wet ar kin susuwedla, sapwellimen Siohwa aramas akan kin pousehla en ehukihong irail kan me kin perenki rong “rongamwahu.” Met kin kihong meteikan koapworopwor oh kamwakid irail en pil kapinga Siohwa.—Ais. 52:7; Rom 15:11.
5. Dahme kahrehda kitail men kapinga Siohwa? Kamwahu dahieu atail kin kapinga Siohwa kak wia?
5 Siohwa kin inenen kupwurperenki karonge sapwellime kan ar kin kapinga ih ehuehu rahn! Duwehte sapwellimen Siohwa kapikipik teikan me kin kapinga ih, kitail pil men kapinga ih ehuehu rahn nan imwatail kan, nan mwomwohdiso, oh ni ahnsou me kitail kin koasoiong meteikan me saikinte iang kitail kapinga Siohwa.—Mel. 19:1-4.