Tohrohrla Pwehn Wiahla Sounkaping Peren Kan
“Kapinga Jah! Kumwail sapwellimen Kauno (Siohwa) ladu kan, kumwail kapinga mware.”—MELKAHKA 113:1.
1, 2. (a) Nin duwen Melkahka 113:1-3, ihs me warong atail kaping kan? (b) Oh peidek dahieu, e konehng kitail en wia?
SIOHWA KOHT iei Sounkapikada Lapalap en nanleng oh sampah, atail Kaun ni ahnsou kohkohlahte. E inenen warong kitail en kapinga ih. Ihme kahrehda Melkahka 113:1-3 padahkiong kitail en wia met: “Kapinga Jah, Kumwail sapwellimen Kauno ladu kan, kumwail kapinga mware! Kapingpen mware en wiawi, met oh pil kohkohlahte. Sang palimese lel palikapi kumwail kapinga mwaren Kauno.”
2 Nin duwen sapwellimen Koht Sounkadehde kan, kitail kin perenkihda wia met. Inenen kaperen pwe Siohwa Koht pahn ni ahnsou keren kahrehong koul en kaping wet me kitail kin kokoul en kadirehla sampah pwon! (Melkahka 22:27) Ngihlomw kin iang pwihn en koul wet nin sampah pwon? Ma ei, ken tohrohrsang sampah pingiping wet!
3. (a) Dahme kahrehda sapwellimen Siohwa aramas kin weksang aramas teikan? (b) Ni ahl daheki kitail kin tohrohrsang sampah wet?
3 Atail kin ehupene kapikapinga Siohwa kin karehong kitail en tohrohrsang aramas teikan. Atail koasoi oh padahk kan kin parekpene oh kitail pil kin doadoahngki wiepeohte en lohkiseli ‘duwen wiewia mwahu en limomwi kan koaros.’ (Melkahka 145:7) Ei, nin duwen sapwellimen Siohwa aramas inouda kan, kitail tohrohrla pwehn papah atail Koht, Siohwa. Koht padahkiong sapwellime aramas inouda kan en mahs, mehn Israel kan, en katohrohrsang wehi kan me kapilpene irail pwen dehr saminkihla wiewia kan en wehi pwuko. (Eksodus 34:12-16) E ketkihong sapwellime aramas akan kosonned akan pwen sewese irail. Duwehte nan rahnpwukat, Siohwa ketkihong kitail sapwellime Mahsen Sarawi, iei Paipel. Kaweid pwukat kin kasalehong kitail iaduwen kitail kak katohrohrsang sampah wet. (2 Korint 6:17; 2 Timoty 3:16, 17) Kitail sohte kin duwehte irail kan me kin kousoan nan ihmw kan, tohrohrsang aramas teikan, duwehte padire kan oh lih kadek kan en Papilon Lapalap kin wia. Kitail kin kahlemengih Sises, Sounkapinga Siohwa nan wasahn pokon kan.
Kahlemengih Sapwellimen Siohwa Sounkaping Lapalapo
4. Iaduwen Sises wia kahlemeng mwahu en kapinga Siohwa?
4 Sises sohte kesehla sapwellime doadoahk en kapinga Siohwa. Met kin katohrohr ih sang sampahwet. Nan wasahn kaudok kan oh nan tehnpas sarawi nan Serusalem, e kin kapinga sapwellimen Koht mwar sarawi. Pohn nahna kan de ni oaroar kan, wasa koaros me aramas pahn pokon ie, Sises kin kalohki sapwellimen Siohwa padahk mehlel kan ong wehi pokon. E mahsanih: “Semei, Kaunen nanleng oh sampah! I kapingahkin komwi [ong wehi pokon].” (Madiu 11:25) Ni ahnsou me e kopwung mwohn Pontius Pailet, Sises kadehdehda: “Ong ni kahrepe wette me I kohkidohng sampah, pwe I en kadehdehda duwen me mehlel.” (Sohn 18:37) Sises kin kalahnganki kesempwalpen eh doadoahk. Wasa koaros e kin kohla ie, Sises kin kadehdehong aramas teikan duwen Siohwa oh kin kapinga ih.
5. Pwuhken en Melkahka 22:22 kin kadoadoahkong ihs, oh soangen madamadau dah kitail pil anahne ahneki?
5 Nan Melkahka 22:22, kitail diarada kokohp wet me pid sapwellimen Siohwa Sounkaping Lapalap Menet: “I pahn koasoiaiong nei aramas akan duwen wiepen nin limomwi kan; I pahn kapinga komwi nan pokon en aramas akan.” Oh nan Ipru 2:11, 12, wahnpoaron Pohl kadoadoahkong iren Paipel pwukat ong Kaun Sises oh irail akan me Siohwa kasarawi en mour nanleng. Duwehte ih, irail sohte kin namanengki kapinga mwaren Siohwa nan pokon en aramas akan. Kitail kin ahneki soahgnen madamadau wet ni ahnsou kitail kin iang towehda atail mihding kan? Atail ngoangki iang mihding kan, oh iang pasepeng kan kin kapinga Siohwa. Ahpw atail kaping kan kin wiawi ihte ni ahnsou me kitail kin iang mihding kan?
6. Doadoahk dahieu Sises kihong sapwellime tohnpadahk kan, oh iaduwen irail kan me kin poakohng marain kin kapinga Koht?
6 Nin duwen Madiu 5:14-16, Kaun Sises padahkiong sapwellime tohnpadahk kan en mweidong arail marain en sansalda mwohn aramas teikan oh mehteikan pil pahn kapinga Siohwa. E mahsanih: “Kumwail me kamarainpen Sampah. . . . Ih pil duwen kumwail, amwail marain en sansal mwohn aramas akan pwe re en kilang amwail wiewia mwahu kan oh kapikapingahki Samamwail me ketiket nanleng.” Aramas akan me kin poakohng marain kin kapinga Koht. Ahpw irail kin ihte wia mwahu ong mehteikan? Soh, ahpw irail kin kapinga Siohwa nin duwen pwihn ehu me kin miniminpene. Ehi, irail kan me kin poakohng marain, kin inoukihong ahr mour ong Koht oh wiahla sapwellime sounkaping peren kan?
Peren me Kohsang Kapikapinga Siohwa
7. Dahme kahrehda sapwellimen Siohwa sounkaping kan kin pereperen, oh peren dah irail ahneki ni rahn en Pendekos 33 C.E.?
7 Dahme kahrehda sapwellimen Siohwa sounkaping kan inenen peren? Pwehki peren iei wahn ngehnen Koht. Nan Kalesia 5:22, e kairekdi mwurin limpoak. Sapwellimen Sises tohnpadahk kan nan tepin pahro kin kasansalehda wahn ngehnen Siohwa. Oh pil, nan rahn en Pendekos 33 C.E., ni ahnsou me Koht ketkihong pohn sapwellimen Sises tohnpadahk mpen aramas 120, sapwellimen ngehn sarawi irail koaros tepida kapinga Siohwa ni lokaia tohrohr kan. Mehn Suhs kei me poadidi oh me kohsang wehi tohto kohdohng Serusalem oh ‘irail pwuriamweikihla.’ Re ahpw nda: “Ia duwen atail rongorong arail lokolokaiahki lokaiahn sapwatail kan me pid duwen manaman kapwuriamwei kan me Koht ketin wiadahr!” (Wiewia 2:1-11) Ia imwilahn kapikapinga Siohwa ni lokaia tohto? Mpen aramas 3,000 mehn Suhs akan oh irail akan me kin iangala mehn Suhs akan ahr kaudok, irail aramas pwukat me tepida kamehlele rongamwahu en Wehio me pid duwen Mesaia. Irail papdaisla, alehdi ngehn sarawi, oh nantiong iang kapinga Siohwa. (Wiewia 2:37-42) Met inenen kapai ehu!
8. Mwurin Pendekos, dahme Kristian akan wia pwen kalaudehla ahr peren?
8 Ripoht pousehla: “Rahn koaros re kin tuhpene wiahki ehu nan Tehnpas Sarawio, oh kin ehupene nan imwarail kan ni ar kin sakpene oh pilitikihpeseng pilawao ni peren oh aktikitik. Re ahpw kin kapikapinga Koht oh kenikenla rehn aramas koaros. Eri, ni rahn koaros Kauno kin ketin kapatahiong pwihn wet irail kan me pahn ale komourparail.” (Wiewia 2:46, 47) Irail kin ihte perenki ahr kin pokonpene oh mwengepene? Soh, ahr peren kohsang ahr kapikapinga Siohwa Koht rahn koaros. Oh ahr peren lalaudla ni ahnsou me re kilang aramas kid kei mwekidki ahr padahk kan en kamour. Met duwehte kitail nan rahnpwukat.
Sounkaping Peren kan me Kohsang Wehi Koaros
9. (a) Iahd oh iaduwen Koht tepida mweidong aramas sang nan wehi koaros en rong sapwellime rongamwahu? (b) Dahme kahrehda ngehn sarawi wadekedi pohn Kornilius oh ienge kan mwohn irail pepdaisla?
9 Siohwa sohte kupwureki doadoahk en kamarainih aramas teikan en sapwellime ladu kan en kohwong ehute wehi. Ihme tepda nan pahr 36 C.E., E ketkihong aramas me kohsang wehi koaros ahnsou en rong sapwellime rongamwahu. Koht kaweidkin Piter en kohla ni ihmwen Mehn Liki, emen opiser en sounpei nan Sasaria. E tuhwong Kornilius oh kompoakepa keren kan iangahki eh peneinei. Irail rong kanahieng dahme Piter mahsanih, oh re tepida pwosonla Sises sang nan mongiongarail kan. Iaduwen kitail ese met? Pwehki sapwellimen Koht ngehn sarawi widekedi pohn irail Mehn Liki pwoson akan. Kisakis en sapwellimen Koht ngehn sarawi kin kohwong emen mwurin emen pahn pepdais, ahpw ni ahnsowo, Siohwa men kasalehda me e kupwureki aramas pwukat me kaidehn mehn Suhs akan mwohn irail pahn pepdaisla. Pwe, ma Siohwa sohte wia met, Piter sohte pahn ese ma Koht ni ahnsowet kin tepida alehda mehn Gentile kan en wiahla sapwellime ladu kan oh irail pil kakong en pepdaisla.—Wiewia 10:34, 35, 47, 48.
10. Kokohp dah kei sangete mahs me kohpada duwen aramas akan sang nan wehi koaros pahn kapinga Siohwa?
10 Sang mahs mahsie, Siohwa kohpadaher me aramas akan sang wehi koaros pahn kapinga ih. E pahn sapwellimaniki sounkaping peren kan me pahn kohsang sahpw koaros. En kadehde duwen ire wet, wahnpoaron Pohl koasoia duwen kokohp pwukat me kohsang Pali Nting en Ipru. E padahkiong mwomwohdiso en Kristian nan Rom: “Eri, kumwial kasamwo nan mohngiongimwail riamwail Kristian akan ong ni lingan en Koht, nin duwen Krais eh ketin kasamwokumwailehr nan kupwure. Pwe I ndaiong kumwail me Krais ketin wiahla ladun mehn Suhs akan pwe en ketinkasalehda loalopwoat en Koht, oh kapwaiada inou kan me Koht ketin wiahiong samarail kahlap ako, oh pil pwe mehn liki en kak kapinga kalahngan en Koht. Nin duwen Pwuhk Sarawi eh mahsanih [nan Melkahka 18:49]: “Eri, I pahn kin kapinga komwi rehn mehn liki kan, I pahn koul oh kapinga mwaromwi.” Pwuhk Sarawi pil mahsanih [nan Deuderonomi 32:43]: “Kumwail mehn liki kan, kumwail iang sapwellimen Koht aramas akan perenda oh ngisingis!” Oh e pil mahsanih [nan Melkahka 117:1]: “Kumwail mehn liki kan koaros, kumwail kapinga Kauno [Siohwa], kumwail aramas akan koaros kumwail kapinga ih!”—Rom 15:7-11.
11. Iaduwen Koht sewese aramas akan sang wehi koaros en sukuhliki duwen sapwellime padahk mehlel kan, oh imwikihla dah?
11 Aramas akan sohte kak ni minimin kapinga Siohwa ma irail sohte pahn koapwoaroapwoarki Sises Krais, Meno me Koht idiada en kaunda pohn aramas me kohsang wehi koaros. Pwen sewese irail en kalahnganki sapwellime padahk mehlel kan me kin kaluwalahng mour soutuk, Koht ketin wiahda prokram en kasukuhl nin sampah pwon. E kin kihda kaweid sang sapwellime pwihn en ladu lelepek. (Madiu 24:45-47) Dahme met imwikihla? Dauli me aramas limarar ngisingiski oh kin kapinga Siohwa nan sahpw akan me daulihlahr 230. Oh aramas rar kei likin aramas pwukat kin tepida kasalehda me re kin perenki e iang wia met. Tehk duwen ia uwen tohtohn me iang tohwehda Katamano nan pahr 1996: 12,921,933. Inenen kaselel!
Kokohpen Pokon Kalaimwun Ehu en Sounkaping Peren kan
12. Kapoudiahl dahieu me wahnpoaron Sohn kilangada, oh ia wehwehn kapoudiahl wet?
12 Nan kapoudiahl ehu, wahnpoaron Sohn, kilangada “pokon kalaimwun ehu” me kohsang nan wehi koaros. (Kaudiahl 7:9) Ia oaralap en kaping me pokon kalaimwun wet kin iang sapwellimen Koht luwen me keidi kan kokoulki? Sohn padahkiong kitail: “Komourpat pwilisang rehn at Koht, me ketiket nan mwoale, oh sang rehn Sihmpwulo!” (Kaudiahl 7:10) Kaping wet kin lohkseli ni eimah wasa koaros nin sampah. Oaloahlki tehn paini kan me wehwehki atail ehukihpene kapinga Koht nin duwen Kaunepen Lahng oh Sampah oh ni pereperen wekada mwohn nanleng oh sampah me “kitail pwukoahkin” atail kamourala reh oh sapwellime Ohl, Sihmpwulo, Sises Krais. Ei, wahnpoaron Sohn inenen perenkihda e kilang nan kapoudiahl wet pokon kalaimwun ehu! Oh ia uwen kaperen ong kitail nan rahnpwukat en kilang oh pil iang dahme wahnpoaron Sohn kilangada nan kapoudiahl mahs!
13. Dahme kin katohrohrla sapwellimen Siohwa aramas akan sang sampahwet?
13 Nin duwen sapwellimen Siohwa ladu kan, kitail kin suweiki kadehde duwen mware. (Aiseia 43:10, 12) Pwehki kitail wia Sounkadehdehn Siohwa kan, kitail kin weksang sampahwet. Ia uwen kaperen en kadehde mwaren Koht oh wia sapwellimen Koht doadoahk sarawi nin duwen atail mehn akadei nan mouritail! Kupwur lapalap en Siohwa en kasarawihla mware sarawi oh en kawauwihla sapwellime kaunda unsek en lahng oh sampah ki Wehio kin kihong katepen atail mour. Oh e ketin sewese kitail en ahneki pwais ehu nan sapwellime kupwur sarawi me pid duwen mware oh Wehio. E ketin wia met ni ahl silu.
Pwukoahki Padahk Mehlelo
14, 15. (a) Ia ehu ahl Koht ketin sewese kitail en ahneki ehu pwais nan sapwellime kupwur sarawi me kin pid duwen mware oh Wehio? (b) Iaduwen Wehio me kokouda nan pahr 1914 C.E. wiksang mehteio me pwupwudi nan pahr 607 B.C.E.?
14 Keieu, Siohwa likihong sapwellime aramas akan padahk mehlel. Kasansal me keieu kaperen iei me sapwellime Wehio tepida kakaun nan 1914. (Kaudiahl 12:10) Koperment en nanleng wet weksang wehio me mih nan Serusalem en mahs, wasa me nanmwarki en kadaudok en Depit kin kakaun ie. Wehi wet pwupwudi, oh nan pahr 607 B.C.E., Serusalem pwon mihla pahnangin kaundahn manaman en Mehn Liki kan. Wehi kapwo me Siohwa kauwada nan pahr 1914, kin mihmih nanleng me sohte pahn lohdi pahn ehu mwehi likin Siohwa, oh pahn mihmi kohkohlahte. (Daniel 2:44) Pil ehu, eh kaunda pahn weksang kaunda teikan. Iaduwen? Kaudiahl 11:15 mahsanih: “Atail Kauno oh sapwellime Mesaia uhd sapwellimankiher manaman en kaunda sampah ahnsou wet, oh e pahn ketin kaunda erein dih koaros kohkohlahte!”
15 “Atail Kauno oh sapwellime Mesaia” kin kaunda pohn sampah pwon. Lepin lokaia kapw pwukat me pid kaundahn Siohwa, me ong Sapwellime Ohl oh rien Sises meh 144,000, pali laud en irail iasadalahngehr nanleng, oh sohte pahn wia mehkot me aramas akan pahn koasoiapene pwehn peikasalki. Soh, Wehin nanleng iei koperment mehlel ehu. Oh atail koapwoaroapwoar kaperen en mour soutuk ni unsek pwehki wehi wet kin kihong kitail kahrepe mwahu en pousehla pereperen. En pwukoahki padahk mehlel pwukat en sapwellimen Siohwa mahseno kin kamwekid kitail en ahnsou koaros koasoiaiong aramas teikan duwen wehio. (Melkahka 56:10) Ke kin kaukaule padahkiong koaros me Sapwellimen Koht Wehin Mesaia kin wia kakaun sang nanleng ni ahnsowet?
Ale Sawas sang Ngehn Sarawi oh Pirien en Pali Ngehn nin Sampah Pwon
16, 17. Ia kariau oh kesiluwen ahl akan me Koht ketin sewesekin kitail pwen kitail en kak ahneki pwais nan sapwellime kupwur sarawi?
16 Kariau en ahl me Koht kin ketin sewese kitail en ahneki pwais ehu nan sapwellime kupwur sarawi kapwarehda iei sang sapwellime ngehn sarawi, me kin sewese kitail en wah mwahu nan atail mour oh kenikenla reh. (Kalesia 5:22, 23) Pil, Pohl ntingwong Kristian me keidi kan: “Kitail aleier . . . Ngehn Sarawi me Koht ketin poaronehdo pwe en ketin kehsehkin kitail mehkoaros me Koht ketikihong kitail.” (1 Korint 2:12) Sang ni atail pahn mwekidki ngehn sarawi en Siohwa, kitail koaros kak esehla oh wehwehki soahng mwahu koaros e ketikihong kitail—sapwellime inou kan, kosonned akan, oh ire teikan.—Pil kilang Madiu 13:11.
17 Ahl kesiluh me Koht kin ketin sewese kitail, iei atail kin ahneki pirien en pali ngehn nin sampah pwon oh sapwellimen Siohwa koasoandi en pwihn en kaudok. Wahnporon Piter koasoi duwen met ni ahnsou me e padahkiong kitail en “poakohng riamwail Kristian kan.” (1Piter 2:17) Atail peneinei en brother oh sister kan ni pali ngehn nin sampah pwon kin sewese kitail en papah Siohwa ki peren en mongiong, nin duwen Melkahka 100:2 mahsanih: “Kumwail pereperen kaudokiong Kauno [Siohwa], oh patohdo mwohn silangi ngisingiski amwail koul!” Iretikitik 4 mahsanih: “Kumwail pedokihlong nan kelen Tehnpaso amwail koulen kaping; kumwail patohwanohng amwial kapingkalahngan oh kapikapinga.” Eri, mendahki kitail kin kalkalohk ong wehi pokon de iang towehda mihding kan, kitail kak ahneki peren. Ia uwen kaselel popohl oh meleilei kitail diarada nan kelen tehnpas en sapwellimen Siohwa tehnpas en pali ngehn!
Pereperenki Kapinga Siohwa!
18. Dahme kahrehda kitail kak perenki kapikapinga Siohwa edetehn kitail kin lelong kalokolok kan de kahpwal teikan?
18 Sohte lipilipil soangen irair en kahpwal akan, kalokolok kan,de kahpwal teikan me kitail pahn lelong, kitail en perenkihda mih nan sapwellimen Siohwa ihmwen kaudok. (Aiseia 2:2, 3) Tamataman, peren, iei irair ehu me kohsang mongiong. Riatail Kristian brother oh sister kan en mahs kin wiahla sounkaping peren kei en Siohwa edetehn irail kin lelong kahpwal tohto. (Ipru 10:34) Iengatail tohnkaudok kan nan rahnpwukat kin duwehte irail.—Madiu 5:10-12.
19. (a) Ia kaweid kan me kin pwurpwurehng kohda me kin kamwekidada kitail en kapinga Siohwa? (b) Ma kitail men alehdi mour soutuk, dahme kitail anahne wia, oh ia atail mehn akadei?
19 Koaros me kin papah Siohwa kin perenki peikiong kaweid kan en Paipel en kapinga ih. Pak tohto pwuken Kaudiahl kin kasansalehda kapinga Koht ni lepin lokaia pwukat “Kapinga Jah!” (Kaudiahl 19:1-6) Nan iretikitik weneu en Melkahka 150, kitail ale kaweid en kapinga Siohwa pahn pak 13. Met kin kohwong koaros en iang koulki ni peren sapwellimen Siohwa peren. Atail pahn alehdi mour soutuk pahn poahsonda pohn atail iang pwihn laud ehu me kin kapinga Siohwa! Ehi, irail kante me pahn mour kohkohlahte iei irail akan me sohte kin uhdi sang arail kapinga Siohwa. Ihme kahrehda, kitail kin nantiong karanih sapwellime mwomwohdiso lelepek nin sampah pwon nin duwen imwio ah kerendohr. Eri, kitail kak koapworopwoarki kilang imwin mahsen en Melkahka 150 eh pweida: “Kumwail me momour koaros, kumwail kapinga Jah. Kapinga Jah!
Iaduwen Komw Pahn Sapeng?
◻ Dahme kin katohrohrla sapwellimen Siohwa aramas akan sang aramas teikan?
◻ Dahme kahrehda sapwellimen Siohwa ladu kan kin inenen peren?
◻ Dahme kin katohrohrpeseng kitail oh sampah wet?
◻ Ni ahl silu dah kei Koht ketin sewese kitail en ahneki pwais nan sapwellime kupwur sarawio?