Komw Kin Wadek Makasihn kan?
1 Pwopwoud ehu me kin misineri nan Aperika koasoiahki makasihn kan: “The Watchtower kin sewese kiht en pepehd ni pali ngehn. Ehu ehu makasihn kin kangoange kiht oh kakehlail kiht.” Ke kin kalahnganki makasihn kan duwehte pwopwoudo? Ke kin men wadek makasihn kan ahnsou me ke kin ale makasihn kan?
2 Kitail kak wadekala artikel en makasihn kan ni minit keite ahpw pwehn kaunopada makasihn pwukat kin wia doadoahk laud oh ahnsou laud. Pwehki omw wehwehki duwen ire wet, ke pahn ihte kilang artikel kan, kilangete kilel kan oh ekei pakte wadek ekei artikel kan me ke perenki? E kin wia elen loalokong me kitail en wia laudsang met. Kitail en wadek oh doudouloale artikel kan nan makasihn koaros. The Watchtower kin keieu kesempwal pwe ihme kin kamwenge kitail. Awake! kin audaudki artikel kan me kin pid soangsoangen oaralap kan me aramas kin perenki. Dahme kitail kin sukuhliki sang makasihn pwukat kin sohte ihte kakehlekitailda ahpw pil sewese kitail en kaunopada ong kalohk. Ma kitail ngoangki wadek makasihn pwukat, kitail kak kangoange mehteikan en pil wadek makasihn kan.
3 Iaduwen en Kamwahuiala Atail Koasoandi en Wadawad: Ke kak kamwahuiala ahmw koasoandi en wadek makasihn kan? Iet mehn sawas riau me kin sewese aramas tohto. (1) Koasoanehdi ahnsou me ke pahn wadek makasihn kan rahn koaros. Ma ke koasoanehdi minit 10 de 15 ehu ehu rahn pwehn wadek noumw makasihn kan, ke pahn pwuriamweiki ia uwen tohto en makasihn me ke kak wadekla nan ehu wihk. (2) Wiahda pein ahmw koasoandi pwehn ese mehnia artikel kan me ke wadekehr. Mwein ntingihdi mehkot limwahn oaralap en artikel pwe ken ese me ke wadekehr artikelo. Ma ke sohte wia met, ke kak sapwungala oh sohte wadek ekei artikel kan de makasihn kan. Ahnsou me ke wiahda koasoandi ehu, kolokolte koasoandi wet.—Pil tehk Pilipai 3:16.
4 “Ladu lelepek oh loalokong” kin mwekidki erpit oh wiahda artikel kan me kin kaitarala anahn en aramas akan. (Madiu 24:45) Ni mehlel, neitail makasihn kan kin doahke atail mour. Uwen laud de uwen tikitik en atail kekeirada ni pali ngehn kin poahsoanehda pohn pein atail koasoandi en wadek soahng ngehnin kan. Kitail kak paiekihda laud atail wadek neitail makasihn kan koaros.