Kitail Paiekihda Kapokon me Oaralap Koasoia “Sapwellimen Koht Ahlo”
1 Sounpwong kei samwalahro, kitail tepida koasoanehdi atail irair kan pwehn iang towehda Kapokon en District en 1998 me oaralap koasoia “Sapwellimen Koht Ahlo.” Ahnsouwet, Kapokon en District nekier. Kitail inenen perenki mwengehn ngehn me kitail ale ni kapokon kan.
2 Pwehki kapokon kan wiawi sampah pwon, kapokon pwukat inenen kaperen. Ma misineri kan de brother oh sister kan sang sahpw teikan iang towehda kapokon pwukat de soh, kitail perenki rong padahk me oaralap koasoia “Ripoht kan duwen Kekeiradahn Doadoahk en Rahk.”
3 Brochure Kapw oh Pwuhk Kapw: Nan kapokon, mie padahk me sapengla peidek ehu me aramas kan me sohte wehwehki padahk mehlel kin men ese: “Mie Mour Mwurin Mehla?” Ni kaimwseklahn padahk wet, brother me pahn wia padahk wet pahn kasalehda brochure kapw me oaralap koasoia What Happens to Us When We Die? Brochure wet pahn sewese aramas en wehwehki ni mehlel ia irair en me mehlahr kan oh e pahn kamweitala irail me pahtoukihla mehlahn kompoakparail kan oh sewese irail en koapworopworki kaiasada me pahn wiawi ehu rahn.
4 Mwurin souwas en rahn en kapokon pahn tepkihda padahk me oaralap koasoia “Sounkapikada—Sapwellime Irair kan oh Wiewia kan.” E pahn sewese kitail en wehwehkihla me mie emen Sounkapikada. Pwehn sewese kitail en sewese mehteikan oh kalahnganki ire wet, brother me wia padahk wet pahn kasalehda pwuhk kapw ehu me oaralap koasoia Is There a Creator Who Cares About You? Pwuhk wet sohte kin ihte kalaudehla atail pwoson Siohwa oh kalahnganki sapwellime irair kan, ahpw pwuhk wet pil wiawihda pwehn sewese irail me sukuhl laud ahpw sohte kin kamehlele me mie Koht.
5 Inou Sang Nan Mongiongatail: Kaimwseklahn padahk kan en kapokon pahn kasalehda ia uwen kesempwal kitail koaros en “Kaukaule Weweid nan Sapwellimen Siohwa Ahl.” E inenen konehng kitail en inoukihda me kitail pahn nannanti pwehn kolokol, utungada, oh mourki sapwellimen Koht ahlo! (Aiseia 30:21) Ahnsouwet, kitail en nantiong kolokolte atail inou kan. Kitail inenen paiekihda kapokon me oaralap koasoia “Sapwellimen Koht Ahlo”!