Pioneer Kan Sewese Meteikan
1 Sises mahsanih: “Rahket me inenen laud, a tohndoadoahk kan me malaulau; kumwail eri kapakap oh peki rehn kaunen rahket pwe en ketin kadarodohng tohndoadoahk tohto nan sapwellime rahk.” Pwehki tohndoadoahk en rahk me malaulau nan tepin pahr kan en Kristian oh arail wasahn kalohk me laud, Sises kak kaweidikin irail en kalohkong uwen aramas tohto ni ah pahn poaronepeseng irail wad emen. Ahpw soh, e “poaronepeseng irail wad riemen.” (Luk 10:1, 2) Dahme karehda wad riemen?
2 Kristian pwukat ahpwtehn tohnpadahkla oh saikinte koahiekla nan kalohk. Re kak sukuhlkihsang emen emen oh kangoange emen emen ni ahr pahn doadoahkpene. Nin duwen me Solomon kasalehda, “riemen mwahu sang emen.” (Ekl. 4:9, 10) Pil mwurin ngehn sarawi wudekidi ni Pendekos 33 C.E., Pohl, Parnapas, oh mehteikan iang iengerail me pwoson kan nan kalohk. (Wiewia 15:35) Ia uwen e wia kapai ehu ong ekei en pein ale kaiahn sang rehn soahngen ohl koahiek pwukat!
3 Prokram En Kaiahn Mwahu Ehu: Duwehte mwomwohdisohn Kristian nan tepin pahr, mwomwohdisohn Kristian nan rahnpwukat kin wia pwihn en kalohk ehu. E kin pil kihong kitail kaiahn. Ni duwen emen emen towe, ineng en mohngiongatail iei en kalohki rongamwahuwo ni ahl me keieu lipwalipw. Pwe sounkalohk tohto en kak kamwahuwiala arail kalohk, mie sawas kan me kohda.
4 Ni kasukuhl en Kingdom Ministry School me ahpwtehn wiawi, Society pakairkihda duwen ehu prokram me pioneer kan pahn sewese mehteikan nan kalohk. Mie anahnepen met? Ehi, mie. Mie sounkalohk pohnangin meh rar me papidaislahr nan erein sounpar siluh me ahpwtehn neko, oh me tohto nanpwungarail anahne kaiahn pwe ren lipwalipwla nan arail doadoahk en kalohk. Ihs me kak sawas?
5 Pioneer kan me kin kalohk kaukaule kak sawas. Sapwellimen Siohwa pwihn kin kihong irail kaweid oh kaiahn. Pioneer kan kin ale kaweid kan me kin wiawihda ong arail anahn nan Pioneer Service School me kin reireiki wihk riau. Re kin pil paiekihda arail mihding ong sounapwalih en circuit kan oh district kan, iangahki kaweid kan sang rehn elder kan. Mendahki kaidehn pioneer koaros me koahiek duwehte Pohl oh Parnapas, re kin alehdi kaiahn kesempwal, me re kin perenki ehukihong mehteikan.
6 Ihs Me Pahn Paiekihda? Ihte irail sounkalohk kapw kan de irail kan me ahpwtehn papidaisla me kak iang prokram wet? Soh! Mie irail me pwulopwul kan oh me mah kan me miher nan padahk mehlel erein sounpar tohto ahpw pahn kalahnganki ale sawas nan ekei wiewiahn doadoahk en kalohk kan. Ekei kin samanih kihla pwuhk kan ahpw kin apwalki pwurehng pwurela rehn irail kan me perenki rong de apwalki tepiada onop en Paipel kan rehn irail kan me perenki padahk mehlel. Mehteikan ele kin mengeiki tepiada onop en Paipel rehn meteikan ahpw aramas pwukat me re onop rehrail sohte kin kekeirada. Dahme kin irehdi irail pwukat me kin onop Paipel? Pekipek kin wiawihong pioneer koahiek kan en kihda sawas nan irair pwukat. Ekei pioneer kan kin samanih wia padahk me pahn karehong aramas en men rong, oh iangahki tepiada onop en Paipel kan, oh kahluwa me kapw kan ong pwihn en Siohwa. Arail koahiek pahn wia sawas laud nan prokram kapw wet.
7 Ahmw schedule sohte kin mweidohng uhk en kak iang koasoandi en mihding en kalohk en mwomwohdiso ahnsou koaros me komw kakohng? Emen pioneer ele kak iang uhk kalohk ni ahnsou kan me sohte sounkalohk teikan me kak iang uhk kalohk.
8 Minimin Mwahu Me Anahn: Pak riau nan pahr ehu, elder kan pahn wiahda koasoandi kan ong sounkalohk kan me inengieng ale sawas kan en iang prokram en Pioneer Kan Sewese Meteikan. Ma komw pwungki en ale soahngen sawas wet, tuhwong pioneer me kileleiong en sewese iuhk, oh wiahda ehu koasoandi en kalohk me kak doadoahk, oh kapwaiada. Iang kalohk ahnsou ko me kumwa inoukihpene. Ni ahmw kin iang pioneer kalohk, kasawih ahl lipwalipw kan me e kin doadoahngki ni ah padahngki rongamwahuwo. Kasawih dahme karehda ekei padahk kan kin lipwalipw ah ekei soh. Medemedewe duwen iren sawas kan me pioneer ele pahn kihda pwe komw en kamwahuwiala ahmw padahk. Ni ahmw pahn kapwaiada mehkan me komw sukuhlkihdi, ahmw kekeirada nan kalohk pahn sansalda, ong uhk oh ong meteikan. (Kilang 1 Timoty 4:15.) Iang pioneer kalohk ahnsou koaros ma kak, iang wiepen kalohk koaros, iangahki kalohk ahnsou soh lipilipil ahpw en tetehk wasa kan me pein komwi anahne sawas loale.
9 Elder me wia sounapwalih en kalohk kin nsenohki kekeirada kan me pahn wiawihda. Ekei ahnsou kan, e pahn tehk rehn brother me kin wia onop en Pwuhk en Mwomwohdiso pwehn kilang iaduwen komw kin paiekihda prokramo. Sounapwalih en circuit pahn pil sewese komwi ni ahnsou me e pahn pwarek mwomwohdiso.
10 Siohwa kupwurki sapwellime aramas kan en kaiahnda oh “onopadahng doadoahk mwahu koaros.” (2 Timoty 3:17) En kilangwohng koasoandi en Pioneer Kan Sewese Meteikan nin duwen sawas kaselel ehu me kin sewese irail ko me inengieng kamwahuwiala arail koahiek en kalohki mahsano. Ma ahmw kapai iei en iang kisehn koasoandi wet, eri kapwaiada ni kalahngan, aktikitik, oh peren.