Sounapwalihn Mwomwohdiso kan me kin Tiengla Mwowe—Sounapwalih En Kalohk
1 Eldero me wia Sounapwalih en Kalohk (Service Overseer) kin nsenohki soahng koaros me kin pidada kekeiradahn doadoahk en kalohk nan wasahn kalohk kan me kileleiong mwomwohdiso. Ihme e ahneki pwukoah kesempwal ehu en sewese kitail en kapwaiada atail pwukoahn kalohki rongamwahuwo. Nin duwen sounkalohk idipek men, e kin tiengla mwowe koasoanehdi ire kan koaros me pidada kalohk. Nin duwen sounpadahk koahiek men, e kin sewese emen emen sounkalohk en kamwahuwiala arail koahiek nan doadoahk en kalohk.—Episos 4:11, 12.
2 Elder menet kin tetehk en sounsawas kan (ministerial servants) pwukoah kan me kohwong irail pwe ren apwalih wasa kan duwehte pwuhk kan, makasihn kan, oh wasahn kalohk kan. E pwukoahki en tehkada mwahu me miehte pwuhk kan, makasihn kan, oh service form kan me itar ong mwomwohdiso en doadoahngki ehu ehu sounpwong. Pak ehu nan ehu ehu sounpahr e kin kousapalih adres en imwen aramas kan me sohte men kitail en kalohkohng irail nan pwuhk me wasahn kalohk kan kin kileledi loale, oh e kin kileleiong brother koahiek kan en pwarek ihmw pwukat.
3 Sounapwalih en Kalohk kin pwukoahki apwalih soangsoangen wiepen ahl en kalohk kan, iangahki wasahn pisnes, nan ahl akan, oh kalohk doadoahngki telepohn. E kin tetehk pwehn koasoanehdi koasoandi kan me kak doadoahk pwe tuhpenen kalohk erein nan wihko pwon en kak wiawi, iangahki ahnsoun kommoal kan. E kin kasalehda nsenohki mehlel wiewiahn onop Paipel kan. E kin rapahki ahl akan pwehn kihong irail ko me sohla kin kalap kalohk de irail kan me sohla kalohk sawas en pali ngehn. E kin nsenohki en pioneer kan kalohk, oh e kin tetehk prokram en Pioneer Kan Sewese Mehteikan.
4 Nin duwen emen tohn Congregation Service Committee, Sounapwalih en Kalohk kin kasalehda wekidekla kan me anahne wiawihda nan pwihn en Onop en Pwuhk en Mwomwohdiso. Ni ahnsou me e pwarek ahmw pwihn en onop, en tehk kanaieng pwe ke iang towehda onop wet oh iang ih nan kalohk.
5 Koaros nan mwomwohdiso anahne miniminiong kaweid me Sounapwalih en Kalohk kihda. Met pahn sewese kitail en kekeirada atail koahiek nan doadoahk en katohnpadahk oh kitail pahn diar peren laud nan atail doadoahk en kalohk.