Ia Duwen Omw Kak Paiekihda Omw Pwihn en Kalohk?
1. Kamwahu dahkei en Onop en Pwuhk en Mwomwohdiso kin mihmiehte nan atail pwihn en kalohk?
1 Ke wereisang kamwahu kan en Onop en Pwuhk en Mwomwohdiso (Congregation Book Study)? Pwihn en onop kan kin malaulau oh e kin maledek. Met kin kamangaiala atail karanihala emenemen pwe kitail en kin sawaspene kakehlaka atail pwoson. (Lep. Pad. 18:24) Sounapwalih en onopo kin esehla atail irair kan oh kak kihda kangoang me konehng emenemen kitail. (Lep. Pad. 27:23; 1 Pit. 5:2, 3) Kamwahu pwukat kin mihmiehte nan atail pwihn en kalohk.
2. Ia duwen atail kak tiengla mwowe en kakairada atail karanihala emen nan atail pwihn en kalohk pwehn kakehlaka atail pwoson?
2 Tiengla Mwowe: Uwen tohtohn pwihn en kalohk kan kin duwehte pwihn en onop en pwuhk en mwomwohdiso. Atail kin “miniminkipene anahnteieu” nan doadoahk en kalohk kin imwikihla atail karanihala emenemen. (Pil. 1:27) Meh depe ke iangehr kalohk nan omw pwihno? Ke kak ‘langahda douluhl mohngiongomw’ me pid ire wet? (2 Kor. 6:13) Ele kitail pil kak luke emen sang nan atail pwihn pwehn iang atail Kaudok en Peneinei de iang mwenge. Nan ekei mwomwohdiso, ehuehu pwihn en kalohk kin kamwenge brother kan me kin mwemweitla pwehn padahk ni arail mwomwohdiso. Ehuehu pwihn kin tuhpene pwehn mwengepene oh kangoangpene nan wihk me koasoandi ren kamwenge brothero, mehnda ma e kak iang de soh.
3. Ia ekei ahnsou mwahu kan ke kak ale sawas nan omw pwihn en kalohk?
3 Mendahki rahnpwukat mwomwohdiso kin tuhpene pak riaute nan ehu wihk, met sohte wehwehki me sounkalohk kan kin alehda sawas tikitiksang mahs. Sounapwalih en pwihn en kalohk kin idihdida nan ehuehu pwihn pwehn kangoange oh kaiahne emenemen ong doadoahk en kalohk. Ma omw sounapwalih en pwihn en kalohk saikinte koasoanehdi en iang uhk kalohk, ke sou peki ken iangih? Patehng met, nan ehuehu sounpwong nan imwin wihk kan, sounapwalih en kalohk kin iang ehuehu pwihn nan doadoahk en kalohk. Nan mwomwohdiso tikitik kan me pwihn en kalohk kin malaulau, e kak koasoanehdi en mwamwaitih ehuehu pwihn pak riau nan ehu sounpar. Ke kin wiahda koasoandi en iangih kalohk ni eh kin mwamwaitih omw pwihn en kalohk?
4. (a) Ia duwen tuhpenehn kalohk kan ar kin koasoansoandi? (b) Dahme kahrehda kitail en kihda imwatail kan ong tuhpenehn kalohk?
4 E kalapw mie kamwahu ong ehuehu pwihn ren tuhpene wasa tohrohrpeseng ong kalohk ni imwin wihk kan. Arail kin tuhpene wasa tohrohr kan ni kuloak ehute ele kak kamangaiala sounkalohk kan ren lella ni wasahn tuhpenehn kalohk oh ni wasahn kalohk. Koasoandi ong sounkalohk kan kak mwadang wiawihda oh koaros kak mwadang samwalahr ni wasahn kalohk. E pil kamangaiala sounapwaliho en tehk mwahu eh pwihn en kalohk me e kin apwalih. Ahpw, irair kan kak kahrehda anahnepen pwihn riau de tohtohsang ren patpene. Ma tohnmwomwohdiso pwon kin tuhpene kalohk ni tepin Rahn Kaunop en sounpwong kan de mwurin onop en Kahn Iroir, e kin mwahu ong ehuehu pwihn ren mwohdpene wasa kis pwe arail sounapwaliho en kak doadoahngki minit kei pwehn koasoanehdi pwihno mwohn tuhpenehn kalohko kaimwisengkihla kapakap.—Kilang koakon “Ke Kak Kihda Imwomwo?”
5. Mendahki koasoandi en Onop en Pwuhk en Mwomwohdiso sohla wiawi, dahme kitail kak koapworopworki?
5 Mendahki koasoandi en Onop en Pwuhk en Mwomwohdiso sohla wiawi, Siohwa kin ketin pousehlahte ketikihda mehkoaros me kitail anahne pwehn wia kupwure. (Ipru 13:20, 21) Kitail solahr pahn anahne mehkot ma Siohwa kin ketin apwalih kitail. (Mel. 23:1) Mie kapai tohto kitail kin alehdi sang atail pwihn en kalohk. Ma kitail kin tiengla mwowe oh “kamwarak werentuhke tohto,” kitail pahn “dolung wa tohto.”—2 Kor. 9:6.
[Koakon en pali 6]
Ke Kak Kihda Imwomwo?
Ekei mwomwohdiso kan kin kapatapene pwihn en kalohk kan ni imwin wihk kan pwehki malaulau ihmw kan ong tuhpenehn kalohk. Tuhpenehn kalohk kan kin wia koasoandi en mwomwohdiso kahrehda e uhdahn wia pwais kaselel ehu en kihda imwomwo. Ke pahn kak kihda imwomwo? Ke dehr pweiek ma imwomwo sohte mwahu. Elder kan pahn tehk wasa me imwomwo mi ie oh ire teikan duwehte ni arail kin tehk wasahn onop en pwuhk en mwomwohdiso. Ma ke men kihda imwomwo, menlau kairehki omw sounapwalih en pwihn en kalohk.