Iaduwen Koasoandi en Pwuhk Study en Mwomwohdiso Kin Sewese Kitail
1. Iaduwen atail mihding limau me kin wiawi nan ehu ehu wihk kin sewese kitail?
1 Mie mihding limau nan ehu ehu wihk oh ehu ehu mihding pwukat wekpeseng me pid mwomwen eh kin wiawi oh kahrepe. Ahpw, mihding pwukat koaros kesempwal en sewese kitail en “nsenoh sawaspene ni kasalepen atail limpoak oh atail wiewia mwahu kan.” (Ipru 10:24, 25) Ia ekei kamwahupen koasoandi en Pwuhk Study en Mwomwohdiso?
2. Soangen kamwahu dah kan mie ni atail kin tuhpene nan pwihn tikitik en pwuhk study?
2 Sawas ong Kekeirda ni Pali Ngehn: Uwen tohtohn aramas akan me kin iang pwuhk study malaulau sang uwen tohtohn aramas akan me kin iang mihding teikan. Met kin kahrehda mengei en karanih meteikan me kak sewese kitail ni pali ngehn. (Lepin Padahk 18:24) Mie pak ke song en esehla koaros nan ahmw pwihn en pwuhk study, mwein idek rehn emenemen irail ma ke kak iang irail kalohk? Koasoandi en pwuhk study kin kahrehiong sounapwalih en pwuhk study en wehwehki irair tohrohr en emenemen nan pwihno oh kihong emenemen mehn kangoang.—Lepin Padahk 27:23.
3. Iaduwen koasoandi en pwuhk study kin sewese Paipel study kan en iang towehda mihding oh iang pasapeng?
3 Mie pak ke luhke ahmw Paipel study kan en iang uhk en towehda mihding en pwuhk study? Ekei kin perenki rong ahpw pweiek sang en iang towehda mihding laud kan, ahpw mwein re sohte pahn nohk saloh en iang towehda mihding tikitik, keieu ma e kin wiawi ni imwen aramas. Irair en kerenpene kin sewese me pwulopwul kan oh me kapw kan en iang pasapeng. Oh pwehki pwihno tikitik, kitail kak ahneki ahnsou laud en iang pasapeng oh kapinga Siohwa.—Melkahka 111:1.
4. Ni ahl dah kan koasoandi en pwuhk study kin wia mengei ong kitail?
4 Pali laud en ahnsou, mihding en pwuhk study kin wiawi ni wasa kan me mengei ong sounkalohk kan en iang towehda nan wasahn kalohk. Mehlel kaidehn koaros kak iang mihding me keieu karanih arail wasa, ahpw kitail sohte anahne kohla wasa doh en iang towehda pein atail pwuhk study duwehte en iang towehda mihding en mwomwohdiso teikan. Mwein wasahn pwuhk study kak wia wasahn tuhpene ong kalohk.
5. Iaduwen kitail kak ale sawas me pid doadoahk en kalohk sang rehn atail sounapwalih en pwuhk study?
5 Sawas ong Kalohk: Sounapwalih en pwuhk study kin nsenohki sewese emenemen sounkalohk en kaukaule iang kalohk oh pweida mwahu, oh pil perenki iang kalohk. Kahrehda, e kin song en iang koaros nan pwihno kalohk, oh kihong emenemen sawas me pid soangsoangen elen kalohk. Ma ke pehm me ehu wiepen kalohk kin apwal ong uhk, duwehte en wia return visit kan, kehsehkin ahmw sounapwalih en pwuhk study. Mwein e kak koasoanehdi pwe ken iang emen sounkalohk koahiek nan pwihno. Ahmw koahiek en padahk ni ahnsoun onop en Paipel pahn kekeirda sang ni ahmw kin tehk kanahieng wiepen padahk kan me sounapwalih en pwuhk study kin doadoahngki ni ahnsou me e wia pwuhk study.—1 Korint 4:17.
6. Dahme kahrehda kitail anahne uhdahn paiekihda koasoandi en pwuhk study?
6 Ia uwen laud en kapai me koasoandi en Pwuhk Study en Mwomwohdiso kin wia! Koasoandi limpoak wet me kohsang rehn Siohwa kin sewese kitail en kolokol atail pali ngehn erein ahnsou apwal kan me kitail kin momour.—Melkahka 26:12.