Iaduwen Sounapwalih en Pwuhk Study en Mwomwohdiso Kin Kasalehda me Re Kin Nsenohki Tohn Arail Pwuhk Study
1 Pwuhk Study en Mwomwohdiso kin wia koasoandi ieu me wiawihda pwehn “nsenohki kekeiradahn pali ngehn en emenemen tohn Pwuhk Study. . . . Koasoandi wet kin wia kasalepen sapwellimen Siohwa limpoak-kadek oh pil kin kasalehda me E kin nsenohki sapwellime aramas akan.” (om p. 75; Aiseia 40:11) Sounapwalih Pwuhk Study kin wia pwukoah kesempwal ieu ni e kin nsenohki emenemen nan ah Pwuhk Study.
2 Nan Pwuhk Study: Pwehki Society koasoanehdi me pwihn en Pwuhk Study pahn tikitik, kahrehda Sounapwalih en Pwuhk Study kak nantihong esehla emenemen tohn ah Pwuhk Study. (Lepin Padahk 27:23) Pali laud en ahnsou, mie ahnsou en koasoakoasoipene mwohn oh mwurin Pwuhk Study. Erein sounpwong ehu, e kakete koasoiong kereniong koaros tohn ah Pwuhk Study. Met pahn sewese irail en mengeiong tuhwong ih ni ahnsou me re kin lelohng kahpwal de anahne kangoang.—Aiseia 32:2.
3 Sounapwalih en Pwuhk Study kin nantihong kangoange koaros nan ah Pwuhk Study en iang pasapeng nan Pwuhk Study. Ehu ahl e kak wia met iei en wia Pwuhk Study ni ahl me kadek oh kamantik. (1 Deselonika 2:7, 8) E kin rapahki ahl akan pwe koaros, iangahki me pwulopwul kan, kak iang pasapeng. Ma ekei sohte kin iang pasapeng pwehki irail namenek, e kak kihda sawas ni e pahn koasoanehdi mwowe oh pilada iren Paipel ehu de parakrap ehu me irail kak pasapeng. De e kak sewese irail en wehwehki ia mwomwen re pahn kak pasapeng ni pein arail lokaia.
4 Ma sounsawaspen Sounapwalih en Pwuhk Study iei emen me kin wia Ministerial Servant, Sounapwaliho kak koasoanehdi me sounsawaso pahn uhd wia Pwuhk Study pak ehu nan sounpwong riau koaros. Met kin kak sewese Sounapwaliho en kilang ia mwomwen sounsawaso kin wia Pwuhk Study oh kihda iren sawas kan. Met kin wia koasoandi mwahu ehu pwehn sewese brother kan en kamwahuwihala arail koahiek en padahk!—Taitus 1:9.
5 Nan Kalohk: Ehu pwukoah me kesempwal me Sounapwalih en Pwuhk Study kin wia iei en tiengala mwowe nan kalohk. (Nempe 27:16, 17) E kin wiahda koasoandi mwahu kan ong kalohk nin duwen pwihn ehu oh pil kin nantihong sewese koaros nan ah Pwuhk Study en diar peren nan arail kalohk. (Episos 4:11, 12) Pwehn wia met, e kin akadeiong iang emenemen nan ah Pwuhk Study nan kalohk. E kin pil koasoiong Sounapwalih en Kalohk pwehn tehk ihs me anahne sawas nan kalohk oh koasoanehdi ihs irail sounkalohk koahiek kan me kak kihong irail sawas wet.
6 Nin Duwen Sounsilepen Sihpw Limpoak men: Sounapwalih en Pwuhk Study kin nsenohki irail me sohte kak kihda ahnsou laud nan kalohk pwehki arail irair apwal kan. E kin tehk me irail me mahlahr oh irail me ahneki soumwahu laud kahrehda re anahne mihmihte nan imwarail oh irail me sohte kak kihda ahnsou laud nan kalohk ong ahnsoukiste pwehki soumwahu ehu me re iang de ohla—e pahn kehsehkin irail duwen koasoandi kapw me emen me lelohng irair pwukat oh sohte kak kalohk awa ehu—e kak kalohk minit 15 oh e pahn kak wadek ong ah ahnsoun kalohk. (Congregation Service Committee pahn pilada ihs me konehng en mihmi pahn koasoandi kapw wet.) Sounapwalih en Pwuhk Study pil kin nsenohki irail me mihmi nan ah Pwuhk Study me sohte iang kalohk erein sounpwong weneu, oh e kin nantihong sewese irail en pwurehng iang mwomwohdiso kalohk.—Luk 15:4-7.
7 Kitail kin kalahnganki nsenoh me irail Sounapwalih en Pwuhk Study kin kasalehda! Nsenoh me irail kin kasalehda kin sewese “koaros en ehupene ni minimin en pwoson . . . , pwehn wiahla aramas dei mehlel kei, lel ni idin deilahn Krais unsek.”—Episos 4:13.