Kahrepe Kesempwal kan me Kitail Anahne Iang Pwuhk Study en Mwomwohdiso
1. Iaduwen koasoandi en Pwuhk Study en Mwomwohdiso tepida?
1 Nan pahr 1895, Tohnsukuhl en Paipel kan, me mahs iei eden Sounkadehde kan en Siohwa, wiahda pwihn en pwuhk study me kin adaneki Dawn Circles. Irail kin onopki pwuhk kan me oaralap koasoia Millennial Dawn. Mwuhr, mihding wet uhd adaneki Berean Circles for Bible Study. (Wiewia 17:11) Pali laud en ahnsou, ekeite tohnmwomwohdiso kin kohpene nan imwen emen ni soutik en rahn ehu me kin mwahu ong irail koaros. Kisin mihding pwukat me katapiada koasoandi en Pwuhk Study en Mwomwohdiso.
2. Iaduwen kitail kak “kangoange oh sewese” meteikan nan Pwuhk Study?
2 Kangoang oh Sawas: Pwehki pwuhk study kin wia pwihn tikitik, mie ahnsou mwahu ong towe kan en kasalehda arail pwoson ki pasapeng kan. Met kin imwikihla “sawaspene, amwail pwoson en sewese ie, oh ei pwoson en sewesei kumwail.”—Rom 1:12.
3, 4. Iaduwen koasoandi en Pwuhk Study kin sewese kitail en wia doadoahk en kalohk?
3 Menlau tehk mwahu duwen ia mwomwen brother me wia Pwuhk Study en Mwomwohdiso kin padahk pwehn kak sewese kitail en ‘koahiekla ni atail pahn doadoahngki mahsen en me mehlelo ni ahl me pwung.’ (2 Tim. 2:15) Tehk mwahu iaduwen e kin doadoahngki iren Paipel kan ong onopo. Ma e kak, mwein e pahn kousapahlih ire kesempwal kan, ni a pahn doadoahngkihte Paipel. Ah mehn kahlemeng mwahu pahn sewese kitail en koahiekla wia padahk nan kalohk.—1 Kor. 11:1.
4 Likin wia onop en Pwuhk Study wihk koaros, Sounapwalih en Pwuhk Study kin pil tiengala mwowe nan doadoahk en kalohk. E kin miniminiong Sounapwalih en Kalohk oh kin wiahda koasoandi mwahu ong iang kalohk. E kin nantihong sewese koaros me kin iang ah Pwuhk Study en kapwaiada arail pwukoah en Kristian en kalohki Rongamwahu oh katohnpadahk.—Madiu 28:19, 20; 1 Kor. 9:16.
5. Iaduwen sawas kin kak kohwong emen emen nan Pwuhk Study?
5 Sounapwalih en Pwuhk Study kin nsenohki pali ngehn en emen emen irail nan eh Pwuhk Study. E kin kasalehda met ni e kin nsenohki irail ni mihding en mwomwohdiso kan oh e pil kin iang irail nan kalohk. E pil kin mwemweitla rehrail nan imwarail oh kangoange irail ni pali ngehn. E pahn mwahu ma koaros pahn ahneki pepehm me irail kak tuhwong Sounapwalih en Pwuhk Study ma irail anahne sawas ni pali ngehn.—Aiseia 32:1, 2.
6. (a) Iaduwen riatail nan ekei sahpw akan kin ale kakehl ni arail kin tuhpene nan kisin pwihn tikitik kan? (b) Iaduwen pein kowe paiekihda koasoandi en Pwuhk Study?
6 Kakehle Emen Emen: Nan sahpw akan me kin keinapwih doadoahk en sapwellimen Koht aramas akan, riatail kin tuhpene nan kisin pwihn tikitik kan. Emen brother koasoia: “Mendahki aht doadoahk en Kristian keinapwihdi, ahnsou koaros me se kak, se kin tuhpene nin duwen pwihn en tohnmwomwohdiso 10 de keieu tohto tohnmwomwohdiso 15. Mihding pwukat kin kakehle aht pali ngehn, sang aht onop oh pil sang aht kin werekiong riat akan mwurin onop. Se kin ehukihong meteikan duwen dahme wiawiong kiht, oh met kin sewese kiht en wehwehki me emen emen kiht kin nannantihte mendahki kasongosong kan oh kahpwal kan me kiht koaros kin lelohng.” (1 Pit. 5:9) Eri, kitail en alasang riatail kan nan sahpw pwukat oh kakehle emen emen ni atail kin utungada mehlel koasoandi en Pwuhk Study en mwomwohdiso.—Episos 4:16.