Sewese Ih me Wia Sounapwalih en Ahmw Pwuhk Study en Mwomwohdiso
1 Emenemen kitail kin ale kamwahu tohto sang Pwuhk Study en Mwomwohdiso. Nan Atail Doadoahk Ong Wehio en sounpwong me ahpwtehn nek, kitail koasoiapene pwukoa en Sounapwalih en Pwuhk Study en Mwomwohdiso. Ahpw, dahme kitail kak wia pwehn sewese ih, me kahrehda pein kitail oh meteikan pahn paiekihda?
2 Iang Towehda Wihk Koaros: Pwehki pwihn en Pwuhk Study kan kin tikitik, ahmw iang towehda kin inenen kesempwal. Ken wiahki ahmw mehn akadei en iang towehda Pwuhk Study en Mwomwohdiso wihk koaros. Ke anahne pil lel wasahn Pwuhk Study mwadang, pwe Sounapwalih en Pwuhk Study kak tepida ni kuloak me Pwuhk Study kileleiong oh pil soahng koaros pahn soandi.—1 Kor. 14:40.
3 Koasoi kan me Kin Kangoange Meteikan: Pil ehu ahl me ke kak sawas iei en kaunopada mwahu ong Pwuhk Study oh wia pasapeng kan me pahn kangoange meteikan. Pasapeng kan me kin kasalehda ire ehute me keieu mwahu, oh met kin kangoange meteikan en pil iang pasapeng. Ken dehr song en koasoia ire kan koaros me mihmi nan parakrapo. Ma ire ehu kin kamwekid uhk, ken kasalehda met ni ahnsou me ke wia ahmw pasapeng.—1 Piter 4:10.
4 Ma ke kin wadek parakrap kan ong Pwuhk Study, ken nantihong wia uwen me ke kak ni ahmw pahn kapwaiada ahmw pwukoah. Ma ke pahn wia wadawad mwahu, met kin kahrehong Pwuhk Study en pweida mwahu oh tohn Pwuhk Study koaros pahn perenki Pwuhk Study.—1 Tim. 4:13.
5 Kalohk Nin Duwen Pwihn: Mihding en tuhpene ong kalohk kin wiawi wasa kan me Pwuhk Study kan kin wiawi, oh ahmw utungada koasoandi kan kin sewese Sounapwalih en Pwuhk Study ni e kin tihengala mwowe nan doadoahk en kalohk. Ken kilangwong koasoandi pwukat en wia ahnsou kan en karanih riomw brother oh sister kan oh kangoange irail.
6 Ripoht en Kalohk kan: Pil ehu ahl ke kak sewese Sounapwalih en Pwuhk Study iei en mwadang kapedolong ahmw ripoht en kalohk ni imwin sounpwong koaros. Ke kak pein kihong ih ahmw ripoht de ke kak kihdi nan koakon me kileledi ong ripoht en kalohk kan nan Kingdom Hall. Secretary en mwomwohdiso pahn mweidohng koakon en mihmi nan wasa ieu me Sounapwalih en Pwuhk Study koaros pahn kak kihdi ripoht kan koaros me re kin ale nan koakono.
7 Ahmw kin sewese Sounapwalih en ahmw Pwuhk Study en Mwomwohdiso pahn sansal ong koaros. Ahpw keieu, ke kak kamehlele me Siohwa pahn “ieiang uhk oh soangen ngoang me ke kin kasalehda.”—Pilipai 4:23, NW.