Ke Kin Wia Uwen Me Ke Kak en Sewese Secretary en Kihpene Ripoht en Kalohk me Pwung?
1 Poadoapoad en Paipel tohto kin kasalehda uhdahn nempe kan, me kin sewese kitail en wehwehki dahme uhdahn wiawi. Karasepe ieu, Kidion kalowehdi mehn Midian ni e doadoahngkihte sounpei 300. (Sounkopwung 7:7) Sapwellimen Siohwa tohnleng kemehla sounpei en Asiria 185,000. (2 Nanmwarki 19:35) Nan Pendekos 33 C.E., aramas 3,000 papidaisla, oh mwurinte mwo, irail me pwosonla tohtohla oh lel meh 5,000 samwa. (Wiewia 2:41; 4:4) E sansal mwahu sang poadoapoad pwukat me sapwellimen Koht ladu en mahs akan kin wia uwen me irail kak en kihpene ripoht me unsek oh pwung.
2 Rahnwet, sapwellimen Siohwa pwihn kin kaweidkin kitail en ripohtki atail doadoahk en kalohk nan sounpwong koaros. Ma kitail pahn wia uwen atail kak en utungada koasoandi wet, met pahn sewese brother kan en koasoanehdi mwahu atail doadoahk en kalohk. Ripoht kan kak kasalehda ma mie anahn akan me pid atail doadoahk en kalohk de ma sounkalohk me anahn wasakis. Nan mwomwohdiso, ripoht en kalohk kan kin sewese elder kan en kasawihada ma ekei sounkalohk kak kalaudehla arail doadoahk nan kalohk de pil irail sounkalohk me anahne sawas. Oh ripoht kan me pid kekeiradahn doadoahk en kalohk kak kihong kitail koaros kangoang. Ke kin wia uwen me ke kak en sewese Secretary en kihpene ripoht en kalohk me pwung?
3 Pein Ahmw Pwukoah: Ni imwin sounpwong koaros, ke kin apwaliki tamanda dahme ke wia nan kalohk? Ma iei, dahme ke soh ntingihdi ahmw awa kan oh dahme ke wiahdahr nan kalohk ehuehu ahnsou me ke iang kalohk? Ekei kin ntingihdi arail awa kan, dahme re kihla, return visits, oh Bible studies nan calendar de “diary.” Pil ekei kin weuwa doaropwe en ripoht en kalohk (field service report slip) pwehn ntingihdi arail awa kan. Ni imwin sounpwong koaros, menlau kihong brothero me wia Sounapwalih en ahmw Pwuhk Study noumw ripoht. De, ma ke mwahuki, ke kak kihdi noumw ripoht nan koakon nan Kingdom Hall. Ma ke manokehla kihlong noumw ripoht, ke dehr awih lao lel brothero call uhk—ken mwadang call ih oh kihong ih noumw ripoht. Ma ke kasalehda me ke lelepek ni ahmw kin kapedolong noumw ripoht en kalohk, met pahn kasalehda me ke wauneki sapwellimen Siohwa koasoandi oh ke ahneki limpoak en Kristian ong irail brother kan me kin kihpene ripoht en kalohk kan.—Luk 16:10.
4 Pwukoah en Sounapwalih en Pwuhk Study: Nin duwen sounsilepe limpoak men, Sounapwalih en Pwuhk Study kin nsenohki dahme emenemen nan ah Pwuhk Study wia nan kalohk nan sounpwongo. (Lepin Padahk 27:23) E anahne wehwehki ma sounkalohk kan kin kaukaule iang kalohk oh tehk ma re kin perenki iang kalohk oh e kin mwadang idek rehrail ma re anahne sawas ma e kin diarada me re sohte iang kalohk. Mwein ihte me e anahne: emen en kangoange ih, de iren sawas ehu de emen en luhke ih en iang ih nan kalohk.
5 Ni imwin sounpwongo, Sounapwalih en Pwuhk Study pahn tehk me sounkalohk koaros nan ah Pwuhk Study iang kalohk oh kapedolong neirail ripoht pwe Secretary en kak kihpene ripoht en kalohk en mwomwohdiso mwohn e anahne kadaralahng Branch Ohpis mwohn rahn keweneu en sounpwong kohkohdo. Ni ahnsou me sounpwongo pahn kereniongehr nek, e pahn mwahu ma Sounapwalih en Pwuhk Study kan pahn katamankin ah Pwuhk Study me sounpwongo pahn kereniong nek oh e pahn kolokol ekei doaropwe kan pwe ren kak audehda doaropwe pwukat ni imwin sounpwongo. Ma ekei sounkalohk kin kalap manokehla en kapedolong neirail ripoht kan, Sounapwalih en Pwuhk Study kak kangoange irail oh katamankin irail en mwadang kapedolong neirail ripoht en kalohk.
6 Ma kitail pahn mwadang kapedolong neitail ripoht en kalohk, met kin sewese Secretary en kihpene ripoht en mwomwohdiso me pwung oh mehlel oh ripoht wet kin kasalehda dahme uhdahn kin wiawi nan kalohk. Ke pahn wia uwen me ke kak en mwadang kapedolong noumw ripoht ni imwin sounpwong koaros?