Kasalehong Meteikan Padahk Mehlel me Pid Duwen Sises
1 Irail Kristian me keidi kan, iangahki iengerail sihpw teikan kin, “pwukoahki doadoahk en kadehde ong Sises.” (Kaudiahl 12:17) Met kin wia doadoahk kesempwal ieu, pwehki kitail kak ale komourpatail ihte ma kitail pahn pwoson ih.—Sohn 17:3; Wiewia 4:12.
2 ‘Ngehi me Ahl, Ngehi me Mehlel, Ngehi me Mour’: Sises mahsanih: “Ngehi me ahl, ngehi me mehlel, ngehi me mour; sohte me kak kohlahng Semei ma soh ngehi.” (Sohn 14:6) Ihte sang rehn Sises, me wia “ahlo,” me kitail kak kapakap ong Koht oh ahneki nanpwung mwahu reh. (Sohn 15:16) Sises me “mehlel” pwehki kokohp kan me mihmi nan Pwuhk Sarawi ni palien lokaiahn Ipru pweida reh. (Sohn 1:17; Kolose 2:16, 17) Ni mehlel, kokohp mehlel kan kin wiawi pwehn kamarainih aramas akan duwen sapwellimen Sises pwukoah nin duwen kupwuren Koht. (Kaudiahl 19:10) Oh pil, Sises me “mour.” Ma kitail kak ale kisakis en mour soutuk, kitail anahne pwoson sapwellimen Sises meirong en tomw.—Sohn 3:16, 36; Ipru 2:9.
3 Tapwin Mwomwohdiso oh Nanmwarki me Wia Kakaun Ahnsouwet: Aramas akan anahne pohnese me Siohwa ketin likikihong sapwellime ohl, Sises, manaman en kaunda. Sises ketiketier nan mwoahle nanleng nin duwen Nanmwarki en Wehin Koht—oh ‘aramas akan pahn peikiong ih.’ (Sen. 49:10, New World Translation) Oh pil, Siohwa ketikihong ih pwukoah en wia Tapwin Mwomwohdiso. (Episos 1:22, 23) Kitail anahne sewese irail me kitail kin onop Paipel rehrail en wehwehki iaduwen Sises kin kaweidih mwomwohdiso oh doadoahngki “ladu lelepek oh loalokong” en ketikihong sapwellime aramas “mwengehn ngehn ni ahnsou konehng.”—Madiu 24:45-47.
4 Samworo Lapalap me Kin Mahk ong Aramas akan: Pwehki Sises lelohngehr kasongosong oh kalokolok kan ni a wia-aramasala, “e kakehr ketin sewese irail kan me kin ale songosong.” (Ipru 2:17, 18) E kin kamwekid mohngiong kan en kitail aramas soh-unsek kan en sukuhliki me Sises kin wehwehki atail luwet akan oh e kin louloukin kitail rehn Koht pwehki e kin sapwellimaniki irair en kadek! (Rom 8:34) Pwehki sapwellimen Sises meirong en tomw oh sang ni doadoahk me e kin wia nin duwen Samworo Lapalap, kitail kak “saledek en kasalehda soahng koaros me mihmi loalatail” ni atail kin kapakap ong Koht pwehn kak ale “sawas ni ahnsou konehng.”—Ipru 4:15, 16.
5 Kitail kin koapworopworki me atail nantihong sewese meteikan en wehwehki padahk mehlel me pid duwen Sises oh met pahn kamwekid irail en peikiong oh papah ih oh miniminiong kitail ni atail kin wia duwehte.—Sohn 14:15, 21.