Koakon En Peidek
◼ Iahd me e pahn konehng en wiahda pil ehu pwihn en Pwuhk Study en Mwomwohdiso?
Ma aramas akan me iang towehda Pwuhk Study kan (iangahki Pwuhk Study me kin wiawi nan Kingdom Hall) kin tohtohki 15 de dauli aramas 15, ih ahnsou me elder kan pahn medemedewe ma re kak wiahda pil ehu pwihn en Pwuhk Study. Dahme kahrehda se kin kangoange met?
Ni ahnsou me pwihn en Pwuhk Study kan kin tikitik, brother me kin wia Pwuhk Study kak kihong eh ahnsou laud ong emen emen me kin iang towehda eh Pwuhk Study. Oh pil, koaros me kin iang towehda kak pasapeng oh, oh ni ahl wet, re kak kadehdehki arail pwoson sang ni ewerail. (Ipru 10:23; 13:15) Oh pil, ma mie pwihn en Pwuhk Study tohto nan wasa tohto nan kahnimw, eri, e kin mengei ong tohnmwomwohdiso en kohla wasa pwukat pwehn kalohk oh pil iang towehda mihding en Pwuhk Study. Mwomwohdiso kan me ahneki Pwuhk Study tohto kin diarada me aramas depe me kin iang Pwuhk Study kin tohto sang mwomwohdiso kan me kin ahneki pwihn en Pwuhk Study malaulau.
Ekei pak, mie irair kan me kin kahrehda elder kan kin wiahda pwihn en Pwuhk Study nan ehu wasa, mendahki towe kan pahn malaulau. Met kin wiawi ma mie sounkalohk kan me kin mihmi doh sang Pwuhk Study teikan de ahnsou me pwihn en Pwuhk Study kan kin nok laud oh sohte itar sehr kan ong koaros me kin iang towehda. Ma anahn mie, elder kan kak wiahda pwihn en Pwuhk Study me kin tuhpene ni rahn pwehn mwahu ong me mah kan, me kin doadoahk ni pwong oh pil sister kan me arail pwoud kan sohte iang pwoson.
E pahn mwahu ma nan ehu ehu pwihn en Pwuhk Study pahn mie ekei irail me kehlail ni pali ngehn oh kin kaukaule iang kalohk iangahki emen brother me koahiek en wia Pwuhk Study oh emen me kak wadek. Brother kan nan mwomwohdiso kak nantihong sewese soangen anahn pwukat en mwomwohdiso.
Elder kan kak sewese tohnmwomwohdiso en kekeirada ni pali ngehn ma re pahn wiahda pwihn en Pwuhk Study kan en tikitik pwe brother kan me wia Pwuhk Study kan kak apwalih mwahu tohn arail Pwuhk Study oh re pahn kak tuhpene wasa kan me karanih imwarail. Ma anahn mie, elder kan kak wiahda pwihn en Pwuhk Study kapw kan pwe koaros me kin iang towehda en kak paiekihda sang koasoandi mwahu wet oh pahn sewese irail en kekeirada ni pali ngehn. Ke kak doadoahngki pein imwomw ong Pwuhk Study? Tohto me kin perenki doadoahngki imwarail kan kin diarada me re kin ale kapai tohto ni pali ngehn.