Ke Kak Mweidohng Mwomwohdiso en Doadoahngki Imwomw Ong Mihding kan?
1 Nan senturi keieu, Kristian tohto kin mweidohng mwomwohdiso en doadoahngki imwarail kan ong mihding en mwomwohdiso kan. (1 Kor. 16:19; Kolose 4:15; Pailimwon 1, 2) Nan ekei mwomwohdiso kan rahnwet, sohte itar wasa kan ong pwihn en Pwuhk Study en Mwomwohdiso kan oh pwihn en kalohk kan en tuhpene ie. Pwehki met, aramas 30 de tohto sang kin tuhpene nan ekei Pwuhk Study kan, oh met kin tohto sang aramas 15 me wia uwen tohto me mwahu ong Pwuhk Study kan.
2 Pwais Kaselel: Mie pak me ke medemedewe en mweidohng mwomwohdiso en doadoahngki imwomw ong Pwuhk Study en Mwomwohdiso? Ma mie pere ieu nan imwomw me mwahu ong pwihn en Pwuhk Study en tuhpene oh pereo mwakelekel, oh uhdahn marain, oh kisinieng kak kohlong—eri, mwein mwomwohdiso kak doadoahngki pereo nan imwomwo ong wasahn tuhpene. Pwehki Pwuhk Study kin wia ehu mihding en mwomwohdiso kan oh met wehwehki me met kin wia kisehn sapwellimen Siohwa koasoandi kan pwehn kaweid sapwellime aramas akan, e kin wia pwais kaselel ieu ma Pwuhk Study en Mwomwohdiso wiawi nan imwomw. Tohto kin nda me irail paiekihda ni pali ngehn pwehki irail mweidohng mwomwohdiso en doadoahngki imwarail kan ni ahl wet.
3 Ma ke lemeleme me ke kak doadoahngki imwomw ong wasahn tuhpene kan, menlau ndaiong elder kan me mwomwohdiso kan kak doadoahngki imwomw ma re mwahuki. Mwein elder kan kin rapahki pil ekei wasa kan likin wasa kan me mwomwohdiso kin doadoahngki ahnsou wet. Ma ke sohte kak doadoahngki imwomw ong Pwuhk Study en Mwomwohdiso, iaduwen—ke kak doadoahngki imwomw ong wasahn tuhpene en kalohk? Ma elder kan sohte pahn doadoahngki imwomw ahnsou wet, irail pahn perenki ese me ke kak mweidohng mwomwohdiso en doadoahngki imwomw pwehki mwein ehu rahn mwomwohdiso pahn anahne. Mwein ehu rahn ke pahn ahneki peren me kin kohsang mwomwohdiso doadoahngki imwomw.
4 Kasalehda Tiahk Mwahu: Ni ahnsou me kitail kin tuhpene nan imwen tohnmwomwohdiso kan, koaros me kin iang anahne kasalehda wahu ong tohnihmwo oh sapweo oh arail dipwisou kan. Pahpa oh nohno kan pahn tehk me neirail seri kan kin mihmihte nan wasao me tohnihmw nda en doadoahngki, oh pahpa oh nohno sohte pahn mweidohng neirail seri kan en kohla wasa teikan nan ihmwo. Kitail anahne pil kasalehda limpoak ong mehn mparail kan, oh en dehr kauwehla arail onepek oh nsenamwahu.—2 Kor. 6:3, 4; 1 Pit. 2:12.
5 Ipru 13:16 kin kangoange kitail en dehr manokehla “wiewia mwahu kan oh atail sawaspene, pwe ih soangen meirong pwukat me Koht kin ketin kupwurperenki.” Ma ke mweidohng mwomwohdiso en doadoahngki imwomw—met kin wia ehu ahl en wia mwahu ong meteikan oh pil “wauneki Siohwa ni ahmw doadoahngki soahng kan me ke ahneki oh naineki.”—Lepin Padahk 3:9.