Kalohk Nin Duwen Pwihn en Sounkalohk kan Kin Wahdo Peren
1 Ni ahnsou me Sises kadarala sapwellime tohnpadahk isiakan en kalohk, e padahkiong irail dahme irail pahn nda, oh pil koasoanehdi irail pwe irail pahn wad riemen, oh pil kasalehong irail wasa kan me irail pahn kalohk ie. Mehpwukat sewese irail en ahneki peren. (Luk 10:1-17) Pil duwehte rahnwet, kalohk nin duwen pwihn ehu kin sewese sapwellimen Koht aramas akan en kaunopada, koasoanehdi mwahu oh ale kangoang me anahn pwehn kalohk ni ahl me keieu mwahu.
2 Elder kan Kin Tiengala Mwowe: Elder kan kin ahneki pwukoa kesempwal ni arail kin sewese sounkalohk koaros en kaukaule iang kalohk. Sounapwalih en Kalohk kin tiengala mwowe ni e kin koasoanehdi doadoahk en kalohk sang Ni Are lel Ni Alim. Irail me kin wia Sounapwalih en Pwuhk Study kan anahne koasoanehdi koasoandi kan ong irail me iang ah Pwuhk Study, keieu koasoandi kan en Rahn Kaunop oh Rahn Sarawi. Ekei pak, ni ahnsou me mwomwohdiso pwon kin tuhpene ong kalohk, duwehte tuhpene en kalohk mwurin Onop en Kahn Iroir, emen emen irail me wia Sounapwalih en Pwuhk Study anahne apwalih anahn en irail me iang ah Pwuhk Study.
3 “Koasoanehdi Mehkoaros Nin Duwen Koasoandi Pwung oh Konehng”: Brother me ahneki pwukoa en kihpeseng pwihn en kalohk pahn anahne tepida ni kuloak me kileledi en tepida oh tuhpene wet pahn reireiki minit 10 de 15. E pahn mwahu ma e pahn koasoanehdi pwihn en kalohk kan oh kihong irail arail wasahn kalohk (ihte e sohte pahn wia met ma Sounapwalih en Pwuhk Study pahn wia met) mwohn irail pahn kaimwisekla tuhpene wet ki kapakap. Met kin katikitikala ahnsou kan me sounkalohk kan pahn kohpene oh koasoakoasoi nan wasahn kalohk, me kin kakete kihsang wahu en atail doadoahk en kalohk. E pil pahn pwung ong kaweid en Pohl me mahsanih: “Kumwail koasoanehdi mehkoaros nin duwen koasoandi pwung oh konehng.” (1 Kor. 14:40, New World Translation) Irail koaros me kin iang tuhpene en kalohk kan anahne wia uwen arail kak en mwadang lel wasahn tuhpene ong kalohk mwohn tuhpene wet pahn tepida, oh irail anahne utungada koasoandi kan me brothero kin wiahda, oh pil irail anahne mwadang kohla ni wasahn kalohk mwurin tuhpene en kalohk imwisekla.
4 Miniminpene Nan Kalohk: Koasoandi kan en kalohk nin duwen pwihn ehu kin kihong kitail atail ahnsou mwahu en koasoakoasoi ong tohnmwomwohdiso teikan oh wehwehkin irail. E sohte sapwung en koasoanehdi mwowe en iang emen nan kalohk, ahpw e kakete wia mehkot mwahu ong kitail ma kitail sohte pahn koasoanehdi mwowe en iang emen. Mwein brothero me kihpeseng pwihn en kalohk pahn koasoanehdi me ke pahn iang emen me ke sohte nohn ese, oh met pahn kak sewese kitail en “katehlapala” atail limpoak ong meteikan.—2 Kor. 6:11-13.
5 Kalohk nin duwen pwihn ehu pahn wia kangoang laud ong kitail oh pil pahn sewese kitail en miniminpene nin duwen “tohndoadoahk kan me kin wiahki ehu ni atail doadoahk en me mehlelo.” (3 Sohn 8) Kitail en wia uwen atail kak en miniminpene ni atail kalohk nin duwen pwihn ehu!