Kalahnganki Sapwellimen Koht Mahk
1 Mwohn ahn wahnpoaron Pohl a wiahla Kristian emen, e kin kasalehda me e uhwong laud irail me kin kalohkiseli padahk en Krais. Ahpw, pwehki e sansal me e sehse dahme e wia, Koht kasalehong ih mahk. Siohwa kasalehong Pohl kadek oh Siohwa ketikihong ih pwukoa kesempwal en kalohk. Pohl inenen kesempwaliki pwukoa wet. (Wiewia 26:9-18; 1 Tim. 1:12-14) Pohl kalahnganki mahk me Siohwa ketin kasalehong ih, oh met kamwekid ih en tohnmetei oh wia uwen ah kak koaros en kapwaiada pwukoa me Siohwa ketikihong ih.—2 Kor. 12:15.
2 E sansal me Koht pil kasalehong kitail mahk, kahrehda E pil ketikihong kitail atail pwukoa en kalohk. (2 Kor. 4:1) Duwehte Pohl, kitail anahne kasalehda me kitail kalahnganki mahk me Siohwa kasalehong kitail ni atail pahn wia uwen atail kak koaros en sewese meteikan en kekeirada ni pali ngehn. Ehu ahl me kitail kak wia met iei ni atail pahn tepida onop Paipel rehn aramas akan oh nantihong onop rehrail wihk koaros.
3 Tepida Onop Paipel Rehn Aramas akan: Ehu ahl me kitail kak tepida onop Paipel rehn aramas akan iei en tepikihda atail kaukaule wahla makisihn kapw kan ong irail. Ni atail pahn kalap tuhwong irail, met pahn sewese kitail en wehwehki duwen arail anahn akan oh dahme irail kin nsenohki de pwunodki. Mwuhr, mwein artikel ehu pahn kohda nan makisihn kan me kitail kak doadoahngki pwehn tepida onop Paipel rehrail ni atail doadoahngki Kupwurki brochure. Mwurin mwo, kitail kak pousehla doadoahngki Kupwurki brochure oh pil kitail kak kihong ih makisihn kapw kan.
4 Kapakap oh Nanti Anahn: Kapakap iangahki nanti pahn sewese kitail nan kalohk. Emen pioneer sister me kin onop Paipel rehn aramas emen, kapakapki me Siohwa en kapaiada ih oh sewese ih en onop Paipel rehn ekei aramas. E wia mwekid kan me pwung ong ah kapakap akan. E kasawih pein ah kalohk oh tamanda me e sohte kin idek rehn aramas ma irail men onop Paipel reh ni ahnsou me e kin pwurehng pwurala rehn aramas akan. Ni ahnsou me e tepida idek rehn aramas ma e kak onop Paipel rehrail, aramas riemen tepida onop Paipel reh.
5 Ni mehlel, kitail ahneki pwais kaselel pwehki kitail kak kisehn doadoahk en kalohkiseli “Rongamwahu duwen kadek oh mahk-kalahngan me Koht kasalehda”! (Wiewia 20:24) Kitail en mweidohng sapwellimen Koht mahk en kamwekid kitail en sewese aramas teikan en paiekihda sapwellimen Siohwa kadek oh mahk-kalahngan.