Kitail Kin Papah Koht Men me “Diren Kadek Kalahngan”

1. Ia duwen omw pahn kawehwehda aramas emen me kin kasalehda kadek kalahngan, oh koasoi dahieu me padahkihong kitail duwen emen me kasalehda kadek kalahngan?

NI ATAIL kin medewe duwen aramas emen me kadek kalahngan, ele kitail kin medewehla eh kin kasalehda kadek, limpoak, oh poakehla meteikan. Ele kitail pil kin tamanda koasoipen ohlen Sameriao me Sises mahsanih duwe. Ohl menet me kohsang ehu wehi tohrohr “kadek ong” ohlen Suhs men me loallap suwed kei kemehda oh pirapa. Ohlen Sameriao “uhdahn poakehla” ohlen Suhso me ohlaier oh ni kadek, apwalihala. (Luk 10:29-37) Karasaras wet padahkihong kitail duwen kadek kalahngan me wia ehu sapwellimen Koht irair kaselel kan. Koht kin ketin kadek kalahngan pwehki e ketin poakohng kitail, oh e kin ketin kasalehda irair wet ong kitail ehuehu rahn.

2. Ia pil ehu ahl me emen kak kasalehda kadek kalahngan?

² Mie pil ehu ahl me emen kak kasalehda kadek kalahngan. Emen me kin kadek kalahngan ele pilada en dehr kaloke emen me konehng ale kalokepe. Siohwa kin ketin kasalehiong kitail kadek kalahngan ni soangen ahl wet. Sounmelkahkao koasoia: “E sohte kin ketin kalokei kitail nin duwen me konehng kitail.” (Mel. 103:10) Ahpw ekei ahnsou, Siohwa kin ketin panawih laud emen me wiahda dihp.

3. Peidek dah kan me kitail pahn koasoiapene?

³ Nan iren onop wet, kitail pahn koasoiapene peidek siluh: Dahme kahrehda Siohwa kin ketin kasalehda kadek kalahngan? Emen kak kihda peneu laud ahpw ni ahnsowohte kasalehda kadek kalahngan? Oh dahme pahn sewese kitail en kasalehda kadek kalahngan? Kitail pahn kilang ia duwen Mahsen en Koht eh sapengala peidek pwukat.

KAHREPEN SIOHWA KIN KETIN KASALEHDA KADEK KALAHNGAN

4. Dahme kahrehda Siohwa kin ketin kasalehda kadek kalahngan?

⁴ Siohwa kin ketin kupwurperenki kasalehda kadek kalahngan. Wahnpoaron Pohl ntingihedi me Koht “me diren kadek kalahngan.” Wasaht, Pohl kin koasoakoasoia duwen sapwellimen Koht kadek kalahngan ni eh ketikihda koapworopwor en mour nanleng ong sapwellime ladu keidi soh unsek kan. (Ep. 2:4-7) Ahpw Siohwa sohte ketin kasalehda kadek kalahngan ong irail pwukatte. Sounmelkahkao Depit ntingihedi: “[Siohwa] kin kupwur mwahu ong aramas akan koaros oh kin ketin kalahngan ong wiepen nin lime kan koaros.” (Mel. 145:9) Pwehki Siohwa ketin poakohng aramas, e kin ahnsou koaros ketin kasalehda kadek kalahngan ni ahnsou me mie kahrepe mwahu ong ih en ketin wia met.

5. Ia duwen Sises eh esehla duwen kadek kalahngan me Semeo ketin sapwellimanki?

⁵ Sises ese laudsang koaros uwen Siohwa eh kin ketin kupwurperenki kasalehda kadek kalahngan. Erein sounpar tohtohie mwohn Sises eh ketidihdo sampah, e kin patopato rehn Siohwa nanleng. (Lep. Pad. 8:30, 31) Pak tohto Sises kilang Semeo ketin kasalehiong aramas dipan kan kadek kalahngan. (Mel. 78:37-42) Nan sapwellime padahk kan, Sises kin kalapw mahsanih duwen irair kaselel wet me Semeo ketin sapwellimanki.

6. Karasaras dahieu me Sises ketin doadoahngki pwehn sewese kitail en wehwehki duwen kadek kalahngan me Semeo sapwellimanki?

⁶ Nin duwen me iren onop en mwoweo kasalehda, Sises doadoahngki koasoipen pwutak me salongalao pwehn kasalehda uwen Siohwa eh kin ketin kupwurperenki kasalehda kadek kalahngan. Pwutako kohkohsang ni imweo oh “kesehla mwahl eh dipwisou ko sang ni eh mourki mour suwed.” (Luk 15:13) Mwuhr, e koluhkihla eh mour suwedo, aktikitikla, oh pwurala imweo. Ia duwen eh pahpao mwekidki met? Pwutako sohte anahne awih ahnsou werei pwehn esehda. Sises mahsanih: “Ni eh [pwutako] mihmihte wasa doh, semeo ahpw kilangada ih oh poakehla kowahlap, e ahpw tangalahte pwoalehdi oh metik.” Pahpao sohte kasarowehdi nah pwutako. Ahpw ni kadek kalahngan, e mahkohng pwutako oh pwurehng kasamwolong nan eh peneineio. Pwutako wiahda dihp laud, ahpw pwehki e koluhla, eh pahpao mahkohng. Nan koasoi pwoatet, pahpao me kasalehda kadek kalahngan kin karasaraskihong Siohwa. Sises doadoahngki koasoi kompoake wet pwehn kasalehiong kitail me Siohwa kin ketin kupwurperenki mahkohng me dipan akan me kin uhdahn koluhla mehlel.​—Luk 15:17-24.

7. Ia duwen Siohwa eh ketin kasalehda kadek kalahngan eh kasalehda sapwellime erpit laud?

⁷ Siohwa kin ketin kasalehda kadek kalahngan pwehki sapwellime erpit uhdahn siksang ahn koaros. Siohwa kin ahnsou koaros ketin wiahda pilipil kan me mwahu ong sapwellime aramas akan. Paipel mahsanih me “erpit sang powe” kin “diren kadek kalahngan oh wiewia mwahu.” (Seims 3:17) Duwehte pahpa limpoak men, Siohwa ketin mwahngih me sapwellime kadek kalahngan wia kamwahu ehu ong sapwellime seri kan. (Mel. 103:13; Ais. 49:15) Pwehki Siohwa kin ketin kasalehda kadek kalahngan ong sapwellime kan, irail ahneki koapworopwor ong ahnsou kohkohdo mendahki irail aramas soh unsek kei. Eri pwehki Siohwa sapwellimanki erpit laud, e kin ketin kasalehda kadek kalahngan ahnsou koaros ma e mwahngihada kahrepe mwahu ehu en ketin wia met. Ahpw Siohwa pil ketin mwahngih iahd me e sohte pahn ketin kasalehda kadek kalahngan. Ni erpit, e sohte kin ketin kasalehda kadek kalahngan ma met pahn mweidohng wiewia sapwung ehu en pousehlahte wiewiawi.

8. Koasoandi dahieu me anahn ekei pak, oh dahme kahrehda?

⁸ Ia duwen ma emen me kin papah Koht pilada en mourki mour suwed. Eri dahme kitail pahn wia? Siohwa ketin doadoahngki Pohl en kaweidki mwomwohdiso: “Kumwail en uhdihsang amwail werekiong” ih. (1 Kor. 5:11) Irail kan me kin wiahda dihp laud oh sohte koluhla kin piskensang nan mwomwohdiso. Koasoandi wet anahn pwehn pere riatail Kristian lelepek kan oh pil kasalehda sapwellimen Siohwa koasoandi sarawi kan. Ahpw ekei kin apwalki en medewe me piskenla kin kasalehda sapwellimen Koht kadek kalahngan. Ia duwe, met mehlel? Kitail pahn kilang.

E WIA ELEN KADEK KALAHNGAN EN PISKENSANG EMEN NAN MWOMWOHDISO?

9-10. Nin duwen me Ipru 12:5, 6 mahsanih, dahme kahrehda kitail kak nda me koasoandi en piskenla kin kasalehda kadek kalahngan? Menlau karasahda.

⁹ Ni atail kin rong pakair nan atail mwomwohdiso en Kristian me emen me kitail ese oh poakohng “solahr wia emen Sounkadehdehn Siohwa,” kitail kin uhdahn nsensuwedkihla. Ele kitail kin medewe ma uhdahn mie kahrepen en piskensang nan mwomwohdiso me kitail poakohngo. Ia duwe, piskenla uhdahn kin kasalehda kadek kalahngan? Ei uhdahn. Ma emen anahne ale peneu, eri e wia elen erpit, mahk, oh limpoak en panawih ih ni ahl me konehng. (Lep. Pad. 13:24) Met kak sewese emen me piskenla en wiahda wekidekla kan oh koluhla? Ei e kak. Riatail me tohto me wiahda dihp laud nda me arail piskenla sewese irail en pohnese uwen laud en dihp me re wiahda, sewese ren koluhla oh wiahda wekidekla kan, oh pwurodo rehn Siohwa.​—Wadek Ipru 12:5, 6.

¹⁰ Medewehla karasaras wet. Sounsilepen sihpw men tehkada me emen nah sihpw ko soumwahu. E ese me e anahne katohrehla sihpwo sang sihpw teikan pwe en kak apwalihala soangen soumwahwo me sihpwo ahneki. Ahpw sihpw kan kin men patpene, oh ele irail pahn lingeringerkihda arail tohrohrpeseng. Ia duwe, met wehwehki me sounsilepen sihpwo lemei ni eh katohrehla sihpwo? Uhdahn soh. E ese me ma e mweidohng sihpw soumwahwo en patehng sihpw teiko, soumwahwo pahn doupeseng. Pwehki e katohrehla sihpw soumwahwo, e perehla pelin sihpwo pwon.​—Pil kilang Lipai 13:3, 4.

11. (a) Ni ahl dah kan me kitail kak kapahrekiong me piskenla men sihpw soumwahu men? (b) Dahme me piskenla kan kak wia, oh sawas dah me re kak ale?

¹¹ Kitail kak kapahrekiong Kristian men me piskenla sihpw men me soumwahu. Pwehki eh nanpwungmwahu rehn Siohwa ohla, e duwehte emen me soumwahu. (Seims 5:14) Duwehte aramas me ahneki soumwahu ehu me kak kahrehiong meteikan en soumwahuda, meno me kauwehla eh nanpwungmwahu rehn Siohwa ele kak kahrehiong meteikan en wia me suwed. Eri mie soangen irair kei me aramaso me wiahda dihp laud anahne piskensang nan mwomwohdiso. Koasoandi wet kin kasalehda sapwellimen Siohwa limpoak ong irail me lelepek kan nan mwomwohdiso oh e kak sewese me wiahda dihp laudo en pohnese uwen laud en dihp me e wiahdao oh koluhla. Erein eh piskenla, e kak iang towehda mihting kan, wasa me e kak ale kaweid kan sang nan Paipel oh pwurehng kakehlakahda eh pwoson. E pil kak ale pein nah sawasepen Paipel kan oh kak kilang prokram en JW Broadcasting^®. Oh ni elder kan ar kilang eh wiahda wekidekla kan, irail ele pahn kihong ih kaweid kan ni ahnsou kan pwehn sewese ih en kamwahwihala eh nanpwungmwahu rehn Siohwa.b

12. Elen limpoak oh kadek kalahngan dahieu me elder kan kak wiahiong emen me sohte koluhkihla dipe?

¹² E kesempwal en tamataman me irail kante me sohte koluhla iei me kin piskenla. Elder kan ese me re anahne uhdahn medewe kanahieng mwohn arail pilada en piskensang emen nan mwomwohdiso. Irail ese me Siohwa kin ketikihda peneu “ni pwung,” oh e ketin kupwurki irail en wia duwehte. (Ser. 30:11) Elder kan poakohng riarail Kristian kan, oh irail sohte men wia mehkot me pahn kauwehla arail nanpwungmwahu rehn Siohwa. Ahpw ekei ahnsou, e wia elen limpoak oh kadek kalahngan en kihsang nan mwomwohdiso erein ahnsou ehu mehmeno me wiahda dihp laud.

13. Dahme kahrehda Kristian men nan Korint anahne piskenla?

¹³ Medewehla dahme wahnpoaron Pohl wiahiong emen Kristian ni mwehin tepin Kristian ko me sohte koluhkihla dipeo. Ohlo kin wia nsenen pwopwoud ong eh pahpao pwoudo. Tiahk wet uhdahn suwed! Pohl ese me Siohwa ketin mahsanihong mehn Israel ko mahs: “Pwutak emen me pahn wia nsenen pwopwoud ong emen en eh pahpa eh pwoud kan, e kanamenekihalahr eh pahpa oh ira koaros pwutako oh liho, pahn kamakamala.” (Lip. 20:11) Pohl sohte kak ndaiong mwomwohdisou me ohlo anahne kamakamala. Ahpw e ndaiong mehn Korint ko en piskensang ohlo nan mwomwohdiso. Ahn ohlo tiahk suwedo kin kamwakid meteikan nan mwomwohdiso, ekei irail pil medewe me eh dihpo sohte uhdahn laud!​—1 Kor. 5:1, 2, 13.

14. Ia duwen Pohl eh kasalehda kadek kalahngan ong ohl me piskenlao nan Korint, oh dahme kahrehda? (2 Korint 2:5-8, 11)

¹⁴ Ahnsou ehu mwuhr, Pohl esehda me ohlo wiadahr wekidekla laud kei. Ohlo uhdahn koluhla! Mendahki ohlo kahdsuwedihala mwomwohdiso, Pohl ndaiong elder ko me e sohte men “nohn lemei.” E ndaiong irail: “Kumwail anahne mahkohng ih ni kadek oh kansenamwahwihala.” Tehk dahme kahrehda Pohl ndahki irail en wia met: “Pwe eh nsensuwed laud en dehr powehdi ih.” Pohl poakehla ohl koluhlao. Pohl sohte men kilang ohlo en nohn nsensuwedkihla dahme e wiahdao me kakete kahrehiong en uhdihsang peki mahkpen dipeo.​—Wadek 2 Korint 2:5-8, 11.

15. Ia duwen elder kan ar kak kihda peneu laud oh ni ahnsowohte kasalehda kadek kalahngan?

¹⁵ Duwehte Siohwa, elder kan kin men kasalehda kadek kalahngan. Irail pahn panawih laud me wiahda dihp laudo ni ahnsou me anahn ahpw irail pil pahn kasalehda kadek kalahngan ni uwen me re kak. Ma elder kan sohte douluhl panawih me wiahda dihp laudo, irail sohte kin kadek kalahngan. Irail kin mweidohng tiahk suwedo en wiewiawihte. Ahpw ia duwe, elder kante me anahne kasalehda kadek kalahngan?

DAHME KAK SEWESE KITAIL KOAROS EN KASALEHDA KADEK KALAHNGAN?

16. Dahme Lepin Padahk 21:13 mahsanih me Siohwa pahn ketin wiahiong irail kan me sohte kin kasalehda kadek kalahngan?

¹⁶ Kristian kan koaros anahne kahlemengih Siohwa oh kasalehda kadek kalahngan. Dahme kahrehda? Ehu kahrepe iei me Siohwa sohte pahn ketin karonge irail kan me sohte kin kasalehda kadek kalahngan ong meteikan. (Wadek Lepin Padahk 21:13.) Sohte emen rehtail men Siohwa en sohla ketin karonge atail kapakap kan, kahrehda kitail en kanahieng en dehr wiahla emen me kin lemei. Kitail en dehr sohpeisang riatail Kristian kan me kin wie lokolok, ahpw kitail en ahnsou koaros men rong “ngilen peksawas en me semwehmwe kan.” Duwehte met, kitail kin wia uwen atail kak en kapwaiada mehn kasukuhl me kohsang iren Paipel wet: “Mehmen me sohte kin kasalehda kadek kalahngan, e sohte pahn diar kadek kalahngan ni eh pahn ale kadeik.” (Seims 2:13) Ma ni aktikitik kitail kin tamataman uwen laud en atail anahne kadek kalahngan, kitail pahn men kasalehda kadek kalahngan. Kitail men keieu kasalehda kadek kalahngan ong emen me koluhkihla dipeo oh pwurodo nan mwomwohdiso.

17. Ia duwen Nanmwarki Depit eh kasalehda kadek kalahngan?

¹⁷ Mehn kahlemeng kan nan Paipel kak sewese kitail en kasalehda kadek kalahngan oh dehr lemei. Karasepe, medewehla Nanmwarki Depit. E kin kalapw kasalehda kadek kalahngan. Mendahki Sohl men kemehla ih, Depit kasalehda kadek kalahngan ong nanmwarkio me Koht ketin idihada. E sohte song en ikih Sohl de kamedekihala.​—1 Sam. 24:9-12, 18, 19.

18-19. Ahnsou riau dah me Depit sohte kasalehda kadek kalahngan?

¹⁸ Ahpw Depit sohte kin kasalehda kadek kalahngan ahnsou koaros. Napal wia ohl uhdahn lemei men me kasarowehdi Depit oh nah ohl ako oh sohte men kihong kanarail mwenge. Met kahrehda Depit en uhdahn lingeringerda oh koasoanehdi en kemehla Napal oh ohl koaros nan eh peneineio. Ahpw ahn Napal pwoudo, Apikail, wia lih kadek oh kanengamah men. E mwadangete wahla mwenge rehn Depit. Eri Depit sohte kemehla Napal oh nah ohl ako.​—1 Sam. 25:9-22, 32-35.

¹⁹ Pil ehu ahnsou, soukohp Nadan koasoiaiong Depit duwen ohl kepwehpwe men me pirapahsang nein mehn mpe semwehmweo nah sihpw kompoakeo. Depit uhdahn lingeringerda oh nda: “I kahukihla KAUN-O me ketin ieias, me soangen aramas me wiahda soangen tiahk wet, uhdahn konehng en kamakamala!” (2 Sam. 12:1-6) Depit ese duwen Kosonned en Moseso. Sounpirap men me pirapahla sihpw men anahne kapwungohng me naineki sihpwo sihpw pahmen. (Eks. 22:1) Eri e pahn wia tiahk lemei ehu en nda me sounpirapo anahne kamakamala. Ni mehlel, Nadan koasoiahda koasoi pwoatet pwehn sewese Depit en wehwehki me dihp me Depit wiahdao uhdahn suwedsang! Oh Siohwa ketin kasalehda kadek kalahngan ong Depit laudsang dahme Depit men wiahiong sounpirap sihpwo nan ahn Nadan karasaraso!​—2 Sam. 12:7-13.

20. Dahme kitail kak sukuhlkihsang ahn Depit mehn kahlemeng?

²⁰ Tehk me ni ahnsou me Depit lingeringerda, e koasoanehdi me Napal oh nah ohl ako koaros konehng kamakamala. Mwuhr, Depit pil nda me ohl kepwehpweo nan ahn Nadan karasaraso anahne kamakamala pwehki dahme e wiahdao. Ahpw Depit wia ohl kadek men, eri dahme kahrehda e kadeikada sounpirapo ni lemei? Medewehla dahme ahpwtehn wiawihong Depit. Ni ahnsowo, kadeikpen loalen Depit kin kapwunode ih. Ni emen eh kadeikada meteikan ni lemei, met kasalehda me eh nanpwungmwahu rehn Siohwa luwet. Ni inen, Sises mahsanihong sapwellime tohnpadahk kan: “Uhdihsang amwail kin kadeik meteikan pwe kumwail en dehr pakadeikda; pwe kadeik me kumwail kin kadeingki meteikan, kumwail pahn pil pakadeingkihda.” (Mad. 7:1, 2) Eri kitail en wia uwen atail kak en dehr lemei, ahpw kitail en nantihong duwehte atail Kohto me kin “diren kadek kalahngan.”

21-22. Ia ekei ahl mwahu kan me kitail kak kasalehda kadek kalahngan?

²¹ Ma kitail kin kadek kalahngan, kitail sohte pahn poakehlahte meteikan. Aramas me kadek kalahngan kin wia soahng kan pwehn sewese meteikan. Eri kitail koaros kak tehkada mwahu irail kan me anahne sawas nan atail peneinei, mwomwohdiso, oh wasahn kousoan. Kitail pahn diarada ahnsou mwahu tohto en kasalehda kadek kalahngan! Ia duwe, mie me anahne emen en kansenamwahwihala ih? Kitail kak sewesehki dahme anahn, ele kihda mwenge de kasalehda kadek ni ahl teikan? Mie Kristian men me pwurodo nan mwomwohdiso me anahne kompoakepah mwahu men en kangoange ih? Kitail kak koasoiaiong meteikan duwen rongamwahwo pwehn kansenamwahwihirailla? Met iei ehu ahl keieu mwahu en kasalehda kadek kalahngan ong aramas koaros me kitail tuhwong.​—Sohp 29:12, 13; Rom 10:14, 15; Seims 1:27.

²² Ma kitail kin pehmitikiong soangen anahn pwukat, kitail pahn diarada me mie ahnsou mwahu tohto en kasalehda kadek kalahngan. Ni atail kin kasalehda kadek kalahngan, kitail pahn uhdahn kaperenda Samatailo nanleng, Kohto me kin “diren kadek kalahngan”!