Kasalehda Kupwurkalahngan—Iaduwen?
“Kitail en wia mwahu ong aramas koaros; ahpw mehlel ong irail kan me kisehn atail pwoson.”—KALESIA 6:10.
1, 2. Dahme karasaras en ohlen Sameria kadek men padahkihong kitail duwen kupwurkalahngan?
NI EH wie koasoakoasoi ong Sises, sounpadahk en Kosonnedo men idek reh patohwan: “A ihs me mehn mpei?” Nan eh pasapeng, Sises koasoiahda karasaras wet: “Aramas emen kohdihla sang Serusalem kohdilahng Seriko; loallap suwed kei ahpw poarokedi, kulihasang eh likou kan, kemeselihte lao kalipwelipwehda kereniong mehla, re ahpw kohkohlahsang. Samworo men ahpw keididihla nanialohte; ni eh kilangada aramaso, e douluhllahsang keid apali ahlo. Pil duwehte mehn Lipai men keid wasao, kilangada ohlo, e ahpw pil douluhllahsang keid apali ahlo. A ohlen Sameria men me wiewia eh seiloak oh pil keid wasao, ni eh kilangada aramaso, nan kapehde mwekidikihda eh poakehla. E ahpw keiong mpe, kieldiong leh oh wain pohn wasa ohla kan en paliwere oh kidimpene. E ahpw kidahng pohn dakepe oh walahng nan imwen keiru ehu; e ahpw apwahpwalih wasao. A mandahn rahno e ahpw kihong mwohni silper riau kaunen imwen keiruwo oh ndaiong, ‘Apwalih mahs ohl menet, oh ni ei pahn pwurodo I nek kapwungohng uhk mehkoaros me ke pahn luhskihla.’” Mwuri, Sises eri idek rehn me rongorong iho: “Ihs me ke lemehiong rehn me silimen pwukat, me uhdahn mehn mpen aramas me lohdiong loallap suwed ko?” Ohlo eri sapeng mahsanih: “Me patohwan kadek ong iho.”—Luk 10:25, 29-37a.
2 Kadek mehlel kin uhdahn sansalda laud wasaht sang wiewia en ohlen Sameria men ong ohl me kereniong mehlao! Mwekidkihda eh poakehla, ohl en Sameria menet kin mwekid ni ahl ehu me wahdo kamwahu ong ohlo. Laudsang met, ohl en Sameriao uhdahn sehse ihs ohl me e sewesehda. Kupwurkalahngan sohte kin tokedi de sohla wiawi pwehki kahpwal en ehupenehn nanpwungen wehi kan, pelian lamalam, de tiahk en tohn wehi kan. Mwurin e koasoia duwen karasaras en ohlen Sameria kadek men, Sises eri kaweidih me rongorong iho: “Eri, kohwei oh wiahda duwehte.” (Luk 10:37b) Kitail kak kapwaiada kaweid wet oh nantihong en kasalehda kupwurkalahngan ong meteikan. Ahpw iaduwen? Ni ahl dah kan me kitail kak en kasalehda kupwurkalahngan nan atail mour en ehuehu rahn?
“Ma Riatail Ohl De Lih . . . me Sohte Eh Likou”
3, 4. Dahme kahrehda e kesempwal kitail en nsenohki kasalehda kadek de kupwurkalahngan, ahpw mehlel nan mwomwohdiso en Kristian?
3 Wahnpoaron Pohl mahsanih: “Eri, nindokon eh mie atail ahnsou, kitail en wia mwahu ong aramas koaros; ahpw mehlel ong irail kan me kisehn atail pwoson.” (Kalesia 6:10) Ihme kahrehda, kitail en tehkpene mahs iaduwen kitail kak kasalehda kupwurkalahngan ni ahl tohto ong irail kan me iang kisehn atail pwoson.
4 Ni eh kihda kaweid kehlail ong Kristian mehlel akan en kin kasalehda kupwurkalahngan ong emenemen, tohnpadahk Seims ntingihda: “Pwe ni Koht eh pahn ketin wia sapwellime kadeik, e sohte pahn ketin kupwurkalahngan ong aramas me sohte ahneki kalahngan.” (Seims 2:13) Ire kan en irelaud wet kin padahkihong kitail ekei ahl akan me kitail kak en kaukaule kasalehda kupwurkalahngan ong meteikan. Ni karasaras, nan Seims 1:27, kitail wadek: “Eri, iet duwen poadidi ong papah Koht me uhdahn pwung oh unsek mehlelen, me Samatail Koht kin ketin kupwurki: apwalih me sepwoupwou kan oh liohdi kan nan ar apwal akan, oh dehr saminkihla tiahk suwed kan en sampah wet.” Nan Seims 2:15, 16 mahsanih: “Ma riatail ohl de lih [Kristian] men mie, me sohte eh likou, oh kene kisin mwenge pil sohte itar; dah katepen amwail pahn ndaiong, ‘Koht en ketin kupwuramwahwihiuk! Kohkohwei ni popohl oh nsenamwahu,’ ma kumwail sohte kihong mehkot me en mourki?”
5, 6. Ni ahl tohto dah kan kitail kak kasalehda kupwurkalahngan ni atail kin miniminiong tohn atail mwomwohdiso?
5 En nsenohki meteikan oh sewese irail akan me anahne sawas iei ehu kilelepen kaudok mehlel. Atail elen kaudok sohte kin mweidohng kitail en kin kasalehda atail nsenohki meteikan ki lepin lokaia kadek kante me dene kitail koapworopworki soahng koaros pahn pweida rehrail. Ahpw, pepehm en poakehla pahn kamwakid kitail en wia soangen sawas akan ong irail akan me kin uhdahn anahne sawas. (1 Sohn 3:17, 18) Ei, en kaunopada kisin mwenge ong emen me soumwahu, sewesehki me mah kan arail pwukoa doadoahk kan, sawaski mehn peidaid ekei ahnsou me anahnepe mie ong mihding en Kristian, oh sohte kin lehk en sewese irail me warohng ale sawas iei ekei ahl tohto kan me kitail kak kasalehda kupwurkalahngan.—Deuderonomi 15:7-10.
6 Me kesempwal sang en kisikise ki kepwe de dipwisou kan ong towe kan en mwomwohdisohn Kristian me wie lalaudla iei en sewese irail en kakairada arail nanpwungmwahu rehn Koht. Kitail kin ale kangoang laud en kin “kakehlaka irail kan me nan kapehd tikitik, kumwail sewese me luwet akan.” (1 Deselonika 5:14) “Lih mah kan” irail kin ale kangoang en kin “kihwei padahk mwahu.” (Taitus 2:3) Me pid Kristian sounapwalih kan, Paipel mahsanih: “Emenemen irail pahn rasehng wasahn rukusang kisinieng oh melimel.”—Aiseia 32:2.
7. Dahme kitail sukuhlikihsang tohnpadahk kan en Andiok nan Siria duwen en kin kasalehda kadek de kupwurkalahngan?
7 En kapataiong arail kin apwalih liohdi kan, me sepwoupwou kan, oh me pil kin anahne sawas oh kangoang nan arail wasao, mwomwohdiso en tepin Kristian akan kin koasoanehdi soangen mehn sawas kan ong riarail me pwoson akan nan wasa teikan. Karasepe ehu, ahnsou me soukohp Akapwus kohpada me “lehk laud ehu kereniongehr kipehdi sampah pwon,” tohnpadahk ko en Andiok nan Siria “ahpw koasoanehdi me emenemen irail pahn kadarala uwen me e kak pwe en sewese riarail me pwoson akan me koukousoan nan Sudia.” Mepwukat pekederla rehn elder kan wasao oh “Parnapas oh Sohl me wa kohla.” (Wiewia 11:28-30) Iaduwen rahnpwukat? “Ladu lelepek oh loalokong” kin koasoanehdi soangen mehn sawas akan pwehn apwalih riatail brother kan me ele kin lelohng kahpwal duwehte melimel, rerrer en sahpw, de pil iloak laud kan. (Luk 12:42) En pein toukihda atail ahnsou, kehl, oh pil atail kepwe de dipwisou kan pwehn sewese koasoandi wet iei ehu ahl mwahu me kitail kin kasalehda kadek de kupwurkalahngan.
“Ma Kumwail Pahn Lipilipilki Aramas”
8. Iaduwen lipilipilki aramas kin kasohwe wiewia en kupwurkalahngan?
8 Pwehn kihda peneu duwen irair ehu me kin kasohwe wiewia en kadek de kupwurkalahngan oh “kosonned” en limpoak, Seims ntingihdi: “Ma kumwail pahn lipilipilki aramas pwehki mwomwarail kan, eri, kumwail wiahkihda dihp oh Kosonnedo wiahkinkumwailla aramas en kauwe kosonned.” (Seims 2:8, 9) En lipilipilki de kasalehiong aramas akan kadek pwehki irail kepwehpwe de irail aramas lapalap ekei ahpw kaidehn pwehki irail anahne sawas kak kahrehiong kitail en sohte pehmitik ong “ngilen peksawas en me semwehmwe kan.” (Lepin Padahk 21:13) Lipilipilki aramas kin kasohwe ngenen kalahngan. Kitail kin kasalehda kupwurkalahngan sang ni atail kin sohte lipilipilki aramas.
9. Dahme kahrehda e sohte sapwung en kasalehda kadek ong irail akan me warohng?
9 Eri iaduwen, en sohte lipilipilki aramas wehwehki me kitail en dehr kasalehda kadek tohrohr ong emen me warohng? Uhdahn soh. Wahnpoaron Pohl ntinglahng rehn Kristian kan en Pilipai, me pid duwen ienge tohndoadoahk Epaprodaitus: “Kumwail en pil wauneki aramas koaros me duwehte ih.” Pwekida? “Pwehki eh tounmeteikihla eh mour oh kereniong mehla pwehki doadoahk en Krais, pwe en wiahiong ie sawaso me pein kumwail sohte kak wia.” (Pilipai 2:25, 29, 30) Soangen lelepek me Epaprodaitus kin kihong nan eh doadoahk en papah uhdahn warohng ale kaping tohrohr. Laudsang met, nan 1 Timothy 5:17, kitail wadek: “Me mah kan me wiewia doadoahk mwahu duwehte sounkaweid kan, irail uhdahn pahn ale pweipwei laud [“waunla mehlel,” NW] met me mehlel ong irail me kin doadoahk laudki arail padahk oh peneu.” Irair mwahu kan en emen pwehki eh nanpwungmwahu rehn Koht pil warohng en ale kaping tohrohr. En kasalehda kadek ong irail kan me warohng sohte wehwehki me kitail kin lipilipilki aramas.
“A Erpit me Kin Sang Powe . . . Kin Diren Kalahngan”
10. Dahme kahrehda kitail anahne en kanaiehng lowetail?
10 Me pid lowen aramas, Seims ntingihdi: “Lowen aramas uhdahn suwed douluhl oh ketihwo, diren pwoisin suwed. Kitail kin doadoahngki lowatail ong ni kapingpen Kaun-o oh Samatailo, oh pil ong ni atail kin keriahla iangatail kan me wiawihda rasehng Koht. Atail kaping kan oh lokaiahn keria kan kin pwilweisang wasatehkis nan awatail.” Nan ire teikan en irelaud wet, Seims pil kapataiong: “Ma peirin, akatat, oh mehwo kin mie nan mohngiongimwail, eri, kumwail dehr wia dihpiong me mehlelo ni amwail kin suweiki amwail erpit. Soangen erpit wet sohte kin pwilisang nanleng, pwe e wia kisehn sampahte, e sohte kisehn pali ngehn, ahpw e kisehn tepil. Pwe wasa me peirin oh mehwo kin mie, iei wasao me pingiping oh soangen suwed koaros pil kin mi ie. A erpit me kin sang powe, mwohn mehkoaros me mwakelekel, me pil kansenamwahu, kapohl,oh kompoake, me kin diren kalahngan oh kin kahrehda wiewia mwahu tohtohie; e sohte kin lipilipilki aramas, e sohte kin mwalaun.”—Seims 3:8-10a, 14-17.
11. Iaduwen kitail kak en kasalehda kadek ni atail doadoahngki lowetail?
11 Pwehki met, mwomwen atail pahn kin doadoahngki lowetail de koasoi ong meteikan pahn kasalehda ma kitail kin ahneki erpit me kin “diren kalahngan.” Dahme kin sansalda duwen kitail ahnsou me kitail kin aksuweiki pein kitail, likamw, de lipahnede meteikan pwehki peirin de pwehki kitail nanpwung suwed ong irail? Nan Melkahka 94:4 mahsanih: “Ia erein me dipan kan ar pahn akalapalap oh akahksuweiki ar tiahk suwed kan?” Ia uwen lokaia likamw kin mwadang en kauwehla adamwahu en emen me sohte eh sapwung! (Melkahka 64:2-4) Laud sang met, medewehla keper me kak wiawi sang rehn emen “sounkadehde . . . [me] kin lokaia likamw ahnsou koaros.” (Lepin Padahk 14:5; 1 Nanmwarki 21:7-13) Mwurinte e koasoia duwen doadoahngki lowe ni ahl sapwung, Seims mahsanih: “Riei ko, soahng wet sohte konehng en kin wiawi!” (Seims 3:10b) Kadek mehlel kin anahne kitail en doadoahngki lowetail ni ahl mwakelekel, kansenamwahu, oh kapohl. Sises mahsanih: “Eri, kumwail en ese pwe ni Rahnen Kadeiko, aramas koaros uhdahn pahn pwukoahki lokaia mwahl koaros me re wiahier.” (Madiu 12:36) Ia uwen kesempwal kitail en kin kasalehda kadek ni ahnsou me kitail kin doadoahngki lowetail kan!
“Mahkikihong Meteikan Sapwung kan”
12, 13. (a) Dahme kitail sukuhliki duwen kadek sang karasaras en sounpapah me pweipwand ong eh mwohnsapw lapalahn mwohni? (b) Ia wehwehn en mahkohng riatail brother men “pahn pak isuh wad isihsek”?
12 Sapwellimen Sises karasaras duwen sounpapah me pweipwand ong eh kaun, emen nanmwarki, toala rar kei kin kasalehda ehu elen kadek de kupwurkalahngan. Pwehki sohte mehkot me e kak en pwainkihla eh pweipwando, sounpapah menet eri kelehpwikihdi oh pek mahk rehn eh mohnsapwo. “Mwohnsapwo ahpw kupwurehla” oh mahkikihong eh pweipwand oh mweidohng en kohkohla. Ahpw ni en sounpapaho kohieisangete wasao, e kasaingedi kiseh papah men me pweipwandkihong ih toala epwiki te oh ni soh mahk kihong ih nan imweteng. Ni ahnsou me mwohnsapwo rongada duwen me wiawiher, ih eri malipehdo sapwellime sounpapaho oh mahsanih ong ih: “Papah suwed men kowe! I mahkikihong uhk omw pweipwand ong ie koaros pwehki omw peki mahk rehi; a dahme ke sohte mahkikihong iengomw papaho, duwehte ei mahkohng uhk?” Mwohnsapwo eri angiangihada kowahlap oh ketikihong sounpapah menet nan imweteng. Sises eri kaimwisekihla karasaras wet, mahsanih: “Ih duwen me Semei me ketiket nanleng pahn ketin wiahiong kumwail, ma emenemen kumwail sohte pahn mahkohng rie sang nan kapehde.”—Madiu 18:23-35.
13 Ia uwen laud en karasaras wet kin kasalehda me kadek kin pidada en kin mwadang mahkohng emen! Siohwa ketin mahkikihong kitail dipatail kan ni uwen pweipwei laud ehu. E sou pahn konehng kitail en pil “mahkikihong meteikan sapwung kan me re wiahiong kumwail”? (Madiu 6:14, 15) Mwohnte Sises koasoiahda karasaras wet duwen sounpapaho me soh mahk, Piter idek rehn Sises: “Maing ei Kaun, pak depe I pahn mahkohng rieio me kin wia dihpiong ie? E itar ma I pahn mahkohng pak isuh?” Sises ketin sapeng, mahsanih: “Soh e sohte itar pahn pak isipak, ahpw pahn pak isuh wad isihsek.” (Madiu 18:21, 22) Ei, aramas kadek men kin mwadang en mahkohng emen “pahn pak isuh wad isihsek,” met wehwehki, sohte idi.
14. Me pid Madiu 7:1-4, iaduwen kitail kak ele kasalehda kadek de kupwurkalahngan rahn koaros?
14 Ni eh kasalehda pil ehu ahl en kadek de kupwurkalahngan, Sises mahsanih nan sapwellime Kapahrek en Pohn Dohl: “Kumwail dehr kadeik aramas teikan, pwe Koht en dehr ketin kadeingkumwailda. . . . Dahme ke kin tehngki diper me mi nan pwoaren mesen riomw men, a ke ahpw sohte kin nsenohki lepin tuhke me mi nan pwoaren mesomwen? Ia duwen omw kak ndahng riomwo, ‘Nahn, sepit mahs pwe I en kihsang diperen nan pwoaren mesomwen,’ nin lepin tuhke lep eh mi nan pwoaren mesomwen?” (Madiu 7:1-4) Ihme kahrehda, kitail kak kasalehda kadek de kupwurkalahngan rahn koaros ni atail kin nantihong kanengamahiong en meteikan ar sapwung kan oh sohte kin kadeiki irail.
“Wia Mwahu ong Aramas Koaros”
15. Dahme kahrehda wiewiahn kadek sohte anahne en kin ongete kisehtail kan nan pwoson?
15 Pwehki nan Paipel pwuhken Seims kin kasalehda duwen kupwurkalahngan nanpwungen kisehtail akan nan pwoson, met sohte wehwehki me wiewiahn kadek pahn kin sansaldahte nan mwomwohdiso en Kristian. Melkahka 145:9 mahsanih: “E [Siohwa] kin kupwur mwahu ong aramas akan koaros oh kin ketin kalahngan ong wiepen nin lime kan koaros.” Kitail kin ale kangoang laud en “song en kahlemengih ih [Koht]” oh pil “wia mwahu ong aramas koaros.” (Episos 5:1; Kalesia 6:10) Mendahki kitail sohte kin poakohng “sampah, de dipwisou me mihmi nin sampah,” met sohte wehwehki me kitail en sohte pehmitik ong anahn en aramas akan en sampah.—1 Sohn 2:15.
16. Soangen wiewia dah kan me pahn kamwakid atail pahn kin kasalehda kadek ong meteikan?
16 Nin duwen Kristian akan, kitail sohte kin pweiek en ketikihda sawas sohte lipilipil me kitail kak ong pwehn sewese irail akan me kin lelohng “paisuwed” de irail kan me kin mih nan irair en kahpwal laud. (Eklesiasdes 9:11) Mehlel, atail irair akan me pahn padahkihong kitail dahme kitail kak wia de ia uwen me kitail kak sawaski. (Lepin Padahk 3:27) Ni ahnsou me kitail kin kihda sawas ong meteikan, kitail anahne en kanaiehng pwe wiewia mwahu wet sohte pahn kahrehiong emen en isanekihla oh sohte men koadoahkihada ar mour. (Lepin Padahk 20:1, 4; 2 Deselonika 3:10-12) Kahrehda, en kasalehda kadek mehlel iei mwekid ehu me oarepene pepehm en poakehla iangahki koahiek en lamalam pwung.
17. Ia ahl me keieu mwahu en kasalehda kadek ong irail kan me mih likin mwomwohdiso en Kristian?
17 Ahl me keieu mwahu en kasalehda kadek ong irail akan likin mwomwohdiso en Kristian iei en ehukihong irail duwen padahk mehlel en Paipel. Dahme kahrehda? Pwehki pali laud en aramas rahnpwukat kin mwomwen maskunkihla arail kin raparapahki sawas pwehki re sohte ahneki marain en padahk mehlel en Paipel. Pwehki re sehse iaduwen irail pahn kamwahwihala kahpwal kan me kin lelohng irail oh pil sohte arail koapworopwor mehlel ong ahnsou kohkohdo, pali laud en irail kin “rasehng sihpw kei me sohte silepahr.” (Madiu 9:36) Mahsen en Koht kak wia ‘sereperail, mehn kaweid irail,’ sewesekin irail en kak powehdi kahpwal kan en mour. E kak pil wia ‘kamarainpen elerail kan’ ni en Paipel kin kohpada duwen kupwuren Koht ong ahnsou kohkohdo, kihong irail kahrepe kan en kak ahneki koapworopwor kaselel. (Melkahka 119:105) Ia uwen e wia pwais kaselel ehu en iang lohkihong irail kan me inenen anahne rong rongamwahu wet en padahk mehlel! Pwehki “apwal [“kahn kamakam kowahlap,” NW]” kerendohr, met iei ahnsou en iang pidada ni eimah doadoahk en kalohki duwen Wehio oh wia doadoahk en katohnpadahk. (Madiu 24:3-8, 21, 22, 36-41; 28:19, 20) Sohte ehu wiewiahn kadek me kesempwal sang met.
Kisekisehki “Audepen Noumwail Kep oh Pileit kan”
18, 19. Dahme karehda kitail en nantihong kalaudehla irairo me kalahngan kin wiaiong nan atail mour?
18 Sises mahsanih: “Kumwail kisekisehki me semwehmwe kan audepen noumwail kep oh pileit kan.” (Luk 11:41) Pwe wiewia mwahu ehu en wiahla kalahngan mehlel, e anahne en wia kisakis ehu sang nan loalamwahu en emen—sang mongiong ehu me kin diren limpoak oh kadek sapan. (2 Korint 9:7) Ia uwen kainsenamwahu en ese duwen soangen wiewiahn kalahngan wet nan sampah ehu me ahnlahr wiakau aramas, roporop, oh sohte kin nsenohki duwen lokolok kan en meteikan!
19 Eri, kitail en nantihong kalaudehla irairo me kalahngan kin wiahiong nan atail mour. Ma kitail kin anehki kalahngan laud, e pil kak karehiong kitail en duwehla Koht. Met pahn sewese kitail en mourki mour ehu me inenen katapan oh nsenamwahu.—Madiu 5:7.
Dahme Ke Sukuhliki?
• Dahme kahrehda e uhdahn kesempwal en kin kupwurkalahngan, ahpw mehlel ong kisehtail akan nan pwoson?
• Iaduwen kitail kak en kasalehda kupwurkalahngan nanpwungen mwomwohdisohn Kristian?
• Iaduwen kitail kak ele wia dahme mwahu ong irail akan me kin mih likin atail mwomwohdiso?
[Kawehwehpen kilel kan nan ehu ehu pali 18]
Ohl en Samaria men mwekid ni elen kalahngan
[Kawehwehpen kilel kan nan ehu ehu pali 19]
Ahl tohto kan me Kristian kin kasalehda kalahngan
[Kawehwehpen kilel kan nan ehu ehu pali 22]
Ahl me keieu mwahu en kasalehda kalahngan ong irail me mih likin mwomwohdisohn Kristian iei en ehukihong irail padahk mehlel en Paipel