Sewese Peneinei kan en Diarada Peren
1 Peneinei iei koasoandi en aramas ehu me keieu werei nan sampah oh koasoandi ehu me inenen kesempwal nanpwungen aramas. Sangete mahs, peneinei kan me kehlail kin sewese wehio en kehlail. Ahpw e kin kainsensuwed pwe rahnwet peneinei tohto kin luwetla oh kin lelong kahpwal kan pak tohto sang mahs. Kokohp kan me wiawihda sounpahr 2,000 samwalahro kin kasalehda me peneinei kan pahn lelong kahpwal kan. (2 Timoty 3:1-4) Iawasa peneinei kan kak diarada kaweid mwahu kan? Pasepeng mihmihte nan Pwuhk Sarawi, pwuhkohte me kohpada ni oaritik duwen irair kan en rahnwet. Nan March, kitail pahn sewese peneinei kan en diarada mehn sawas kan ong arail kahpwal kan ni kitail pahn kihong aramas me uhdahn men rong neirail pwuhk Wiaiong Mour En Ahmw Peneinei Nsenamwahu. Ke kak song padahk kan me mihmi pah.
2 Pwehki pahpa/nohno kan kin nsenohki pere neirail seri kan, ke kak nda:
◼ “I lemeleme ke pahn pwungki me apwalih atail peneinei rahnwet kin apwal. Dahme ke lemeleme kak sewese noumw seri kan en liksang soahng kan me suwed? [Mweidong en sapeng.] Iet ekei mehn sawas kan me I kin kilang me re pil sewese ie.” Pakalahng ireland waluh nan pwuhken Peneinei oh wadek pali 111, parakrap 28. Kawehwe me pwuhko audaudki kaweid mwahu kan me kin sewese peneinei kan en liksang soahng suwed kan. Ma tohnihmw men rong, idek reh ma e men naineki pwuhko, oh koasoia koasoandi en sawas. Koasoanehdi ahnsou me ke pahn pwurala reh.
3 Ni ahnsou me kitail kin pwurehng pwurala rehn tohnihmwo, ke kak nda:
◼ “Rahn teio ahnsou me kita koasoipene, I kilang me ke kin inenen nsenohki noumw seri kan oh ke kin wia uwen me ke kak en sewese irail en liksang soahng suwed kan. I sehse ma ke wadek pwuhko me I kihong uhk rahn teio de soh, ahpw e kin audaudki kaweid kesempwal me I men kasalehong uhk. [Wadek pali 119, parakrap 12.] Koht ketikihong peneinei kan sawas sang nan sapwellime Mahsen, Pwuhk Sarawi. Ke pahn perenki ma I pahn wia kisin kamwomwada pwehn kasalehda ia uwen mengei en onop Pwuhk Sarawi nin duwen peneinei ehu?”
4 Ma mwersuwed wiawi oh ahpwtehn kohpeseng nan nuhs oh aramas tohto kin medemedewe dahme wiawi, ke kak nda:
◼ “Mwein ke rong duwen dahme wiawi [nda dahme wiawi me nuhs koasoia]. Mendahki kahpwal tohto me kin pwarada nan atail mour en rahn pwukat, ke lemeleme kitail kak ahneki mour en peneinei me peren oh nsenamwahu? [Mweidong en sapeng.] Pwuhk Sarawi kin kasansalehda me e kak wiawi. Ma ke men sukuhliki dahme Pwuhk Sarawi kin koasoiahki duwen peneinei kan me kak diarada peren, ke pahn perenki wadek pwuhk wet.” Kasalehong ih audepen pwuhken Peneinei oh kasalehong ih oaralap en irelaud me siluh de pahieu. “Ke kilang me pwuhk wet kin koasoia soangsoangen ire kan me pid sapwellimen Koht kaweid ong peneinei kan. Ma ke men sukuhliki kaweid pwukat, ke kak naineki pwuhk wet.” Koasoia koasoandi en sawas, oh koasoanehdi ahnsou me ke pahn pwurehng pwurala reh, oh ntingihdi dahme tohnihmwo kin perenki koasoia oh dahme e kin pwunodki.
5 Ahnsou me ke pahn pwurehng pwurala rehn tohnihmwo, medemedewe dahme ke ese duwen ih oh koasoia soahng kan me e kin nsenohki. Ke kak nda:
◼ “Rahn teio me kita koasoipene, I kalahnganki ahmw kasalehda me ke kin wahuneki Pwuhk Sarawi nin duwen sapwellimen Koht pwuhken kaweid ong nsenamwahu en peneinei. [Kasalehda mehkot me tohnihmw koasoia rahn teio.] I wadek mehkot me ke pahn pil perenki wadek.” Kasalehda brochure Kupwurki oh pakalahng iren mehn kasukuhl 8. Wadek oh koasoia ekei parakrap kan me ke lemeleme tohnihmwo pahn perenki wadek. Mwurin ke pahn koasoanehdi ahnsou ehu me ke pahn pwurehng pwurala reh pwehn pousehla wia iren mehn kasukuhlo, kawehwe ong ih duwen Kapahrek ong Wehi Pokon, oh luhke ih en iang towehda.
6 Ma ke men wia padahk mengei oh doadoahngki doaropwe en tract ehu, ke kak nda:
◼ “I men kihong uhk doaropwe wet me oaralap koasoia Paieki Mour En Peneinei.” Kihong tohnihmwo doaropwe, oh luhke ih en idawehn ahmw wadek parakrap keieu oh keriau. Mweidong ih en sapeng peidek kan me mihmi nan parakrap keriau. Wadek parakrap kesiluh, oh mwurin mwo, pakalahng pali 8 nan pwuhken Peneinei, oh kasalehda sawaspen oaralap me koasoia “Koht Kesempwaliki Koasoandi en Peneinei.” Ke kak pousehla oh nda: “Pwuhk wet kin kihda kaweid mwahu ong iaduwen Pwuhk Sarawi kak sewese peneinei kan en kamwahuiala kahpwal kan oh diarada peren. Ma ke men wadek pwuhk wet, ke kak ale noumw pwuhk met.” Padahkiong tohnihmwo duwen koasoandi en sawas oh mweidong ih en wia eh sawas, oh koasoanehdi ahnsou me kumwa pahn pwurehng tuhpene.
7 Peneinei tohto nan sampah diarada peren mehlel ni arail rong kaweid en Pwuhk Sarawi oh kapwaiada kaweido. Kitail anahne nantiong kasalehong aramas koaros pwuhken Peneinei pwehn sewese aramas koaros wasa koaros en ale sawas sang Pwuhk Sarawi oh diarada peren mehlel ni ahnsou kohkohdo.—1 Tim. 6:19.