“Kumwail Wia Met Ong Ni Katamanpei”
1 Aramas kin kalap mweidohng ire kesempwal kan en manoknokla. Met ih ehu karepe, ni ahnsou me e tepiada “sak en soutuk en Kauno,” Sises kehkelikiohng sapwellime tohnpadahk kan: “Kumwail wia met ong ni katamanpei.” Sangete ahnsouwo, ni pahr me Sises pwoula, Kristian kan kin peikiong kehkeliko ni arail kin “kalohki pwoulahn Kauno lao lel eh pahn ketin sapahldo.”—1 Kor. 11:20, 23-26.
2 Ni ahnsou keren, Sises pahn kasamwohlong nan pere kan nanleng irail luhwen “pwihn tikitik” me wie malaulaula. (Lu 12:32; Sohn 14:2, 3) Pahr et luhwen me keidi kan iangahki pokon kalaimwun en “sihpw teikan” me wie tohtohla pahn pil ahneki kapai en kasarawih Sak en Soutik en Kauno, ni April 11. (Sohn 10:16; Kau. 7:9, 10) Atail kalahnganki sapwellimen Siohwa limpoak lapalap ni ah kadaredo sapwellime Ohl iehroso pwehki tohnsampah en kehlailla. Ire kan me pahn pwarada nan Katamano iei kalimeng en Sises, oh ah limpoak, oh ah lelepek lao lel mehla pwehn ketikihda meirong, oh ah kakaun ahnsouwet nin duwen Nanmwarki en Wehin Koht me kokoudahr, oh pil iangahki kapai kan me wehio pahn wahdohng tohnsampah. Met uhdahn wia ahnsou ehu me kitail en tamataman!
3 Kaunopada Met: Kitail koaros en doadoahkpene pwehn wiahiong pahr en Kataman wet en wia ehu ahnsou kaperen oh kalahngan ong pein kitail oh ong irail ko koaros me pahn iang kitail nan Kataman wet. Kitail kak kaunopada mohngiongatail ni atail pahn pwurehng wadek iren Paipel kan me pid kaimwseklahn rahn akan me Sises kalohk oh iangahki wiewia kan me wiawi lao lel ah matala. Kitail en kousapahlih pwuhk en Madiu irelaud 26-27 nan atail onop en peneinei kan mwohn Katamano.
4 Aramas depe me komwi ese me ele pahn iang towehda Katamano ma komw pahn tiengla mwowe pwehn kekeirada rehrail en kalahnganki Katamano, oh luke irail, oh kasalehong irail me se men ren iang Katamano? Ntingihdi ahnsouwet eden irail ko me pahn iang Katamano, oh wia dahme ke kak wia pwehn sewese irail en kohdo. Mwurin met, sewese irail en kaukaulehte kekeirada ni pali ngehn ni omw pahn kangoangehkin irail en towehda mihding kan kaukaule.
5 Erein pahr en Katamano, koasoandi tohrohr kan kin wiawihda pwehn kalaudehla en koaros ahnsou mwahu kan en kalohk. Ki koasoandi (schedule) mwahu, komw kak auxiliary pioneer nan sounpwong en April? nan May? Ehu ahl me keieu mwahu en kasalehda me kitail kin tamataman oh kalahnganki mehkoaros me meiriong en Sises kin wiahiong kitail iei en kosoia duwen atail Koht, Siohwa, oh kapai kan me kaundahn Wehio ki sapwellime Ohlo pahn wahdo.—Melkahka 79:13; 147:1.