“Siohwa Iei Sawasepei”
1 Ni ahnsou me Sises kehkehlikohng tepin sapwellime tohnpadahk kan mahs, e padahkiong irail: “Kumwail rong mwahu pwe I kadarkumwailwei duwehte sihpw kei ong nanpwungen kidien wel kan.” (Madiu 10:16) Ahpw dahme Sises padahkih kahrehda ren masapwehkada oh men uhdihsang kalohk? Soh. Re ahneki madamadau en wahnpoaron Pohl ahnsou me e padahkiong ienge Kristian kan: “Kitail eimah oh patohwan, ‘Kauno [Siohwa] iei sawasepei, I sohte pahn masak! Dahme aramas kak wiahiong ie?’ ” (Ipru 13:6) Re perenkihda kowahlap duwen Koht eh ketin kupwure me re warohng lokolongki saroh pwehki mwaren Sises, oh irail wonoweite padahki oh kawehwe Rongamwahu.—Wiewia 5:41, 42.
2 Rahnwet doadoahk en kalohk kerenieng nek. Duwehte Sises me kohpada, tohn wehi koaros pahn kailongkin kitail. (Madiu 24:9) Aramas kin uhwong doadoahk en kalohk oh kapailoke kitail, oh nan ekei wasa kan, doadoahk en kalohk kin keinapwdi. Ma ahmw pwoson me luwet, ke dehr masapwehkada. Ahpw, ma kitail wehwehki me Siohwa iei Sawaspatail, e pahn kansenamwahuih oh kakehle kitail pwehn dadaurete.
3 Eimah kin wehwehki irair en aramas me kehlail oh kommwad. E sohte kin masak. Sapwellimen Sises tohnpadahk kan anahne eimah pwehn dadaurete. Eimah inenen kesempwal ma kitail sohte men luwetkihla madamadau sapwung en aramas nan sampah me kin uhwong Koht. E kin wia mehn kangoang laud ma kitail kin medemedewe mehn kalemeng mwahu en Sises, me kalowedi sampah! (Sohn 16:33) Pil tamataman me wahnpoaron kan me lelong kasongosong laud kan, ni eimah, mahsanih: “Se uhdahn pahn peikiong Koht, a kaidehn aramas.”—Wiewia 5:29.
4 Kitail Kaidehn Soangen Aramas Me Kin Pweieksang Doadoahk en Kalohk: Kitail anahne nannanti en ahneki madamadau en pweida nin duwen atail doadoahk en kalohk. (Ipru 10:39) Ahnsou koaros tamataman me Siohwa pilada kitail en kasalehong aramas sapwellime limpoak oh mahk ong aramas akan. E sohte kin padahkiong sapwellime aramas en wia mehkot me sohte pahn mie katepe mwahu. Soahng koaros me e kin padahkiong kitail en wia pahn imwila mwahu ong irail me kin poakohng Koht.—Rom 8:28.
5 Atail ahneki madamadau en pweida pahn sewese kitail en rapahki irail me rasehng sihpw kan nan atail wasahn kalohk. Kitail anahne tamataman me aramas kin soukautih pwehki sohlahr arail koapworopwor. Ahpw, atail limpoak ong aramas pahn kamwekid kitail en nantiong wehwehki arail pepehm kan oh kanengamahiong irail. Ahnsou koaros me kitail kin kihla pwuhk de brochure de makasihn de doaropwe rehn emen de kilang me aramaso men rong, kitail pahn akadeiong pwurehng pwurala rehrail mwadang oh kamwekid irail en pwurehng rong padahk mehlel. Kitail en dehr peikasahlki atail koahiek en tepida onop en Paipel rehn aramas. Ahpw, kitail en nantiong kapakapki sawas oh kaweid sang Siohwa, pwe e kak sewese kitail.
6 Kitail uhdahn kamehlele me Siohwa pahn tehk me sapwellime doadoahk pahn wiawi lao lel soahng koaros me e kupwurki nin duwen doadoahk en kalohk pahn nekla. (Pil tehk Pilipai 1:6.) Atail likih Siohwa nin duwen sawaspatail pahn kakehle kitail, ihme kitail “dehr pwangahki atail wiewia mwahu kan.”—Kalesia 6:9.