Re Kak Kilang Me Kitail Weksang Irail
1 Nan pahr samwalahro, pohnangin me kapw 300,000 me iangala kitail ni arail papidaisla. Dahme aramas pwukat kilang rehn Sounkadehdehn Siohwa kan me karehong irail en men iang wiahla kisehn pwihn en Koht? Dahme karehda kitail kin wekihsang pelien kaudok teikan koaros? Iet ekei pasapeng sansal kan:
—Kitail kin kapwaiada Paipel ah kaidehn pein atail lamalam kan: Kitail kin kaudokihong Siohwa Koht “ngehn oh mehlel,” duwehte me Sises Krais padahkihong kitail en wia. Met kin wehwehki en soikala padahk likamw kan oh peikiong sapwellimen Koht Mahsen.—Sohn 4:23, 24; 2 Tim. 3:15-17.
—Kitail kin kohla rehn aramas akan ah kaidehn kitail en awih irail en kohdo rehtail: Kitail alehdahr kehkehlik en Krais me kitail en kalohk oh katohnpadahk, oh kitail kin alasang ah mehn kalimeng en rapahki irail me mohngiong mehlel kan. Kitail kin rapahkin irail nan imwerail kan, pohn ahl akan, oh wasa soh lipilipil kan me re kak dierek ie.—Madiu 9:35; 10:11; 28:19, 20; Wiewia 10:42.
—Kitail kin kihda kasukuhl en Paipel ong aramas koaros ni soh isepe: Kitail kin doadoahngkihla ni soh isepe atail kepwe kan oh atail kehl, en wiahda awa lik samwa ehu ehu sounpar ong doadoahk en Koht. Ni soh lipilipilki aramas, kitail kin onopkiohng aramas koaros Paipel.—Madiu 10:8; Wiewia 10:34, 35; Kaudiahl 22:17.
—Kitail kin kaianda mwahu pwehn sewese aramas kan ni palingehn: Sang ni atail kin pein onopki Paipel oh sang ni kaweid kan me kin kohda nan mihding en mwomwohdiso, oh kapokon kan, kitail kin ale kasukuhl sang powe kesempwal me sohte kin uhdi, me kin karehong kitail en kak kamarainihki mehteikan mehkan me ngehnin.—Aiseia 54:13; 2 Tim. 2:15; 1 Piter 3:15.
—Kitail kin kesempwalki padahk mehlel, oh kin kapwaiada nan atail mour en ehu ehu rahn: Pwehki atail poakohng Koht, kitail kin wiahda wekidekla kan, wekidala atail mour en pahrekiong kupwure. Atail irair kapw kan me rasehng en Krais kin kahreong mehteikan en men rong padahk mehlel.—Kolose 3:9, 10; Seims 1:22, 25; 1 Sohn 5:3.
—Kitail kin nannanti en mour oh doadoahkpene ni popohl: Kekeirada irair kan en Koht kin sewese kitail en kanaiehng atail wiewia kan oh lokaia kan. Kitail kin “rapahki popohl ni eh kehl unsek” rehn aramas koaros.—1 Piter 3:10, 11; Episos 4:1-3.
2 Mehn kalimeng en mouren Krisitan me aramas kan kin kilang nan pwihn en Siohwa kin kamwekidada me tohto en pwungkihla padahk mehlel. Pein atail mehn kalimeng en pil wia soahngen lipwalipwohte pohn irail kan me kin ese oh kin kilang kitail.