Tepida Onop en Paipel kan Sang ni Doadoahngki Brochure en Kupwurki
1 Brochure en Dahme Koht Kupwurki Kitail en Wia? kin wia mehn doadoahk mwahu en padahkiong aramas akan padahk mehlel. Aramas kid kei kin tepida onop en Paipel ehu ehu wihk sang ni arail doadoahngki brochure wet. Ke kin pweida ahmw tepiada oh wia onop en Paipel ong emen sang ni ahmw doadoahngki brochure en Kupwurki?
2 Pali laud kin pehm me e mengei en kihla brochure wet, ahpw ekei kin apwaliki ese dahme re kak nda pwehn tepiada onop. Soangen wiepe dah kan meteikan kin doadoahngki oh pweida mwahu ong tepiada onop en Paipel ni arail kin doadoahngki brochure en Kupwurki? Padahk kan en pah pahn kak sawas laud.
3 Kamwomwada Onop: Ni ahnsou me kitail pahn tepin tuhwong tohnihmw, kitail kak wia laudsang ihte kangoange ih en wia onop en Paipel, ah kitail pil kak kamwomwada iaduwen onop en Paipel kak wiawi. Met kin kihsang pwunod me tohnihmw tohto kin ahneki me pid duwen lepin lokaia “onop.” Ni kitail wehwehkihda iaduwen kitail kak kamwomwada onop, kitail pahn diarada me sang ni atail doadoahngki tepin padahk mwotomwot ieu, kitail kak mwadang tepida onop.
4 Kaunopada Mwahu: Ia uwen atail ngoangki tepiada onop en Paipel pahn kin sansalkihda ia uwen mwahu kitail kin kaunopada ong kalohk. Atail kin kaunopada mwowe pahn sewese kitail en powehdi pepehm en pweiek me kitail kak ahneki me pid duwen doadoahk en wia onop en Paipel. Sang ni atail kin praktis atail padahk pak tohto, kitail pahn kak kalaudehla atail koahiek en koasoakoasoipene. Met pahn sewese kitail en kihsang atail saloh ahpw ni ahnsowohte e pil pahn sewese tohnihmw en dehr saloh.
5 Ni ahnsou me ke pahn praktis ahmw padahk, e pahn mwahu en tehk minit depe ahmw padahk pahn reireiki pwe ken kak padahkiong tohnihmw ia uwen werei ahmw kamwomwada en onop pahn reireiki. Mwurin rahnmwahu, emen brother kin nda: “I kohdo kasalehong komwi at koasoandi en onop en Paipel ni soh isepe. E pahn reireiki minit limau en kamwomwada. Mie ahmw minit limau?” Ke kak kamwomwada iren mehn kasukuhl 1 en brochure en Kupwurki ni minit limau. Mehlel ke kak doadoahngki ekei iren Paipel kante me ke pilada erein ahnsowo, ahpw ni ahmw kanekehla keieun iren mehn kasukuhlo ni minit kei, met tohnihmwo wiahier keieun eh onop. Mwurin met, padahkiong ih me ni ahnsou me ke pahn pwurala reh pwehn onopki iren mehn kasukuhl 2, ke pahn doadoahngki minit 15 te.
6 Padahk kan en pah kin pweida mwahu:
◼ “I men kamwomwada ong komwi ehu koasoandi mengei oh mwotomwot en wia onop en Paipel ni doadoahngki brochure wet Dahme Koht Kupwurki Kitail en Wia? Aramas tohto kin diarada me minit 15 te nan ehu ehu wihk oh nan erein wihk 16 te, re kak diarada pasapengpen Paipel kan ong soangen peidek kesempwal pwukat.” Kasalehda ni mwotomwot audepe kan. Pahkalahng iren mehn kasukuhl 1 oh nda: “Ma ke kak kihong kiht minit limau, se men kasalehong uhk iaduwen met kak wiawi. Iren mehn kasukuhl 1 oaralap me koasoia ‘Iaduwen Ke Kak Diarada Dahme Koht Kupwurki Kitail en Wia.’” Mwurin met, wadek peidek siluh, oh kawehwehda nempe kan nan parentheses. Wadek parakrap 1, oh kasalehong tohnihmw iaduwen e kak diarada pasapeng. Mwein ke kak peki rehn tohnihmw en wadek parakrap 2. Eri ke kak nda: “Sang ire wet, iaduwen ke pahn sapengki peidek wet? [Pwurehng wadek peideko, oh mweidohng tohnihmwo en sapeng.] Ke pahn kilang me mie iren Paipel kan nan ehu ehu parakrap. Iren Paipel pwukat pahn kahre atail madamadau ong pasapeng sang nan Paipel ong peidek pwukat. Karasepe, kitail pahn wadek 2 Timoty 3:16, 17 oh kilang iaduwen ire wet pahn utung ahmw pasapeng me pid Paipel kohsang rehn ihs.” Mwurin wadek parakrap 3, medemedewe duwen peideko, oh wadek Sohn 17:3, oh kahluwa ahn tohnihmw madamadau ong ire kan me e sukuhlikier sang ni kousapahlih iren mehn kasukuhl 1. Ni ahnsowo, ke kak pahkalahng iren mehn kasukuhl 2 oh wadek kaimwiseklahn peidek, “Ahl riau dah kei kitail kak sukuhliki duwen Koht?” Eri idek: “Iahd ke pahn kak koasoanehdi minit 15 pwe kitail en kak koasoiapene iren mehn kasukuhl 2 oh diarada pasapeng?
7 E kesempwal en wia koasoi ni mwotomwot oh kapinga tohnihmwo ahnsou koaros me ke kak. Ni ahnsou me ke pahn koasoanehdi en pwurehng pwurala reh, ke dehr idek ma e men pousehla onopo, ahpw kangoange ih en idawehnla koasoandio ong iren mehn kasukuhl en mwuhr. Padahkiong ih me ke kasikasik pwurehng pwurala reh. Ekei sounkalohk kan kin kangoange tohnihmw en wia onop ni doadoahngki telephone ma e apwal en koasoanehdi en pwurehng tuhpene. Ke pil kak kangoange tohnsukuhlo en nekidala brochureo nan wasa me sohte pahn salongala, oh mengei en diarada ong ahnsou me ke pahn pwurala reh.
8 Koasoanehdi Teng: Mehlel e kesempwal en kaunopada mwahu, ahpw kitail pil anahne koasoanehdi teng en pousehla. E sohte mengei en padahngki ehu iren mehn kasukuhl ni minit keite, kahrehda koasoanehdi teng en praktis ahmw padahk pak tohto pwehn kak saledek en koasoi ni ahnsou me ke pahn kamwomwada onopo. Song en kamwomwada onop rehn aramas koaros me ke tuhwong, ni ahnsoun kalohk en ihmw lel ihmw, ni ahnsou soh lipilipil, oh kalohk ni doadoahngki telephone. Ma ke pahn apwaliki tepiada onop en Paipel, ke dehr mworuskihla. Kitail anahne koasoanehdi teng oh uhdahn men ehukihong meteikan padahk mehlel pwehn pweida mwahu en tepida onop en Paipel kan.—Kalesia 6:9.
9 Sang ni ahmw doadoahngki sawas pwukat, ke pil pahn kak ahneki pwais en sewese emen en kekeid nan elen mour, sang ni tepida oh wia onop en Paipel ni doadoahngki brochure en Kupwurki.—Madiu 7:14.