Dahme Komw Pahn Koasoiaiong Emen Buddhist?
1 Nan ekei sahpw kan tohto sang elep en irail me kin papidaisla kin wia Buddhist kan mahs. Dahme kin kamwekid irail en men rong padahk mehlel? Iaduwen ke kak kalohk ong emen Buddhist?
2 Kasalehda Nsenohki Mehlel: Aramas tohto me mahs wia Buddhist kei kin koasoia me kaidehn mwekidki padahk kan me kahrehong irail ong padahk mehlel. Ahpw, re mwekidki ahn brother oh sister kan uhdahn nsenohki irail. Emen lih me mihmi nan United States ahpw kohsang Asia uhdahn pwuriamweikihla sister men inenen kadek ong ih ahnsou me sister kin tuhwong ih, eri, e tepida onop Paipel rehn sistero. Liho sohte kak lokaiahki lokaiahn wai mwahu, ahpw sistero kin kanengamah. Ma liho pwang de sohte kak onop, sistero kin mwemweitlahte rehn liho oh koasoanehdi pil ehu ahnsoun onop. Kedekedeo, liho, nah pwutak riemen, oh ah nohno me maher papidaisla. Liho pwurala sahpwo me e kohsang oh sewese aramas tohto en sukuhliki padahk mehlel. Ni ahnsouwet, emen nah pwutak kin doadoahk nan Rahn Ohpis. Siohwa pahn kapaiada kitail ma kitail pahn kahlemengih sapwellimen Siohwa ‘kadek oh limpoak ong aramas akan’!—Taitus 3:4 (New World Translation).
3 Madamadau en Buddhist: Buddhist kan kin kak pwungki madamadau tohto, ahpw re sohte kin uhdahn anahne tengediong padahk ehute de ekeite padahk kan. Ihme kahrehda, dahme emen emen Buddhist kin kamehlele kin wekpeseng. Ehu padahk me ekei Buddhist kan kin kamehlele iei me mour kin dirkihla lokolok, ahpw ma emen kin marainla, e kak kauhdi lokolok wet oh ah mour oh ah mehla oh pwurehng mourda sohte pahn imwila suwed. Re kin nda me ma ke men pitsang soahng wet, ke pahn lel ohng nan Nirvana, oh sohte me kak kawehwehda dahkot Nirvana pwe kaidehn wasahkis de mwekid ehu, ahpw, irair ehu me ke sohte pahn lelohng medek oh suwed. (Kilang brochure me oaralap koasoia What Happens to Us When We Die?, pali 9-10.) Dahme met kin padahkiong kitail? E pahn sohte katepe kitail en akamaiki padahk kan en Buddhist. Ahpw, kitail en nantihong koasoiaiong irail duwen kahpwal kan me kitail koaros kin lelohng.
4 Kasalehda Ire kan me Tohnihmw Pahn Pwungki: Pwehki Buddhist kan kin mwadang medemedewe lokolok ahnsou me re kin medemedewe sampah, ma ke pahn koasoia mour kohkohlahte, re pahn lemeleme me dahme ke kin kamehlele me sohte kak wiawi. Ahpw, kitail koaros men ahneki mour en peneinei nsenamwahu, oh kitail pil kin kasikasik ahnsou me lokolok pahn sohlahr wiawi, oh kitail koaros men ese wehwehn mouratail. Tehk iaduwen ke kak koasoia soahng pwukat.
5 Ke kak nda:
◼ “Rahnwet, kitail mihmi nan sampah me kin dirkihla aramas me kin lokolok. Dahme ke kin kamehlele me pahn kahrehong kalokolok en sohla mie? [Mweidong en sapeng.] Mie kokohp ehu me ntingdi mahs mahsie me kin wia mehkot kansenamwahu ong ie. [Wadek Kaudiahl 21:4.] Ahpw, mehlel, ahnsowo saikinte lel, ahpw ahnsou me e pahn kohdo, kitail soh pahn perenki kilang kokohp wet pweida?” Mwurin mwo, idek rehn tohnihmw ma e men wadek pwuhk ehu me pahn kasalehda dahme pahn wiawi pwehn kasohrala kalokolok.
6 Ong emen me mah, ke kak nda:
◼ “Mwein komwi, duwehte ngehi, kin pwunodki soangsoangen madamadau en aramas me inenen suwed ahpw kin kapilpene neitail seri kan. Dahme kahrehda me pwulopwul kan kin kalapw lohdiong dipen nenek? [Mweidong en sapeng.] Komw wehwehki me soahng pwukat kokohpadahr nan pwuhk ehu me ntingdi mwohn pelien lamalam en Muslim, Kristian oh Hindu tepida? [Wadek 2 Timoty 3:1-3.] Ken tehk me soangen irair suwed pwukat kin wiawihte mendahki aramas en ahnsou wet kin loalokongla sang mahs. [Wadek iretikitik 7.] Pwuhk wet sewese ie en wehwehki padahk mehlel kan me pali laud en aramas sohte kin sukuhliki erein arail mour. Komw men wadek pwuhk wet?” Idek rehn tohnihmwo ma e men ale pwuhk de brochure me kin koasoia ire wet.
7 Irail Buddhist kan kin kilangwong Paipel nin duwen pwuhk sarawi ehu. Eri, ke kak wadek sang Paipel. (Ipru 4:12) Ma aramaso kin sapwungki iaduwen tiahk en wai “kauwehla” pein arail tiahk, ke kak padahkiong ih me sounnting kan en Paipel kohsang Asia.
8 Mehnia Pwuhk de Brochure de Doaropwe Pahn Mwahu Ong Irail? Doaropwe (tract) me oaralap koasoia Will Suffering Ever End? wiawihda keieu ong Buddhist kan oh e mihmi ni lokaiahn Saina, Sapahn, Sinhalese, oh Thai. Oh pil, sounkalohk tohto kin doadoahngki pwuhk pwukat: Mankind’s Search for God, The Secret of Family Happiness, oh Questions Young People Ask—Answers That Work; oh pil brochure “Look! I Am Making All Things New,” oh What Is the Purpose of Life—How Can You Find It?; oh pil doaropwe (tract) Kingdom News No. 35, Aramas Koaros Pahn Kak Limpoakpene? Pali laud en Buddhist me sukuhliki padahk mehlel ahnsou wet kin onopki brochure Kupwurki mahs, a mwuri pwuhken Knowledge.
9 Misineri en Buddhist kan lel Adens kerenieng sounpahr 400 mwohn Pohl kalohk wasao, ahpw e sohte sansal ma e tuhwong emen me kin ahneki madamadau en Buddhist. Ahpw, kitail wehwehki me Pohl kin kalohk ong soangsoangen aramas koaros. E kin wia “ladu men ong koaros” pwehn “komourala ekei irail.” (1 Kor. 9:19-23) Kitail pil kak kahlemengih Pohl ni atail pahn nsenohki aramas akan oh kasalehong koaros me kitail tuhwong koapworopwor me kitail kin ahneki.