Service Mihding Kan Ong December

Wihk me Tepida November 29

Koul 156

10 min: Pakair kan en sahpwet. Ekei pakair kan sang Atail Doadoahk Ong Wehio.

15 min: “Atail Doadoahk en Kalohk Kin Kasalehda me Kitail Weksang Meteikan.” Wia ahmw tepin koasoi en reireiki minit 1 oh mwurin mwo, wia peidek kan oh mweidong tohnmwomwohdiso en sapeng. Ni ahmw pahn doadoahngki pwuhken Mour Kohkohlahte, pali 133, parakrap 18-19, koasoia ekis duwen dahme kitail kak nda pwehn kangoange emen me kin onop Paipel rehtail en men iang kalohk.

20 min: “Ihs Men Onop Paipel Rehtail?” Padahk oh kamwomwada kan. Nin duwen dahme parakrap 4 kasalehda, koasoia dahme kitail kak wia pwehn kahrehong tohnihmw en men wadek neitail pwuhk kan, brochure kan, makasihn kan oh doaropwe kan. Koasoanehdi kamwomwada riau me mwotomwot pwehn kasalehda iaduwen kitail kak wia met. Luhke tohnmwomwohdiso kan en kasalehda iaduwen re pweida mwahu ni arail kin tepida onop Paipel rehn aramas akan.

Koul 198 oh kapakap.

Wihk me Tepida December 6

Koul 204

10 min: Pakair kan en sahpwet. Ripoht en mwohni.

15 min: Koakon en Peidek. Padahk ehu. Koasoia koasoandi kan nan pein atail mwomwohdiso ong kamwekel en Kingdom Hall oh dahme kitail kak wia pwe Kingdom Hall en mwakelekel oh soandi mwahu.

20 min: “Dahme Komw Pahn Koasoiaiong Emen Muslim?” Peidek oh pasepeng kan. Kasalehda me kitail anahne kanahieng atail lokaia oh wiewia ni atail pahn koasoiong aramas me kohsang wehi teikan. Koasoanehdi kamwomwada me sounkalohk kan kaunopada mwahu. Ma ke men kalaudehla ahmw wehwehki Islam, kilang insert en Atail Doadoahk Ong Wehio en March 1998; pwuhken Reasoning, pali 23-24; oh pwuhken Mankind’s Search for God, irelaud 12.

Koul 208 oh kapakap.

Wihk me Tepida December 13

Koul 211

5 min: Pakair kan en sahpwet.

10 min: Kousapahlih “Prokram Kapw en Kapokon en Rahn Tohrohr.”

12 min: “Kalohk Rahn en Holiday kan.” Peidek oh Pasepeng kan. Pakairki koasoandi en kalohk ong December 25.

18 min: Pahpa oh Nohno kan​—Kumwail kin Kaukaule Wia Amwail Onop en Peneinei? Padahk oh mweidong tohnmwomwohdiso en pil koasoi. Kawehwehda dahme kahrehda peneinei kan koaros anahne kohpene oh onop. (Kilang pwuhken School Guidebook, pali 37-38.) Koasoia duwen ekei kahrepe kan ekei onop en peneinei sohte kin pweida: (1) pahpa de nohno de ira koaros kin lemeleme me seri kan nohn tikitik en paiekihda onop en peneinei, (2) re lemeleme me iang towehda mihding kan itar, (3) re pwang sang arail koasoandi kedirepw kan, oh (4) mweidong kilang TV en kauwehla arail onop en peneinei. (Kilang Watchtower (lokaiahn wai) en May 15, 1994, pali 11-​12.) Luhke tapwin peneinei kan en koasoia iaduwen re powehdi kahpwal kan pwehn kaukaule onop rehn arail peneinei. Kasalehda me atail onop en peneinei kak pweida ma koaros nannanti oh sawaspene pwehn pweida.

Koul 217 oh kapakap.

Wihk me Tepida December 20

Koul 158

12 min: Pakair kan en sahpwet oh ekspiriens kan nan kalohk. Kousapahlih “Kilang Manaman en Pwuhk Sarawi!”

13 min: Ia Ahmw Madamadau Ong Ahmw Pwukoah kan? Emen elder pahn wia padahk wet. Mie pwukoah tohto nan mwomwohdiso me kak sewese koasoandi en mwomwohdiso en pweida mwahu: kaunopada padahk kan oh kamwomwada kan; kohla ale ekei sounkalohk kan pwe re kak iang towehda mihding kan oh iang kalohk; sewese me mah kan nan mwomwohdiso; oh kamwakel, onehda sapahl oh apwalih Kingdom Hall, iangahki mwet liki. Dahme ke kin wia ma emen kin pekih ahmw sawas? Ekei kin nda me re sohte pahn sawas, oh ekei kin pweiek en sewese, oh ekei kin nda me re pahn sawas ahpw re sohte kin kanokehla pwukoah me re nda me re pahn wia. Koasoia dahme kahrehda e wia pwais kaperen ehu ma kitail pahn mwadang nda me kitail men sawas oh mwurin mwo, kapwaiada dahme kitail nda me kitail pahn wia. Kangoange koaros nan mwomwohdiso en kasalehda me re men sawas.​—Melkahka 110:3, footnote; Aiseia 6:8.

20 min: “Dahme Komw Pahn Koasoiaiong Emen Buddhist?” Peidek oh pasepeng kan. Ma kitail kin tuhwong emen nan kalohk me kohsang pelien lamalam me kaidehn Kristian oh kin wia tiahk kan me kitail kin sehse, pali laud en kitail kin sehse dahme kitail pahn nda. Artikel wet wia ehu artikel sang artikel limau me pahn koasoia oaralap wet. Koasoanehdi kamwomwada ehu me sounkalohk kan kaunopada mwahu. Ma ke men kalaudehla ahmw wehwehki Buddhism, kilang insert en Atail Doadoahk Ong Wehio en March 1998; pwuhken Reasoning, pali 21; oh pwuhken Mankind’s Search for God, irelaud 6.

Koul 223 oh kapakap.

Wihk me Tepida December 27

Koul 215

10 min: Pakair kan en sahpwet. Katamankin sounkalohk koaros en kapedolong neirail riport en kalohk ong December.

15 min: Kangoang Me Kapw Kan en Iang Towehda Mihding Kan. Emen elder oh ministerial servant (emen de riemen) pahn koasoiapene brochure Doing God’s Will, pali 14-​15. Kousapahlih dahme kahrehda e kesempwal ong me kapw kan en iang towehda mihding kan. Re pahn ale kaweid tohto, kangoang, oh sawas. Kousapahlih mihding limau me kin wiawi ehu ehu wihk, oh kawehwehda kamwahupen mihding pwukat koaros. Koasoia iaduwen mihding kan kin kangoange kitail en tiahk mwahu, kakehlail atail pali ngehn, kahrehong kitail en men karanih sapwellimen Siohwa pwihn, kangoange kitail en miniminiong riatail kan, oh sewese kitail en wehwehki kahrepe kitail kin kalohk. Kangoange tohnmwomwohdiso en doadoahngki brochure wet pwehn kangoange me kapw kan en iang towehda mihding kan.

20 min: Atail Pilipil​—New World Translation. Padahk oh kamwomwada kan. Kitail kin weksang pelien lamalam teikan pwe kitail kin wiahda, doadoahngki oh kihseli ehu kawehwehpen Pwuhk Sarawi me irail me keidi kan wiahda. Kitail sohte wia met pwehn kepwehpwehla de en kihseli pwuhk ehu me pahn kauwehla dahme aramas teikan kin kamehlele. Ahpw, kitail mwekidki atail ineng en kawahuwih mwaren Koht oh sewese meteikan en esehla Koht. Ekei kawehwehn Paipel kan kin wia arail kawehwe ni ahl me apwal ong aramas en wehwehki, eri, kousapahlih kamwahupen New World Translation. (Kilang pwuhken “All Scripture,” pali 327-​331. Tehk dahme ntingihdi nan parakrap 3, oh pil tehk iaduwen re kamwahuwiala kawehwe kan nan parakrap 6, oh kasalehda kamwahupe kan nan parakrap 22-23.) Koasoanehdi kamwomwada riau me pahn kasalehda dahme kitail kak nda ma aramas pahn nda, “Mie pein noumwail Paipel.”​—Kilang pwuhken Reasoning, pali 279-​280.

Koul 205 oh kapakap.