Sapwellimen Koht Mahsen en Kokohp Koaros Pahn Pweida!
1 Sangete mahs lel ni ahnsouwet, Sounkadehdehn Siohwa kan kin nsenohkin kokohp en Paipel kan. Ihme kahrehda kitail inenen perenkihda me oaralap en Kapokon en District nan pahr wet iei “Sapwellimen Koht Mahsen en Kokohp.” Kitail kasikasik dahme Siohwa pahn ketkihong kitail, kenatail “mwenge ahnsou me konehng.” (Madiu 24:45) E sohte kansensuwedih kitail.
2 Ire Kesempwal kan en Kapokon: Oaralap en Padahk ni Rahn Kaunop, “Rong Kanahieng Sapwellimen Koht Mahsen en Kokohp,” kin koasoia duwen ahnsou me Sises ketin wekila oh linganla. (Madiu 17:1-9) E kasansalehda me kitail kin momour ni ahnsou keieu mwahu pwehki kitail kin mih ni ahnsou imwi, oh koasoandi kapw kerendohr! Ehu ahl kitail kak rong kanahieng sapwellimen Koht Mahsen iei sang ni atail pahn kaukaule wadek Paipel. Ekei padahk kan me mih pahn oaralap wet “Perenki Wadek Sapwellimen Koht Mahsen” kin kihda sawas laud en sewese kitail en wia atail wadawad en Paipel ni ahl me kitail pahn paiekihda oh perenkihda.
3 Rahn Sarawi, kokohp en Apakuk kin sansalda ong kitail ni ahnsou me kitail sukuhlikier me atail ahnsou kin duwehte ansoun Apakuk oh wiewia kesempwal akan pil pahn kereniong pweida ni ahnsou me Siohwa pahn kasorehla aramas suwed akan oh doarehla aramas pwung kan. Padahk ong Wehi Pokon, “Kawiliakapwala Mehkoaros—Nin Duwen me Pwuhk Sarawi Kohpada” me kawehwehda ni sansal pweidahn kokohpo, “I pahn kapikada lahng kapw ehu oh sampah kapw ehu” me diarekda nan pwuhken Aiseia. Kitail me ale sawas en kasikasik rahno me met pahn pweida, ‘Koht ketin onehda sapahl mehkoaros!’ (Kaudiahl 21:5)
4 Pwuhk Kapw Kapwuriamwei Ehu: Ia uwen laud atail peren ni ahnsou me kitail alehdi pwuhk kapwo, Pay Attention to Daniel’s Prophecy! Sohte pekidpe me ke tepida wadwadek pwuhk kaselel wet. Meno me wia kahparek wet oh kaselehda pwuhk kapw wet koasoia: “Kokohp kan koaros nan pwuhken Daniel pweidaher, ihte ekei oaretik kan me saikinte pweida.” Met soh pahn kasalehong kitail duwen karuwaru en atail ahnsou?
5 Prokram en kapokon pahn kakehle atail pwoson me sapwellimen Koht inou kan koaros me saikinte pweida uhdahn pahn pweida. Kitail en ale kangoange en pousehla ehukihong meteikan Sapwellimen Koht Mahsen en kokohp!