Kumwail Pahpa oh Nohno kan—Sewese Noumwail Seri kan en Wia Koasoandi Mwahu kan nan Arail Mour
1 Kitail sohte kin ipwidihki wia koasoandi mwahu kan de depweila oh wiahda koasoandi mwahu. Ahpw, en sewese seri kan en wia koasoandi mwahu kan nan arail mour sohte kin mwadang wiawi, e kin anahne ahnsou laud. E kin wiawi ekis ekis. Pahpa oh nohno kan anahne ahnsou koaros sewese neirail seri kan pwe ren kak “kekeirirailda ni kaiahn oh madamadau en Siohwa.”—Episos 6:4.
2 Tepida Sang Ni Arail Wia Seri Pwelel: E kin inenen kapwuriamwei en kilang ia uwen mwadang seri tikitik kan kin sukuhliki mehkot oh koledi soahng kapw kan. Mendahki ma aramas laud kin apwalki sukuhliki lokaia kapw ehu, seri tikitik kan kin kak sukuhliki lokaia riau de siluh ni ahnsou teieu. Ken dehr ahneki pepehm me noumw seri me nohn tikitik pwehn kak ahnla wia koasoandi mwahu kan. Ma ke kin mwadang kaiahne ih nin duwen padahk mehlel en Paipel oh wia met ahnsou me e wie kekeirada, ahnsou me noumw seri sounpahr limau de weneu, kaweid en Siohwa pahn audehla eh madamadau kan oh loalokong wet kak sewese ih en “ese oh wia dahme e anahne wia pwehn kak ale kamour.”—2 Tim. 3:15, New World Translation.
3 En Ahnla Iang Kalohk: Koasoandi ehu me kin mwahu en kaiahnehki noumwail seri kan iei en kaukaule iang kalohki Rongamwahu en Wehin Koht. Pahpa oh nohno tohto kin wia met ni arail kin kahre neirail seri en iang kalohk sang ihmw-lel-ihmw mendahki ma seri kan wie seri pwelelte. Ahnsou me seri kan kin kilang arail pahpa oh nohno kan kaukaule iang kalohk, re kin kak sukuhliki kalahngan oh ngoangki kalohk. Pahpa oh nohno kan kak kasalehong neirail seri kan iaduwen re kak kalohk ihmw-lel-ihmw, pwurehng pwurala rehn aramas akan, tepida onop en Paipel rehn aramas akan oh pil iangahki kalohk ni ahnsou soh lipilipil.
4 Ma seri kan kin wia padahk nan Theocratic Ministry Sukuhl, met kin pil sewese irail. E pahn sewese irail en ahneki koasoandi mwahu me pid pein arail onop oh iaduwen re kak wehwehki dahme re wadewadek. Re kin sukuhliki iaduwen irail kin koasoi oh doadoahngki neirail Pwuhk Sarawi, pwurehng pwurala rehn aramas akan, oh tepida onop en Paipel rehn aramas akan. Kaiahn wet kin sewese irail pwe re pahn men pioneer ehu rahn de pil ahneki pwais tohrohr kan duwehte doadoahk nan Bethel de misineri. Irail tohto me rahnwet iang doadoahk nan Bethel de wiahla misineri kan kin tamataman ahnsou me re pwulopwul oh re kin iang Theocratic Ministry Sukuhl oh re kin nda me met sewese irail en wia koasoandi mwahu kan nan arail mour me re kin doadoahngki lel met.
5 Kitail kin rasehng pwehl me kin mihmi nan limen Siohwa Koht, Sounwia Sah. (Aiseia 64:8) Ma pwehlo kin mwuterek, e kin mengei en wiahda. Ahnsou me emen kin wiahda sah, ma pwehlo kin werei, e kin kekeluwakla. E kin duwehte aramas akan. Ahnsou me re pwulopwul, re kin mwuterek—ma re pil tikitik mehlel, re kin uhdahn mwuterek mehlel. Ahnsou me re tikitik, ih ahnsou me pahpa oh nohno kan kak kaiahne irail pwe ren kak wia dahme mwahu de ma sohte kaiahn kin kohwong irail, re kak wia dahme suwed. Ma ke kin wia pahpa de nohno limpoak men, tepida mwadang kaiahne seri kan pwe ren kak wia koasoandi mwahu kan nan arail mour oh koahiekla oh ngoangki wia doadoahk en kalohk.